ယိူင်းဢၢၼ်း ပူၵ်းပွင်ပၼ် ႁႂ်ႈလုၵ်ႈဢွၼ်ႇသႅၼ်းႁုၼ်ႈမႂ်ႇ ပေႃးတေမီးၼမ်ႉၵတ်ႉ ပဵၼ်ၼေႃႇတႅၼ်းၶိူဝ်း ၵူၼ်းလူင်မိူဝ်းၼႃႈ၊ ၸဵမ်ၼမ်ႉၵတ်ႉၵူႈပၢႆးပၢႆး ၊ပိူဝ်ႈတႃႇပၢႆးတူဝ် ၊ ပၢႆးၸႂ် ၊ပၢႆးယူႇလီ ၊ႁႂ်ႈသႅၼ်းႁုၼ်ႈမႂ်ႇႁဝ်း မေႃႁူမ်ႈၶွတ်ႇလိူတ်ႈၽွမ်ႉသဵင်ပဵင်းပၢၵ်ႇၵၼ် ၼႆသေ ယူႇတီႈမုၵ်ႉၸုမ်း ၼၢင်းယိင်း ဢွၼ်ႁူဝ် ႁူမ်ႈတင်းၸုမ်းၾၢႆႇပၢႆးပိင်ႇ ၺႃႇ ငဝ်ႈငုၼ်း ပႃႇတီႇမႂ်ႇသုင်ၸိုင်ႈတႆးတပ်ႉသိုၵ်းၸိုင်ႈတႆး ၸတ်းႁဵတ်း ပၢင်လဵၼ်ႈႁႅင်းၶႄႉၶဵင်ႇ မၢၵ်ႇၼင်လွမ်ႈ ဢွင်ႈတီႈ ဝၢင်းပိတ်ႉမၢၵ်ႇၼင် ဝဵင်းမႂ်ႇဝၢၼ်ႈႁႆး ၸိုင်ႈတႆးပွတ်း ၸၢၼ်း ၼႆယူႇယဝ်ႉ။

ပၢင်ၶႄႉၶဵင်ႇလဵၼ်ႈႁႅင်း ပိတ်ႉမၢၵ်ႇၼင်ႁိမ်ဢုပ်းၵႅဝ်ႈၶမ်း ဢႃႇယူႉ (15) ၶူပ်ႇ ပွၵ်ႈၵမ်း (1) ၼႆႉ တေႇမိူဝ်ႈဝၼ်းထီႉ 28-12-2023 ၼၼ်ႉ သေ ဢွင်ႇမၢၼ်ယဝ်ႉတူဝ်ႈၵႂႃႇ ၼႂ်းဝၼ်းထီႉ 05 -01-2024 လႄႈ ၼႂ်းၼၼ်ႉ မီးလုၵ်ႈႁဵၼ်း ဢွၼ်ႇဢႃႇယုႉ (15) ၶူပ်ႇလူင်းၽၢႆႇတႂ်ႈ မီး(7) ၸုမ်း ၶဝ်ႈ ႁူမ်ႈလဵၼ်ႈႁႅင်း ၶႄႉၶဵင်ႇပိတ်ႉမၢၵ်ႇၼင်လွမ်ႈ ၸွမ်းယူႇယဝ်ႉ။ၸုမ်း ၶဝ်ႈႁူမ်ႈၶႄႉၶဵင်ႇ (7)ၸုမ်းၼၼ်ႉ ပဵၼ်လုၵ်ႈဢွၼ်ႇ ႁဵၼ်း ႁူင်းႁဵၼ်းသႅင်ၵိုင်ႇမိူင်း(ၵ) ၊ လုၵ်ႈႁဵၼ်းႁူင်းႁဵၼ်းသႅင်ၵိုင်ႇမိူင်း (ၶ )၊လုၵ်ႈႁဵၼ်းႁူင်းႁဵၼ်းပၢင်ႇလေႃႉ ၊ လုၵ်ႈႁဵၼ်းႁူင်းႁဵၼ်းဝၢၼ်ႈႁႆး ၊ လုၵ်ႈႁဵၼ်းႁူင်းႁဵၼ်း ၼေႃႇတႅၼ်းၶိူဝ်း (ၵ) ၊ လုၵ်ႈႁဵၼ်းႁူင်းႁဵၼ်းၼေႃႇတႅၼ်း ၶိူဝ်း (ၶ) လႄႈ လုၵ်ႈႁဵၼ်းႁူင်းႁဵၼ်းတပ်ႉၼုမ်ႇႁၢၼ် ၸဵမ် ၸိူဝ်း ၼႆႉယူႇယဝ်ႉ။

ၼႂ်းပၢင်ၶႄႉၶဵင်ႇလဵၼ်ႈႁႅင်းပိတ်ႉမၢၵ်ႇၼင်လွမ်ႈ ၼၼ်ႉ လုၵ်ႈႁဵၼ်းဢွၼ်ႇသႅင်ၵိုင်ႇမိူင်း(ၵ) လႆႈသူးထီႉ(1) ၊ လုၵ်ႈ ႁဵၼ်းဢွၼ်ႇဝၢၼ်ႈႁႆး လႆႈသူးထီႉ (2) ၊ လုၵ်ႈႁဵၼ်းၼေႃႇတႅၼ်းၶိူဝ်း (ၵ) လႆႈသူးထီႉ (3) သေ ယူႇတီႈငဝ်ႈငုၼ်း SSPP/SSA လႆႈယိုၼ်ႈမွပ်ႈပၼ် သူးထီႉ(1) ဢုပ်းၵႅဝ်ႈၶမ်း သူးငိုၼ်း (500,000)ႁႃႈသႅၼ်ၵျၢပ်ႈ ၊ သူးထီႉ(2) (300,000) သၢမ်သႅၼ်ၵျၢပ်ႈ ၊ သူးထီႉ(3) (200,000) သွင်သႅၼ်ၵျၢပ်ႈ လႄႈ ယူႇတီႈႁူဝ်ပဝ်ႈလူင် ၸွမ်သိုၵ်းလူင် ပၢင်ၾႃႉ တွၼ်ႈသူးၼမ်ႉၸႂ် လႄႈသူးလဝ်ႇၸႂ် ပၼ်လုၵ်ႈ ႁဵၼ်းဢွၼ်ႇ ၼိုင်ႈၸုမ်းလႂ် (100,000) သႅၼ်ၵျၢပ်ႈ ၸဵမ်ၸိူဝ်းၼႆႉ ယူႇယဝ်ႉ။

ယိူင်းဢၢၼ်း ပိူဝ်ႈတႃႇလုၵ်ႈဢွၼ်ႇ သႅၼ်းႁုၼ်ႈမႂ်ႇ ပေႃးတေမီးလွင်ႈၸမ်ၸႂ်မိုတ်ႈၵိုဝ်းၵၼ် ၊ ႁႂ်ႈမေႃ ၶွတ်ႇလိူတ်ႈၽွမ်ႉသဵင်ပဵင်းပၢၵ်ႇၵၼ် ၸဵမ်ၸိူဝ်းၼႆႉ ယူႇယဝ်ႉ။

#shanstateprogressparty

#shanstatearmy

#SSPPInfo

#ပၢင်ၶႄႉၶဵင်ႇလဵၼ်ႈႁႅင်းပိတ်ႉမၢၵ်ႇၼင်

#မုၵ်ႉၸုမ်းၼၢင်းယိင်း

#သႅၼ်းႁုၼ်ႈမႂ်ႇ