ၽူႈမီးပုၼ်ႈၽွၼ်းၾၢႆႇတပ်ႉၾၢႆႇဢုပ်ႉပိူင်ႇ SSPP/SSA ဢၼ်ပၵ်းသဝ်းတူင်ႉၼိုင် ၼႂ်းၼႃႈတီႈ ၸေႈဝဵင်းမိူင်းသူႈ ၼၼ်ႉ ႁူမ်ႈမိုဝ်းပေႃႈမႄႈၵူၼ်းမိူင်းသေ ဢွၼ်ႁူဝ် လုၵ်ႈ ၼွင်ႉ ၵေႃႉသိုၵ်းၵေႃႉႁၢၼ်ၶဝ် ၶဝ်ႈၵူတ်ႇထတ်း တီႉၺွပ်း ၵူၼ်းသူႇ၊ သမ်း၊ ၵိၼ် ၊ ၶၢႆ ယႃႈမဝ်းၵမ် ၸေႈဝဵင်းမၢႆ (3) မိူင်းသူႈ ၸေႈတွၼ်ႈမၢႆ (1) ၸိုင်ႈတႆးပွတ်းၸၢၼ်း ၼႆယူႇယဝ်ႉ။
ယူႇတီႈပေႃႈမႄႈၵူၼ်းမိူင်း ယွၼ်းတၢင်းႁူမ်ႈမိုဝ်းၸူးတီႈ ၽူႈမီးပုၼ်ႈၽွၼ်း SSPP/SSA ဢၼ်တူင်ႉၼိုင်ပၵ်းသဝ်း ၼႂ်းပိုၼ်ႉတီႈ ၼၼ်ႉ သေ မိူဝ်ႈဝၼ်းထီႉ 06/03/ 2024 ၼၼ်ႉ ၽူႈမီးပုၼ်ႈၽွၼ်း ၾၢႆႇတပ်ႉ ၾၢႆႇ ဢုပ်ႉပိူင်ႇ SSPP/SSA ၼႂ်းၸေႈဝဵင်းမၢႆ (3) မိူင်းသူႈ ဢွၼ်ႁူဝ် လုၵ်ႈၼွင်ႉ ၵေႃႉသိုၵ်းၵေႃႉႁၢၼ် ၶဝ်ႈၵူတ်ႇထတ်း ပၢင်ၶၢႆယႃႈ ၼႂ်းပိုၼ်ႉတီႈ ပွၵ်ႉမၢႆ(4) ဝဵင်းမိူင်းသူႈ လႄႈ တီႉၺွပ်းလႆႈ ၵူၼ်းၵဵဝ်ႇၶွင်ႈယႃႈမဝ်းၵမ် ၽူႈၸၢႆး (12) ၵေႃႉ ၊ ႁူမ်ႈပႃးၶိူင်ႈၶူဝ်း ဢၼ်ၵဵဝ်ႈၶွင်ႈ ၵၢၼ်သူႇ ၊ သမ်း ၊ ၵိၼ်၊ ၶၢႆ ယႃႈမဝ်းၵမ်ၸဵမ်ၸိူဝ်းၼႆ ယူႇယဝ်ႉ။
ၵူၼ်းဢၼ်ၵဵဝ်ႇၶွင်ႈယႃႈမဝ်းၵမ် (12)ၵေႃႉ ၼၼ်ႉ ပဵၼ် ၵူၼ်း ပွၵ်ႉမၢႆ(4) ဝဵင်းမိူင်းသူႈ (7) ၵေႃႉ၊ ပွၵ်ႉမၢႆ(3) ဝဵင်းမိူင်းသူႈ (1) ၵေႃႉ၊ ၵူၼ်းဝၢၼ်ႈမႂ်ႇ ဢိူင်ႇႁၢႆးပႃ (1) ၵေႃႉ၊ ၵူၼ်း ဝၢၼ်ႈလွႆမၢၵ်ႇႁိၼ် ဢိူင်ႇပၢင်ႇလွႆ (1)ၵေႃႉ၊ ၵူၼ်း ဝၢၼ်ႈ ၵုၼ်ၼႃး ပွၵ်ႉမၢႆ(4) ဢိူင်ႇမိူင်းဢွတ်ႇ ၸေႈဝဵင်းမိူင်းသူႈ (1) ၵေႃႉ လႄႈ ၵူၼ်းဝၢၼ်ႈပၢင်ႇဝႅတ်ႈ ဢိူင်ႇမိူင်းဢွတ်ႇ ၸေႈဝဵင်းမိူင်းသူႈ(1) ၵေႃႉ ၸဵမ်ၸိူဝ်းၼႆႉ ယူႇယဝ်ႉ။
ၽူႈမီးတၢင်းၽိတ်း ၸိူဝ်းၵဵဝ်ႈၶွင်ႈယႃႈမဝ်းၵမ်ၸဵမ်ၸိူဝ်း ၼႆႉ ယူႇတီႈပႃႇတီႈမႂ်ႇသုင်ၸိုင်ႈတႆး တပ်ႉသိုၵ်းၸိုင်ႈတႆး SSPP/SSA တေဢဝ်မူၼ်ႉမႄးတူဝ်ၸႂ်ပၼ်သေ ၵူၼ်းၸိူဝ်းၵဵဝ်ႈၶွင်ႈ ၵၢၼ်ၶၢႆယႃႈမဝ်းၵမ်ၼၼ်ႉၵေႃႈ တေပၼ်တၢမ်ႇတၢင်းတၢင်းၽိတ်းၵႂႃႇ ၸွမ်းၼင်ႇမူႇပိူင် ပႃႇတီႇမႂ်ႇသုင်ၸိုင်ႈတႆး တပ်ႉသိုၵ်းၸိုင်ႈတႆး SSPP/SSA မီးဝႆႉၼၼ်ႉယူႇယဝ်ႉ။#shanstateprogressparty
#shanstatearmy
#SSPPInfo
#ယႃႈမဝ်းၵမ်
