ၶွင်ႇသီႇသိုၵ်းမၢၼ်ႈ ၸႂ်ႉႁိူဝ်းမိၼ်ပွႆႇမၢၵ်ႇသႂ်ႇ ၼႂ်းဝၢၼ်ႈ ၼမ်ႉၶၢႆႉ ၸေႈဝဵင်းသီႇသႅင်ႇ ၸိုင်ႈတႆးပွတ်းၸၢၼ်းလႄႈ မၢၵ်ႇတူၵ်းတိူဝ်ႉၺႃးၵူၼ်းမိူင်းလူႉတၢႆ(1) ၵေႃႉ ၊ ႁိူၼ်းယေးလူႉၵွႆၸွမ်း (4) လင် ၼႆယူႇယဝ်ႉ။

မိူဝ်ႈၼႆႉဝၼ်းထီႉ 28/02/2024 ၶၢဝ်းယၢမ်းၵၢင်ၼႂ် 09:30 မူင်း ၼၼ်ႉ ၶွင်ႇသီႇသိုၵ်းမၢၼ်ႈ ၸႂ်ႉႁိူဝ်းမိၼ်တိုၵ်း သေ ယိုဝ်းၵွင်ႈၸၢၵ်ႈ ပွႆႇမၢၵ်ႇသႂ်ႇၼႂ်းဝၢၼ်ႈၼႃးၶၢႆႉ ၸေႈဝဵင်းသီႇသႅင်ႇ ၸိုင်ႈတႆးပွတ်းၸၢၼ်း ဢမ်ႇယွမ်း(8) လုၵ်ႈ မၢၵ်ႇတူၵ်းတႅၵ်ႇတိူဝ်ႉၺႃး လုင်းၽျႃးၶုၼ်ႇ ဢႃႇယုႉ (63) ပီႊ ၵူၼ်းဝၢၼ်ႈၼႃးၶၢႆႉ လႆႈလူႉသဵင်ႈသၢႆၸႂ် လႄႈ တိူဝ်ႉပႃးႁိူၼ်းၵူၼ်းဝၢၼ်ႈ လႆႈလူႉၵွႆၸွမ်း (4) လင်ယူႇယဝ်ႉ။

ၵဵဝ်ႇလူၺ်ႈလွင်ႈၼႆႉသေ ၵူၼ်းမိူင်းပိုၼ်ႉတီႈၸေႈဝဵင်းသီႇသႅင်ႇ ၵေႃႉၼိုင်ႈလၢတ်ႈၼႄဝႃႈ-“ၸႂ်ႈၶႃႈဢေႃႈ ၵွင်ႈၸၢၵ်ႈ ၼႆႉ ယိုဝ်းပဵၼ်လၢႆသိပ်းလုၵ်ႈဢမ်ႇႁူႉယဝ်ႉၶႃႈ မၢၵ်ႇတေႉတေမီး(8) လုၵ်ႈၼႆႉဢေႃႈ တီႈဝၢၼ်ႈ ၼႃးၶၢႆႉ ၼႆႉ သိုၵ်းၸုမ်းလႂ်ၵေႃႈဢမ်ႇမီးဝႆႉၶႃႈ မီးၵူၼ်းဝၢၼ်ႈၵူၼ်းမိူင်းၵူၺ်းဢေႃႈ ႁဝ်းၶႃႈတေႉႁၼ်ထိုင်ဝႃႈ သိုၵ်း မၢၼ်ႈၶဝ်ၼႆႉ တင်ႈၸႂ်ယိုဝ်းၵူၼ်းမိူင်းၵူၺ်းၶႃႈဢေႃႈ” ဝႃႈၼႆ။

တီႈဝၢၼ်ႈၼႃးၶၢႆႉ ၸေႈဝဵင်းသီႇသႅင်ႇ ဢၼ်ၾၢႆႇၶွင်ႇသီႇသိုၵ်းမၢၼ်ႈ ဢဝ်ႁိူဝ်းမိၼ်တိုၵ်း ယိုဝ်းၵွင်ႈၸၢၵ်ႈ ပွႆႇမၢၵ်ႇသႂ်ႇ ၼႆႉ ဢမ်ႇၸႂ်ႈဢွင်ႈတီႈပဵၼ်ပၢင်တိုၵ်းသေဢမ်ႇၵႃး ၸုမ်းယိပ်းၵွင်ႈၵၢင်ႇၸုမ်းလႂ်ၵေႃႈ ဢမ်ႇယူႇသဝ်းတူင်ႉၼိုင် ဝႆႉသေ ပဵၼ်ဢွင်ႈတီႈ ဢၼ်ၵူၼ်းမိူင်းၵူၼ်းဝၢၼ်ႈၶဝ် ယူႇသဝ်း ႁဵတ်းၵိၼ်ၵၢၼ်ၽုၵ်ႇ သွမ်ႈၵူၺ်း ၼႆယူႇယဝ်ႉ။

Phot Credit to PNLA News &. Information Department’

#shanstateprogressparty

#shanstatearmy

#SSPPInfo #ႁိူဝ်းမိၼ်တိုၵ်း၊