ပႃႇတီႇမႂ်ႇသုင်ၸိုင်ႈတႆး တပ်ႉသိုၵ်းၸိုင်ႈတႆး ႁူပ်ႉထူပ်းၵူၼ်းမိူင်းပိုၼ်ႉတီႈထႅင်ႈ ၼႂ်းဢိူင်ႇႁမ်းငၢႆး ၸေႈဝဵင်းမိူင်းၵိုင် ၸိုင်ႈတႆးပွတ်းၸၢၼ်း ။
မိူဝ်ႈဝၼ်းထီႉ 2 လိူၼ်ၼူဝ်ႊဝုၼ်ႊပိူဝ်ႊ 2021ပီႊၼႆႉယူႇတီႈ ၸဝ်ႈႁၢၼ်ၽူဝ်းလူႇ ဢွၼ်ႁူဝ်သေ ႁူပ်ႉထူပ်းပေႃႈမႄႈၵူၼ်းမိူင်း သင်ႇၶႃၸဝ်ႈ တီႈဝတ်ႉၵျွင်းလုၵ်းလိူဝ်ႇ ၼမ်ႉဢူတ်း ၊ ဢိူင်ႇႁမ်းငၢႆး သပ်းလႅင်း ဢုပ်ႇဢူဝ်း ၵဵဝ်ႇလူၺ်ႈပိူင်ပႃႇတီႇမႂ်ႇသုင်ၸိုင်ႈတႆး ၊ လွင်ႈၵၢၼ်မိူင်း ၊ ၵၢၼ်သိုၵ်း ၊ ၵၢၼ်ၶၢဝ်ႇငၢဝ်း ၊ လွင်ႈယူႇသဝ်းၵူၼ်းမိူင်း ၸိူဝ်းၼႆႉ ၊ မီးပေႃႈမႄႈၵူၼ်းမိူင်း မိူၼ်ၼင်ႇ ဝၢၼ်ႈၼွင် တဝ်း ၊ ဝၢၼ်ႈၼမ်ႉဢူတ်း ၊ ဝၢၼ်ႈလွႆသၢင်း ၊ ဝၢၼ်ႈႁူဝ်ၽၢႆ ၊ ဝၢၼ်ႈၼႃးလိူဝ်ႇ ၊ ဝၢၼ်ႈထမ်ႈ ၊ ဝၢၼ်ႈလွႆသၢႆး ၊ ဝၢၼ်ႈၵုင်းသၢၼ်ႈ ၊ ၸိူဝ်းၼႆႉ ၶဝ်ႈႁူမ်ႈၸွမ်း 300 ၵေႃႉပၢႆ ဝႃႈၼႆ ။
ၸဝ်ႈဢွင်ႇလူႇ ၽူႈၵႂႃႇၶဝ်ႈႁူမ်ႈၸွမ်းလၢတ်ႈၼႄဝႃႈ – လွင်ႈၵၢၼ်ဢုပ်ႇဢူဝ်း ၼႂ်းပၢင်ႁူပ်ႉထူပ်း ၵူၼ်းမိူင်းတႄႉၵေႃႈ မိူၼ်ၼင်ႇဢၼ်ႁဝ်းၶႃႈ ႁူပ်ႉထူပ်းဢုပ်ႇဢူဝ်းပေႃႈမႄႈၵူၼ်းမိူင်းႁဝ်းမႃး ၼၼ်ႉၵူၺ်း ၼင်ႇႁိုဝ်ပေႃႈမႄႈၵူၼ်းမိူင်းႁဝ်း ပေႃးတေပွင်ႇၸႂ် ပိူင်ပႃႇတီႇမႂ်ႇသုင်ၸိုင်ႈတႆး ႁဝ်းမီး ၼၼ်ႉ ၼင်ႇႁိုဝ်ၵူၼ်းမိူင်း လႄႈ တပ်ႉသိုၵ်းပေႃးတေၸမ်ၸႂ်ၵၼ် ႁဝ်းၶႃႈၵေႃႈ လူင်းႁူပ်ႉထူပ်း ၵူၼ်းမိူင်းႁဝ်းၵႂႃႇၸိူင်ႉၼၼ်ၵူၺ်း ထႅင်ႈလွင်ႈၼိုင်ႈၵေႃႈ လႆႈႁူႉပႃး လွင်ႈၵူၼ်းမိူင်းႁဝ်း တၢင်ႇလၢတ်ႈမႃးၸိူဝ်းၼၼ်ႉ ၼင်ႇႁိုဝ်ၵူၼ်းမိူင်း တေမီးလွင်ႈယူႇသႃႇလူမ်ၸႂ်ၼၼ်ႉ ႁဝ်းၵေႃႈ ၸၢင်ႈၵႄႈလိတ်ႈပၼ်ၵႂႃႇဢေႃႈ ဝႃႈၼႆ ။
ဝၢႆးသေ ပၢင်တိုၵ်းသွင်ၽၢႆႇယဵၼ်ၵႂႃႇယဝ်ႉ ၼႂ်းထုင်ႉဢိူင်ႇႁမ်းငၢႆး ဢိူင်ႇႁူဝ်ၶၢႆး ၸေႈဝဵင်း မိူင်းၵိုင်ၼႆႉ ယူႇတီႈ ၽၢႆႇတပ်ႉ ၽၢႆႇဢုပ်ႉပိူင်ႇ ၶတ်းၸႂ်လူင်းႁူပ်ႉထူပ်းၵူၼ်းမိူင်း ၸွႆႈထႅမ် ၵႄႈလိတ်ႈ ၸွမ်းၼင်ႇပွင်ပဵၼ်လႆႈ ၵႂႃႇယူႇ ဝႃႈၼႆ ။
