သိုၵ်းမၢၼ်ႈ ၼပ်ႉႁူဝ်ပၢၵ်ႇ ၼုၵ်ႈထွႆဢွၵ်ႇပၼ် တင်းသဵင်ႈ ၼႂ်းဝဵင်းသီႇပေႃႉ ၼႂ်းၶၢဝ်းတၢင်း ပၢင်တိုၵ်း ႁိမ်းၸမ် 2 လိူၼ်ပၢႆယူႇယဝ်ႉ။

မိူဝ်ႈဝႃး ဝၼ်းထီႉ – 13-10-2024 ၽၢႆႇသိုၵ်းမၢၼ်ႈ ၼုၵ်ႈထွႆပၼ် ငဝ်ႈတပ်ႉလူင် တီႈဝဵင်းသီႇပေႃႉ ၶလယ 23 ဢၼ်ၸုမ်းဢူၺ်းလီ ပိုတ်းယိုဝ်းမႃး ၶၢဝ်းတၢင်းႁိမ်းၸမ် 2 လိူၼ်သေ ၽၢႆႇတပ်ႉသိုၵ်းမၢၼ်ႈ လႆႈယွမ်းၵၢၼ်ႉထွႆဢွၵ်ႇပၼ် ပႃးၸဵမ်ၵူၼ်းမၢတ်ႇ လုၵ်ႈလၢင်း ၼၢင်းမေး ႁႅင်းၵူၼ်း 300 ပၢႆ ၵႃးလူင် 3 လမ်း ၵႃး ဢွၼ်ႇ 6 လမ်း လုၵ်ႉတၢင်းသီႇပေႃႉ တေႃႉတၢင်ႇ ၶိုၼ်ႈ တၢင်းတပ်ႉမိူင်းယႆယူႇယဝ်ႉ။

“ ၸႂ်ႈၶႃႈဢေႃႈ ပၢင်တိုၵ်းၼႂ်းဝဵင်းသီႇပေႃႉ ၶၢဝ်းတၢင်းႁိုင်ၸမ်မွၵ်ႈ 2 လိူၼ်ၼႆႉယဝ်ႉၶႃႈ။ တပ်ႉသိုၵ်းမၢၼ်ႈလႆႈၼုၵ်ႈထွႆ ဢွၵ်ႇပၼ် လီငၢမ်းယဝ်ႉၶႃႈ၊ ၽၢႆႇတပ်ႉသိုၵ်းမၢၼ်ႈ လႆႈဢဝ်ၵႃးလူင် ၵႃးဢွၼ်ႇတေႃႉတၢင်ႇၵၼ် ၶိုၼ်ႈၵႂႃႇတၢင်းမိူင်းယႆမူတ်းယူႇၶႃႈ၊ ႁႅင်းၵူၼ်းၶဝ်တႄႉ တေမီးမွၵ်ႈ 300 ပၢႆ ပႃးတင်းလုၵ်ႈလၢင်း ၼၢင်းမေး ၵူၼ်းမၢတ်ႇၵူၼ်းၸဵပ်း ၶဝ်ၸိူဝ်း ၼႆႉၶႃႈဢေႃႈꧦၼႆ ၵူၼ်းမိူင်းပိုၼ်ႉတီႈ ​ဝဵင်းသီႇ​ပေႃႉ ​ၵေႃႉၼိုင်ႈ ဝႃႈၼင်ႇၼႆ။

သိုၵ်းမၢၼ်ႈထွႆထွၼ်ဢွၵ်ႇပွၵ်ႈၼႆႉ ဢမ်ႇမီးလွင်ႈ ဝၢင်းၶိူင်ႈၵွင်ႈၵၢင်ႇသေမဵဝ်း လႄႈ ပဵၼ်ဝႆႉ ၽၢင်ႁၢင်ႈသွင်ၽၢႆႇငူပ်ႉငီႉၵၼ်သေထွႆဢွၵ်ႇပၼ်၊ ဝၢႆးသေသိုၵ်းမၢၼ်ႈ ပူၼ်ႉဝဵင်းတၢၼ်ႇတၢၼ်ႇၵေႃႈ ၽၢႆႇသိုၵ်းမၢၼ်ႈ ဢဝ်ႁိူဝ်းမိၼ်မႃးပွႆႇမၢၵ်ႇသႂ်ႇတီႈ သဵၼ်ႈတၢင်းလူတ်ႉၾႆး ဢၼ်မီးႁိမ်းပွၵ်ႉ ဝၢၼ်ႈၸၢင်ႉ ၽၢႆႇ ဢွၵ်ႇဝဵင်းသီႇပေႃႉ ၸိူဝ်းၼၼ်ႉယူႇယဝ်ႉ။

ၼႂ်းဝဵင်းသီႇပေႃႉၼႆႉ တႄႇၸဵမ်မိူဝ်ႈ ၸုမ်းဢူၺ်းလီ ၶဝ်ႈပိုတ်းယိုဝ်းမႃးၼႆႉ ၽၢႆႇသိုၵ်းမၢၼ်ႈ ၸႂ်ႉတၢင်းႁိူဝ်းမိၼ် ပွႆႇမၢၵ်ႇသႂ်ႇ ၼိုင်ႈဝၼ်း ၼပ်ႉႁူဝ်သိပ်းလုၵ်ႈမၼ်း လႄႈ ႁဵတ်းႁႂ်ႈႁိူၼ်းၵူၼ်းမိူင်း ပႃးၸဵမ်ၵူၼ်းမိူင်း ႁူင်းႁဵၼ်း ၵျွင်းမုၼ်ၸဝ်ႈ ၸိူဝ်းၼႆႉ မီးလွင်ႈလူႉ ၵွႆ တင်းၼမ်ယူႇယဝ်ႉ။