ငဝ်ႈငုၼ်း ပႃႇတီႇမႂ်ႇသုင်ၸိုင်ႈတႆး ၊ တပ်ႉသိုၵ်းၸိုင်ႈတႆး SSPP/SSA ၸတ်းႁဵတ်းပၢင်ၵႅဝ်ႈ ႁပ်ႉႁူမ်ၸူမ်းတွၼ်ႈ တပ်ႉသိုၵ်းၵူၼ်းမိူင်း (သႅင်ၵႅဝ်ႉ) ၶဝ်ႈမႃးႁၢပ်ႇထၢမ်းၼႃႈ ၵၢၼ်ၶိုၼ်း ၼႂ်းပႃႇတီႇမႂ်ႇသုင်ၸိုင်ႈတႆး၊ တပ်ႉသိုၵ်းၸိုင်ႈ တႆး သေ မီးၽူႈၶိုၼ်ႈပၼ်ႁႅင်း ၸမ်ႁဵင် ၼႆယူႇယဝ်ႉ။
မိူဝ်ႈၼႆႉ လိူၼ်သႅပ်ႇထိမ်ႇပိူဝ်ႊ 5 ဝၼ်း ၶၢဝ်းယၢမ်း ၵၢင်ၼႂ် 8 မူင်းၼၼ်ႉ ငဝ်ႈငုၼ်း SSPP/SSA လႆႈၸတ်းႁဵတ်း ပၢင် ၵႅဝ်ႈ ႁပ်ႉႁူမ် ၸူမ်းတွၼ်ႈ တပ်ႉသိုၵ်းၵူၼ်းမိူင်း(သႅင်ၵႅဝ်ႉ) တပ်ႉၸုမ်းမၢႆ(3) ဢၼ်ၶဝ်ႈမႃး ႁၢပ်ႇထၢမ်းၼႃႈ ၵၢၼ် ၶိုၼ်း ၼႂ်းပႃႇတီႇမႂ်ႇသုင်ၸိုင်ႈတႆး၊ တပ်ႉသိုၵ်းၸိုင်ႈတႆး ၼၼ်ႉသေ တၢင်တူဝ်ႁူဝ်ပဝ်ႈလူင် ၸွမ်သိုၵ်းလူင် ပၢင် ၾႃႉ လႄႈ ၽူႈယႂ်ႇၵူၼ်းလူင်ၵေႃႇမတီႇငဝ်ႈငုၼ်း ၊ ပေႃႈမႄႈၵူၼ်းမိူင်း ၊ ၸုမ်းလုၵ်ႈႁဵၼ်း ၼေႃႇတႅၼ်းၶိူဝ်း ၊ ၸုမ်း ၾၢႆႇပၢႆးယူႇလီ ၊ ၸုမ်းၼၢင်းယိင်း ငဝ်ႈငုၼ်း ၊ တပ်ႉၼၢင်း ႁၢၼ် ၊ ၵူႈတပ်ႉၵူႈႁွင်ႈၵၢၼ် ႁူမ်ႈသဵင်ႈ ၽူႈၶိုၼ်ႈ ႁွတ်ႈ ပၼ်ႁႅင်း မီး (987) ၵေႃႉ ယူႇယဝ်ႉ။ တီႈၼႂ်းပၢင်ၵႅဝ်ႈၼၼ်ႉ မီးၸွမ်သိုၵ်းလူင် သိူဝ်ထႅၼ်ႈ ၽူႈ ၼမ်းၼႃႈထီႉ(1) ပႃႇတီႇမႂ်ႇသုင်ၸိုင်ႈတႆး၊ တပ်ႉသိုၵ်း ၸိုင်ႈတႆး မွၵ်ႇလၢတ်ႈၶေႃႈၵႂၢမ်း ပိုတ်ႇပၢင်ၵႅဝ်ႈ လႄႈ သပ်းလႅင်းၼႄ လွင်ႈၵၢၼ်ၽွမ်ႉႁူမ်ႈ ၵၢၼ်တေႃႇသူႈ ၽူႈၶဵၼ် ၸဵမ်ၸိူဝ်းၼႆႉ ယူႇယဝ်ႉ။
ၸွမ်သိုၵ်းလူင် လွႆမၢဝ်း ႁူဝ်ပဝ်ႈလူင် တပ်ႉသိုၵ်းၵူၼ်းမိူင်း (သႅင်ၵႅဝ်ႉ) မွၵ်ႇလၢတ်ႈၶေႃႈၵႂၢမ်း သပ်းလႅင်း ၼႄ ၼႂ်းၶၢဝ်းယၢမ်းပူၼ်ႉမႃး လွင်ႈတၢင်း ဢၼ်ယၢမ်ႈလႆႈ ယူႇႁူမ်ႈၸွမ်းၵၼ်မႃးပဵၼ်မူႇၼိုင်ႈၸုမ်းလဵဝ် သေ ဢိင် ၼိူဝ်ငဝ်းလၢႆး ၵူႈၾၢႆႇၾၢႆႇ မိပ်ႇငႅၼ်းဢီးသူင်ႇ လႄႈ ၶိုၼ်းလႆႈ ၽၢတ်ႇၵၼ် သၢမ်ပွၵ်ႈ သၢမ်ၵမ်း ယဝ်ႉ ထိုင်မႃးၶၢဝ်းယၢမ်းၼႆႉ လႆႈၶိုၼ်းမႃးၶဝ်ႈႁူမ်ႈ ႁဵတ်းပဵၼ်မူႇလဵဝ်ၸုမ်းလဵဝ် ၸဵမ်ၸိူဝ်းၼႆႉ ငိၼ်းၸူမ်း ၶွပ်ႈၸႂ် ထိုင်ပႃး တီႈဢၼ်ပႃႇတီႇမႂ်ႇသုင်ၸိုင်ႈတႆး ၊ တပ်ႉသိုၵ်းၸိုင်ႈတႆး တင်း ပေႃႈမႄႈၵူၼ်းမိူင်း ၸိူဝ်းဝႆႉ ၼမ်ႉၼၵ်း ပႂ်ႉႁပ်ႉႁူမ် ၸူမ်းတွၼ်ႈ လွင်ႈလႆႈမႃးႁူမ်ႈၵၼ် ပဵၼ်မူႇလဵဝ် ၸုမ်းလဵဝ် ၼၼ်ႉယူႇယဝ်ႉ။
ဝၢႆးသေၼၼ်ႉ ယူႇတီႈပႃႇတီႇမႂ်ႇသုင်ၸိုင်ႈတႆး၊ တပ်ႉသိုၵ်း ၸိုင်ႈတႆး လႆႈတွၼ်ႈသူးၼမ်ႉၸႂ် ပၼ်တီႈ တပ်ႉသိုၵ်း ၵူၼ်းမိူင်း (သႅင်ၵႅဝ်ႉ) ဢၼ်မႃးၶဝ်ႈႁူမ်ႈ ႁၢပ်ႇထၢမ်းၼႃႈၵၢၼ်ၶိုၼ်း ၼႂ်း SSPP/SSA ၼၼ်ႉ တႃႇသၢင်ႉငိုၼ်း (500) သႅၼ်ၸမ်ၸမ် ယူႇယဝ်ႉ။
တပ်ႉသိုၵ်းၵူၼ်းမိူင်း (သႅင်ၵႅဝ်ႉ) တပ်ႉၸုမ်း(3) ၊ တပ်ႉသိုၵ်းၵူၼ်းမိူင်း (ၵႃႇလိ) တပ်ၸုမ်း(7) တင်းတပ်ႉသိုၵ်း SSPP/SSA ယၢမ်းလဵဝ်ၼႆႉ ယၢမ်ႈပဵၼ်မႃး တပ်ႉသိုၵ်းၸိုင်ႈတႆး SSA မူႇၼိုင်ႈၸုမ်းလဵဝ်ၵၼ်မႃး သေ ငဝ်ႈငုၼ်း ပၵ်းသဝ်း မီးတီႈ ဝၢၼ်ႈသႅင်ၵႅဝ်ႉ ဢိူင်ႇသႅင်ၵႅဝ်ႉ ၼၼ်ႉယူႇယဝ်ႉ။
ဢိင်ၼိူဝ်ငဝ်းလၢႆး ၵၢၼ်မိူင်း ၵၢၼ်သိုၵ်း လူင်ပွင်ၸိုင်ႈသိုၵ်းမၢၼ်ႈ မိပ်ႇငႅၼ်းမႃးသေ မိူဝ်ႈဝၼ်းထီႉ 14/04/2010 ၼၼ်ႉ SSA တပ်ႉၸုမ်း(3) လႆႈပဵၼ်ၵႂႃႇ တပ်ႉသိုၵ်းၵူၼ်း မိူင်း (သႅင်ၵႅဝ်ႉ) ၊ SSA တပ်ႉၸုမ်းမၢႆ(7) လႆႈပဵၼ်ၵႂႃႇ တပ်ႉသိုၵ်းၵူၼ်းမိူင်း (ၵႃႇလိ) ၊ SSA တပ်ႉၸုမ်းမၢႆ(1) လႆႈပဵၼ်မႃး ပႃႇတီႇမႂ်ႇသုင်ၸိုင်ႈတႆး ၊ တပ်ႉသိုၵ်းၸိုင်ႈတႆး SSPP/SSA လႄႈ တေႃႇထိုင် ၶၢဝ်းတၢင်းႁိုင် (14) ပီႊၸမ်ၸမ် ဝၼ်းမိူဝ်ႈၼႆႉ လႆႈၶိုၼ်းႁူမ်ႈၵၼ် ပဵၼ်မႃး ပႃႇတီႇမႂ်ႇ သုင်ၸိုင်ႈတႆး တပ်ႉသိုၵ်းၸိုင်ႈ တႆးဢၼ်လဵဝ်ၵၼ်ၶိုၼ်း ယူႇယဝ်ႉ။#shanstateprogressparty
#shanstatearmy
#SSPPInfo
#တပ်ႉသိုၵ်းၵူၼ်းမိူင်း
#ssppssa#ပၢင်ၵႅဝ်ႈ
