ငဝ်ႈငုၼ်း ပႃႇတီႇမႂ်ႇသုင်ၸိုင်ႈတႆး တပ်ႉသိုၵ်းၸိုင်ႈတႆး SSPP/SSA ၸတ်းႁဵတ်း ပၢင်ၵႅဝ်ႈ ၵိုတ်းလိုဝ်ႈ ပၢင် သွၼ် ၽိူမ်ႉထႅမ်ၼမ်ႉၵတ်ႉၽူႈမီးၸၼ်ႉဢွၼ်ႇ (Non-Commissioned Officer Course) NCOC ၸုပ်ႈထီႉ(1) ဢွင်ႈတီႈ ႁူင်းႁဵၼ်းၾၢႆႇဢုပ်ႇပိူင်ႇ တိုင်းလဵင်း ဢိူင်ႇၶုမ်ႇပၢင် ၸေႈဝဵင်းဝၢၼ်ႈႁႆး။

လိူၼ်ဢေႊပရိူဝ်ႊ 28 ဝၼ်း ၶၢဝ်းယၢမ်းၵၢင်ၼႂ် 9 မူင်း ၼၼ်ႉ ယူႇတီႈငဝ်ႈ SSPP/SSA လႆႈၸတ်းႁဵတ်း ပၢင် ၵႅဝ်ႈ ၵိုတ်းလိုဝ်ႈ ပၢင်သွၼ်ၽိူမ်ႉထႅမ်ၼမ်ႉၵတ်ႉၽူႈမီးၸၼ်ႉ ဢွၼ်ႇ NCOC ၸုပ်ႈထီႉ(1) လႄႈ မီးၽူႈယႂ်ႇ ၵူၼ်းလူင် (21) ၸဝ်ႈ ၊ လုၵ်ႈႁဵၼ်း (263) ၵေႃႉ ၊ ၸုမ်းၵၢၼ်လုမ်း (12) ၵေႃႉ ၊ ႁူမ်ႇလူမ်ႈ (24) ၵေႃႉ ႁူမ်ႈသဵင်ႈ ၽူႈၶိုၼ်ႈႁွတ်ႈမီး(320) ၵေႃႉ ယူႇယဝ်ႉ။

တီႈၼႂ်းပၢင်ၵႅဝ်ႈၼၼ်ႉ ၸွမ်သိုၵ်းငဝ်းၾႃႉမွၵ်ႇလၢတ်ႈ ၶေႃႈၵႂၢမ်း ပိုတ်ႇပၢင်လႄႈ သပ်းလႅင်းပၼ်ပိုၼ်ႉႁူႉၵဵဝ်ႇ လူၺ်ႈလွင်ႈ ပၢင်သွၼ်ၽိူမ်ႉထႅမ်ၼမ်ႉၵတ်ႉၽူႈမီးၸၼ်ႉ ဢွၼ်ႇၼႆႉဝႃႈ-“ယွၼ်ႉလူဝ်ႇၵူၼ်းမီးၼမ်ႉၵတ်ႉ တႃႇ ဢွၼ် ႁူဝ်ၵႂႃႇမိူဝ်းၼႃႈ လႄႈ ၸင်ႇလႆႈပိုတ်ႇပၢင်သွၼ် ၽိူမ်ႉထႅမ်ၼမ်ႉၵတ်ႉ ၽူႈမီးၸၼ်ႉယူႇယဝ်ႉ။ ပေႃးမီး ၼမ်ႉၵတ်ႉ ၸွင်ႇၸၢင်ႈ ဢဝ်သိုပ်ႇ ဢွၼ်ႁူဝ်ၵႂႃႇတၢင်းၼႃႈ ပၢၼ်သိုပ်ႇပၢၼ်” ၼႆယူႇယဝ်ႉ။

ဝၢႆးသေၼၼ်ႉ ယူႇတီႈ ၽူႈၸတ်းၵၢၼ်ဢုပ်ႉပိူင်ႇငဝ်ႈငုၼ်း ၸွမ်သိုၵ်းလူင်သၢႆၾႃႉ ယိုၼ်ႈဢၢပ်ႈပၼ်ၶႅပ်းဝႂ် သူးၼမ်ႉ ၸႂ်မေႃသွၼ် ၊ ၽူႈၼၢမ်းၼႂ်း(2) ငဝ်ႈငုၼ်း ၸဝ်ႈသိုၵ်းလူင်ၸၢႆးသူႉ ယိုၼ်ႈဢၢပ်ႈပၼ် ၶႅပ်းဝႂ် လူင်း ပၢင်သွၼ် တီႈၵူႈတပ်ႉၵူႈႁွင်ႈၵၢၼ်ၸိူဝ်းဢၼ်လႆႈၵႂႃႇၶိုၼ်ႈႁွတ်ႈပၢင်လဵပ်ႈ ႁဵၼ်း ၊ ၸွမ်ႁၢၼ်ဝုၼ်းဢွင်ႇ ယိုၼ်ႈ ဢၢပ်ႈပၼ် သူးလုၵ်ႈ ႁဵၼ်းၵတ်ႉၶႅၼ် ဢၼ်လႆႈထီႉ(1) ထီႉ(2) ထီႉ (3) ၊ တၢင်တူဝ်လုၵ်ႈႁဵၼ်းၵေႃႉၼိုင်ႈ မွၵ်ႇ လၢတ်ႈၶေႃႈၵႂၢမ်း ငိၼ်းၸူမ်း ၶွပ်ႈၸႂ် လႄႈ ၸဝ်ႈႁၢၼ်တုမ်ႇၶမ်းသူၼ် မွၵ်ႇလၢတ်ႈၶေႃႈ ၵႂၢမ်းလူပ်းလင် သေ ယူႇ တီႈၽူႈၶပ်ႉပၢင် လႆႈပိုၼ်ၽၢဝ်ႇ ပၢင်ၵႅဝ်ႈဢွင်ႇမၢၼ်ယဝ်ႉတူဝ်ႈၵႂႃႇ ၼႂ်းၶၢဝ်းယၢမ်း ၵၢင်ၼႂ် 09:53 မူင်း ၼၼ်ႉယူႇ ယဝ်ႉ။

ပၢင်သွၼ်ၽိူမ်ႉထႅမ်ၼမ်ႉၵတ်ႉၽူႈမီးၸၼ်ႉဢွၼ်ႇ NCOC ၼႆႉ လႆႈတေႇပိုတ်ႇမႃး မိူဝ်ႈၼႂ်းလိူၼ် ၾေႇၾေႃႊဝႃႇရီႊ 19 ဝၼ်း ၊ လႆႈပူင်သွၼ်မႃး ၶၢဝ်းတၢင်း (2) လိူၼ်ပၢႆလႄႈ ပိူင်လူင်ၼႆႉ ယိူင်းဢၢၼ်း တႃႇ ႁႂ်ႈၽူႈမီး ၸၼ်ႉဢွၼ်ႇၶဝ် ပေႃးတေမီးၼမ်ႉၵတ်ႉ ဢွၼ်ႁူဝ်ၵႂႃႇတၢင်းၼႃႈ ပၢၼ်သိုပ်ႇပၢၼ် ၼႆသေ ၸင်ႇလႆႈပိုတ်ႇၽုၺ်ႇ ပူင်သွၼ်မႃးယူႇယဝ်ႉ။

#shanstateprogressparty

#shanstatearmy

#SSPPInfo

#ပၢင်ၵႅဝ်ႈ

#ပၢင်သွၼ်ၽိူမ်ႉထႅမ်ၼမ်ႉၵတ်ႉၽူႈမီးၸၼ်ႉဢွၼ်ႇ

#NCOC