ၶွင်ႇသီႇသိုၵ်းမၢၼ်ႈဢွၼ်ႁူဝ် ႁွင်ႈၵၢၼ်ၾၢႆႇဢုပ်ႇပိူင်ႇ ဢၼ်ယူႇၾၢႆႇတႂ်ႈၶွင်ႇသီႇသိုၵ်းမၢၼ်ႈၵုမ်းၵမ် ၼႂ်းၸေႈ ဝဵင်းတၢင်ႉယၢၼ်းၼၼ်ႉသေ ႁွင်ႉၵူၼ်းမိူင်းႁဵတ်းပၢင်ၵုမ် ပိူဝ်ႈတႃႇၵဵပ်းသိုၵ်းမႂ်ႇ ၼႆယူႇယဝ်ႉ။

ပိူဝ်ႈတႃႇႁႂ်ႈၵူၼ်းမိူင်းၶဝ်ႈႁၢပ်ႇထၢမ်းၵၢၼ်ၼႂ်းတပ်ႉသိုၵ်း ၶွင်ႇသီႇသိုၵ်းမၢၼ်ႈၼႆလႄႈ မိူဝ်ႈဝၼ်းထီႉ 14/03/2024 ၶၢဝ်းယၢမ်းၵၢင်ၼႂ် 09:00 မူင်း တေႃႇထိုင်ၶၢဝ်းယၢမ်း ၵၢင်ဝၼ်း 12:00 မူင်းၼၼ်ႉ ၶွင်ႇသီႇသိုၵ်းမၢၼ်ႈဢွၼ်ႁူဝ် ၸုမ်းၾၢႆႇဢုပ်ႉပိူင်ႇ ဢၼ်ယူႇၾၢႆႇတႂ်ႈၶွင်ႇသီႇသိုၵ်းမၢၼ်ႈ ၵုမ်းၵမ် ၼႂ်းၸေႈဝဵင်း တၢင်ႉယၢၼ်း ၼၼ်ႉ သေ ၸတ်းႁဵတ်းပၢင်ၵုမ် ႁူပ်ႉထူပ်း ၵေႃႇမတီႇဢိူင်ႇ ၵေႃႇမတီႇပွၵ်ႉ တီႈႁူင်းႁေႃးလူင်ၸေႈဝဵင်း ၼႂ်းပွၵ်ႉမၢႆ(4) ၸေႈဝဵင်းတၢင်ႉယၢၼ်း ၸိုင်ႈတႆးပွတ်းႁွင်ႇ ၼၼ်ႉယူႇယဝ်ႉ။

တီႈၼႂ်းပၢင်ႁူပ်ႉထူပ်းၼၼ်ႉ မီးၵေႃႇမတီႇဢိူင်ႇ ၊ ၵေႃႇမတီႇပွၵ်ႉ ၼႂ်းၼႃႈတီႈ ၸေႈဝဵင်းတၢင်ႉယၢၼ်း တင်းသဵင်ႈ ၶိုၼ်ႈႁွတ်ႈသေ ၾၢႆႇၶွင်ႇသီႇသိုၵ်းမၢၼ်ႈတုၵ်းယွၼ်းၵူၼ်းသိုၵ်းမႂ်ႇ ပွၵ်ႈဢွၼ်တၢင်းသုတ်းၼႆႉ ၼိုင်ႈဢိူင်ႇလႂ် (2) ၵေႃႉ ၊ ၼိုင်ႈပွၵ်ႉလႂ် (2) ၵေႃႉ ဢမ်ႇဝႃႈယိင်း/ၸၢႆး ႁႂ်ႈပဵၼ် ၵူၼ်းၼုမ်ႇသႅၼ်းဢႃႇယု 18 တေႃႇ 35 လႄႈ ပေႃးထိုင်ဝၼ်းထီႉ 17/03/2024 ၼၼ်ႉ ႁႂ်ႈလႆႈဢဝ်သဵၼ်ႈမၢႆ ၵူၼ်းသိုၵ်းမႂ်ႇ ၵႂႃႇဢၢပ်ႈပၼ် တီႈတပ်ႉ သိုၵ်းမၢၼ်ႈ ဢၼ်ပၵ်းသဝ်းဝႆႉ ၼႂ်းၸေႈဝဵင်းတၢင်ႉယၢၼ်းၼၼ်ႉ ၼႆယူႇယဝ်ႉ။

ၵဵဝ်ႇလူၺ်ႈလွင်ႈၼႆႉသေ ၵူၼ်းမိူင်းပိုၼ်ႉတီႈ ၼႂ်းၸေႈဝဵင်းတၢင်ႉယၢၼ်းၵေႃႉၼိုင်ႈလၢတ်ႈၼႄဝႃႈ – “ၸႂ်ႈၶႃႈဢေႃႈ ပွၵ်ႈဢွၼ်တၢင်းသုတ်းၼႆႉတေႉ တေယွၼ်းၼိုင်ႈဢိူင်ႇ (2) ၵေႃႉ ၶႃႈဝႃႇ ပေႃးလႆႈယဝ်ႉၼႆ ငိၼ်းဝႃႈၶဝ်တေဢဝ်ၵႂႃႇ သွၼ်ၵၢၼ်သိုၵ်း တီႈတပ်ႉတၢင်ႉယၢၼ်းၼႆႉ တႃႇၶၢဝ်းတၢင်း(30) ဝၼ်းၼႆၶႃႈဢေႃႈ။ ပေႃးၸုပ်ႈဢွၼ်တၢင်းၼႆႉယဝ်ႉတေႉ တႃႇထႅင်ႈၸုပ်ႈၼိုင်ႈ တေယွၼ်းၵႃႈႁိုဝ်ဢၼ်ဝႃႈ ၼၼ်ႉတေႉ ပႆႇႁူႉၶႃႈ။

ပေႃးဝႃႈႁႂ်ႈ ႁဵတ်းသိုၵ်းမၢၼ်ႈတေႉ ၽႂ်တေဢမ်ႇၶႆႈႁဵတ်းၶႃႈ ၽိူဝ်ႇႁဵတ်းသိုၵ်းမၢၼ်ႈ တႃႉႁဵတ်းသိုၵ်းတႆးႁဝ်း ဢေႃႈ။ ၶႃႈထၢင်ႇတေႉ ၶဝ်တေဢဝ်ၵႂႃႇသွၼ်ၵၢၼ်ပၼ်သေ ထူဝ်းၼႃႈသိုၵ်းၶဝ်ႈပၢင်တိုၵ်း ၼႂ်း ၼႃႈတီႈ ဢၼ် ၶဝ်သုမ်းဝႆႉ ၸိူဝ်းၼၼ်ႉၵူၺ်း ပေႃးမိူၼ် ၼၼ်တေႉ မိူၼ်ၵၼ်တၢင်းဝႃႈ ႁႂ်ႈၵႂႃႇၸုၼ်ႉသၢႆၸႂ်တၢင်ၶဝ် ၵူၺ်းယဝ်ႉ” ဝႃႈၼႆ။

လွင်ႈဢၼ် ၾၢႆႇၶွင်ႇသီႇသိုၵ်းမၢၼ်ႈ ၸတ်းႁဵတ်းပၢင်ၵုမ် ႁွင်ႉထူပ်းၵူၼ်းမိူင်းသေ ၵဵပ်းသိုၵ်းမႂ်ႇၼႆႉ ဢမ်ႇၵႃး ၼႂ်း ၸေႈဝဵင်းတၢင်ႉယၢၼ်းတီႈလဵဝ်ၵူၺ်း မိူၼ်ၼင်ႇ ၼႂ်းၸေႈဝဵင်းမိူင်းၵၢဝ် ၊ ၸေႈဝဵင်းမိူင်းသူႈ ၸိူဝ်းၼႆႉၵေႃႈ ၾၢႆႇၶွင်ႇသီႇသိုၵ်းမၢၼ်ႈ တုၵ်းယွၼ်းသိုၵ်းမႂ်ႇဝႆႉ ၼိုင်ႈဢိူင်ႇလႂ် (2) ၵေႃႉ ၼႂ်းၸေႈဝဵင်းၵေးသီး ၼိုင်ႈဢိူင်ႇ လႂ် (150) ၵေႃႉ တေႃႇထိုင် (170) ၵေႃႉ ၼႆယူႇယဝ်ႉ။

#shanstateprogressparty

#shanstatearmy

#SSPPInfo

#သိုၵ်းမၢၼ်ႈၵဵပ်းသိုၵ်း