ပႃႇတီႇမႂ်ႇသုင်ၸိုင်ႈတႆး ၊ တပ်ႉသိုၵ်းၸိုင်ႈတႆး SSPP/SSA လူင်းႁူပ်ႉထူပ်း သိုပ်ႇၸွႆႈထႅမ် ၵူၼ်းပၢႆႈ ၽေးပၢင်တိုၵ်း ဢၼ်ႁွတ်ႈၽႅဝ်ဝႆႉ တီႈငဝ်ႈငုၼ်း ဝၢၼ်ႈႁႆး ၸိုင်ႈတႆးပွတ်းၸၢၼ်း ၼႆယူႇယဝ်ႉ။
လိူၼ်ဢွၵ်ႇထူဝ်ႇပိူဝ်ႊ (18) ဝၼ်း2024 ၼီႊၼႆႉ ယူႇတီႈ ၽူႈမီးပုၼ်ႈၽွၼ်း SSPP/SSA ဢၼ်ပဵၼ် ၾၢႆႇဢုပ်ႉပိူင်ႇ ၸေႈတွၼ်ႈ ၸေႈဝဵင်း ဢွၼ်ႁူဝ်သေ လႆႈလူင်းႁူပ်ႉထူပ်းသူႇၸႂ်း ပၼ်ႁႅင်းၸႂ် လႄႈ ၸွႆႈထႅမ်ၶူဝ်းၶွင် လွင်ႈၵိၼ်ယႅမ်ႉ တီႈပေႃႈမႄႈၵူၼ်းမိူင်း ၸိူဝ်းဢၼ်လုၵ်ႉတၢင်း ဝဵင်းလႃႈသဵဝ်ႈ၊ ၼႃးမၢၵ်ႇၶေႃ၊ ၼမ်ႉလၼ်ႈ ၸိုင်ႈတႆးပွတ်းႁွင်ႇ သေ ပၢႆႈၽေးပၢင်တိုၵ်းမႃး သွၼ်ႈသဝ်းယူႇဝႆႉ တီႈႁူင်းသဝ်း ပွၵ်ႉ(4) ဝၢၼ်ႈႁႆး ၊ ဝတ်ႉၵျွင်းမုၼ်ၸဝ်ႈ ဝၢၼ်ႈပၢင်ႇလေႃႉ ၊ ႁူင်းသဝ်း ဝၢၼ်ႈတၢင်းၽႄ ၼႂ်းၸေႈဝဵင်းဝၢၼ်ႈႁႆး ၼၼ်ႉယူႇယဝ်ႉ။
ၵူၼ်းပၢႆႈၽေးပၢင်တိုၵ်း ဢၼ်လႆႈၸွႆႈထႅမ်ၼၼ်ႉ ႁူမ်ႈသဵင်ႈမီး (113) ၵေႃႉသေ လႆႈၸွႆႈထႅမ်ပၼ် ၶူဝ်းၶွင် လွင်ႈၵိၼ်ယႅမ်ႉ မိူၼ်ၼင်ႇ ၶဝ်ႈသၢၼ် ၊ ၵိူဝ်၊ၽွင်ဝၢၼ်၊ ၼမ်ႉမၼ်းၵိၼ် ၊ ဢႃႇလူး၊ ၽၵ်းမီႇလႅင်၊ မၵ်ႇၶိူဝ်သူမ်ႈ၊ထူဝ်ႇလိူင်၊ ၵျႃႇသၢၼ်ႇ ၸဵမ်ၸိူဝ်းၼႆႉ လႄႈ ႁူမ်ႈသဵင်ႈ တူၵ်းမႅၼ်ႈ သၢင်ႉငိုၼ်း ( 3,580,000) သၢမ်သိပ်းႁႃႈသႅၼ်ပႅတ်ႈမိုၼ် ၼႆယူႇယဝ်ႉ။
ၵူၼ်းပၢႆႈၽေး ဢၼ်ႁွတ်ႈၽႅဝ်ဝႆႉၼႂ်းၼႃႈတီႈ ဢုပ်ႉပိူင်ႇ ပႃႇတီႇမႂ်ႇသုင်ၸိုင်ႈတႆး ၵူႈၼႃႈတီႈ ၼၼ်ႉ တေႃႇထိုင် ၼႂ်းလိူၼ်ဢွၵ်ႇထူဝ်ႇပိူဝ်ႊ(18)ဝၼ်းမႃးၼႆႉ ႁူမ်ႈသဵင်ႈမီး (6067) ၵေႃႉၼႆ လႄႈ ယူႇတီႈ ပႃႇတီႇမႂ်ႇသုင်ၸိုင်ႈ တႆး ၊ တပ်ႉသိုၵ်းၸိုင်ႈတႆး SSPP/SSA လႆႈႁပ်ႉၸွႆႈထႅမ်တူၺ်းထိုင်ပၼ် ဢွင်ႈတီႈယူႇသဝ်း ၊ လွင်ႈၵိၼ် ယႅမ်ႉ ၊ လွင်ႈပၢႆးယူႇလီ၊ လွင်ႈႁူမ်ႇလူမ်ႈၸဵမ် ၸိူဝ်းၼႆႉ ၵႂႃႇယူႇယဝ်ႉ။
