ၾၢႆႇဢုပ်ႉပိူင်ႇ ပႃႇတီႇမႂ်ႇသုင်ၸိုင်ႈတႆး တပ်ႉသိုၵ်းၸိုင်ႈတႆး SSPP/SSA ၼႂ်းၸေႈဝဵင်းမၢႆ(17) ၸေႈတွၼ်ႈမၢႆ(8) ၼၼ်ႉ ၸွႆႈထႅမ် ၶဝ်ႈသၢၼ်/ၶိူင်ႈၵိၼ်ယမ်ႉ တီႈ‌ပေႃႈမႄႈ ၵူၼ်းမိူင်း ၸိူဝ်းပၢႆႈၽေးပၢင်တိုၵ်း ၼႂ်းဝၢၼ်ႈဢီႇၼၢႆး ဢိူင်ႇဢီႇၼၢႆးလူင် ၸေႈဝဵင်းမၢႆ(17) ၸေႈဝဵင်း လႃႈသဵဝ်ႈ ၸိုင်ႈတႆးပွတ်းႁွင်ႇ ၼၼ်ႉယူႇယဝ်ႉ ။

မိူဝ်ႈဝၼ်းထီႉ 14 /12/2023 ၼၼ်ႉ ၽူႈမီးပုၼ်ႈၽွၼ်း ၾၢႆႇဢုပ်ႉပိူင်ႇ ပႃႇတီႇမႂ်ႇသုင်ၸိုင်ႈတႆးတပ်ႉသိုၵ်းၸိုင်ႈတႆး SSPP/SSA ၼႂ်းၸေႈဝဵင်းမၢႆ(17) ၸေႈတွၼ်ႈမၢႆ(8) ဢွၼ် ႁူဝ်လုၵ်ႈၼွင်ႉၵေႃႉသိုၵ်းၵေႃႉႁၢၼ် ၵႂႃႇၸွႆႈထႅမ် ၶဝ်ႈသၢၼ်/ၶိူင်ႈၵိၼ်ယမ်ႉ တႃႇၵူၼ်းပၢႆႈၽေးပၢင်တိုၵ်း (267)ၵေႃႉ ဢၼ်လုၵ်ႉတီႈဝၢၼ်ႈဢီႇၼၢႆး ဢိူင်ႇ ဢီႇ ၼၢႆး ၸေႈဝဵင်းလႃႈသဵဝ်ႈသေ ပၢႆႈမႃးသွၼ်ႈသဝ်းဝႆႉတီႈ ဝတ်ႉၵျွင်းၽြႃးဝၢၼ်ႈၼွင်လႅင် ၊ ၵွင်းလွႆၼွင်ႁိူဝ်း ၊ ထမ်ႈၼမ်ႉလႃႈ ၊ ဝတ်ႉၵျွင်းဝၢၼ်ႈၵွင်းၵႄး ၼႂ်းဢိူင်ႇဢီႇ ၼၢႆးလူင် ၸေႈဝဵင်းလႃႈသဵဝ်ႈၼၼ်ႉ ယူႇယဝ်ႉ။

ပေႃႈမႄႈၵူၼ်းမိူင်း ဢၼ်လႆႈပၢႆႈၽေးပၢင်တိုၵ်းၼႆႉ ယွၼ်ႉ ၶွင်ႇသီႇသိုၵ်းမၢၼ်ႈတင်း တပ်ႉသိုၵ်းတဢၢင်း TNLA ပဵၼ်ပၢင်တိုၵ်းၵၼ် ၼႂ်းဝၢၼ်ႈဢီႇၼၢႆး ၼၼ်ႉလႄႈ ၸင်ႇလႆႈ ဢွၼ်ၵၼ်ပၢႆႈဢွၵ်ႇဝၢၼ်ႈ ၸဵမ်မိူဝ်ႈဝၼ်းထီႉ 10-11/12/2023 ၼၼ်ႉၼႆယူႇယဝ်ႉ။

ၶိူင်ႈၶူဝ်းဢၼ် လႆႈၸွႆႈထႅမ်ၵႂႃႇၼၼ်ႉ ၶဝ်ႈသၢၼ် (13) ထူင် ၊ ၵိူဝ် ထူင်လူင် (1)ထူင် ၊ ၽွင်ဝၢၼ်ထူင်လူင် (1) ထူင်လႄႈ ဢိၵ်ႇပႃး ၶိူင်ႈၽၵ်း လွင်ႈၵိၼ်ယမ်ႉ ၵမ်ႈၽွင်ႈ ၸဵမ် ၸိူဝ်းၼႆႉ ယူႇယဝ်ႉ။

တေႃႇထိုင်မိူဝ်ႈလဵဝ်ၵေႃႈ ၶွင်ႇသီႇသိုၵ်းမၢၼ်ႈ တင်း တပ်ႉသိုၵ်းတဢၢင်း TNLA တိုၵ်ႉၶဵင်ႈၶႅင် ၼႃႈသိုၵ်း တေႃႇ ၵၼ်ဝႆႉ ၼႂ်းဝၢၼ်ႈဢီႇၼၢႆး ဢိူင်ႇဢီႇၼၢႆး ၸေႈဝဵင်းလႃႈသဵဝ်ၼၼ်ႉယူႇလႄႈ ၵူၼ်းမိူင်းၸိူဝ်းပၢႆႈၽေး ၵူဝ်ပဵၼ်ပၢင်တိုၵ်းထႅင်ႈသေ ပႆႇႁတ်းပွၵ်ႈၶိုၼ်းႁိူၼ်း ၼႆယူႇယဝ်ႉ။#shanstateprogressparty

#shanstatearmy

#SSPPInfo

#ၵူၼ်းပၢႆႈၽေးပၢင်တိုၵ်း

#ဝၢၼ်ႈဢီႇၼၢႆး