တႄႇမိူဝ်ႈလိူၼ် ဢွၵ်ႇထူဝ်ႇပိူဝ်ႇ 22 မႃးၼႆ မိူင်းၶႄႇ ပိၵ်ႉသဵၼ်ႈတႃႇသၢႆတၢင်းတေႃႇသူင်ႇ ၶူဝ်းၶွင် ဢၼ်လုၵ်ႉတၢင်းလႅၼ်လိၼ်ၸၢပ်ႈ မိူင်းႁူမ်ႈတုမ် မိူင်းလႃး- တႃႈလေႃႉ မိူၼ်ၼင်ႇ ၶူဝ်းၶွင်ၸႂ်ႉတိုဝ်းၼႂ်းႁိူၼ်း၊ ၶိူင်ႈၾႆးၾႃႉ၊ ၶိူင်ႈႁဵတ်းႁိူၼ်း ၊ ၶူဝ်းၶွင်ၵိၼ်ယႅမ်ႉ ၸိူဝ်းၼႆႉ ဢမ်ႇပၼ်တေႃႉသူင်ႇ ၶဝ်ႈၼႂ်းမိူင်းၶႄႇၼႆႉယူႇယဝ်ႉ။

ၵူၼ်းၵႃႉၶၢႆၶဝ်လၢတ်ႈၼႄဝႃႈ- “ ၽၢႆႇႁူမ်ႇလူမ်ႈမိူင်းယူႇၼၢၼ်ႇၵေႃႈ ပိၵ်ႉပႅတ်ႈ သဵၼ်ႈတၢင်း ၵဵင်းတုင်- မိူင်းလႃးသေ ၵဵဝ်ႇလူၺ်ႈလွင်ႈပိၵ်ႉသဵၼ်ႈတၢင်းၼႆႉ မိူဝ်ႈၼႆႉ ၽၢႆႇႁူမ်ႇလူမ်ႈ မိူင်းယူႇၼၢၼ်ႇလႄႈ ၽၢႆႇၵႃႉၶၢႆ မိူင်းၶႄႇ တေမီးလွင်ႈဢုပ်ႇဢူဝ်းၵႄႈလႅတ်ႈပၼ်ၵႂႃႇၼႆႉယူႇယဝ်ႉ။

“ ၵဵင်းတုင်၊ ၵိတ်ႉမိူင်းလႃး (တႃႇလေႃႉ) ပိၵ်ႉဝႆႉဢေႃႈ၊ ၵူၼ်းၵႃႉၶၢႆ ဢၼ်ပဵၼ်ၵူၼ်းၸၢဝ်းၶိူဝ်ၶႄႇၸိူဝ်းၼၼ်ႉၵေႃႈ ပေႃးၶၢင်းယူႇဢေႃႈ၊ ၵူၼ်းၵႃႉၶဝ်မႆႈၸႂ် ၶူဝ်းၶွင် ဢၼ်မီးဝႆႉၼႂ်းၵူဝ်ႇတွင်ႉၼမ်ႁႅင်းၸိူဝ်းၼၼ်ႉ ၵူဝ်ဢမ်ႇၸၢင်ႈ ဢဝ်ၶဝ်ႈၼႂ်းမိူင်းၶႄႇ ၼႆယူႇဢေႃႈ၊ ထႅင်ႈၽၢႆႇၼိုင်ႈၵေႃႈ မိူင်းၶႄႇၶႂ်ႈႁႂ်ႈ ၸုမ်းယိပ်းၵွင်ႈၵၢင်ႇ ၼႂ်းမိူင်းႁူမ်ႈတုမ် ၵိုတ်းယိုတ်း လွင်ႈပိုတ်းယိုဝ်းၵၼ် ၵေႃႈပဵၼ်လႆႈ” ဝႃႈၼင်ႇၼႆ။

ယၢမ်းလဵဝ်ၵေႃႈ မိူင်းတႆးပွတ်းႁွင်ႇ တိုၵ်ႉသိုပ်ႇပဵၼ်ပၢင်တိုၵ်းၵၼ်ႁၢဝ်ႈႁႅင်းဝႆႉ ၸိူဝ်း ၸေႈဝဵင်းၼွင်ၶဵဝ် လႄႈ သဵၼ်ႈတႃႇသၢႆတၢင်း ပိၵ်ႉဢိုတ်းဝႆႉ ဢမ်ႇၸၢင်ႈၵႂႃႇမႃး ၵၢၼ်တေႃႉသူင်ႇၶဝ်ႈၼႂ်းမိူင်းၶႄႇၵေႃႈ ဢမ်ႇၸၢင်ႈႁဵတ်းသေ တႃႇၵူၼ်းမိူင်းၸိူဝ်းဢၼ်ႁဵတ်းၵိၼ်ၵၢၼ် တေႃႉသူင်ႇၶူဝ်းၶွင်ဢၼ် လုၵ်ႉၼႂ်းမိူင်းႁူမ်ႈတုမ် တေႃႉသူင်ႇၵႂႃႇတၢင်းလႅၼ်လိၼ်ၸၢပ်ႈ ၵဵင်းတုင် -မိူင်းလႃး ၵေႃႈ ပိၵ်ႉၵႂႃႇၸိူင်ႉၼႆ မီးလွင်ႈယၢပ်ႇၸႂ်တႄႉ ၼႆယူႇယဝ်ႉ။