ယွၼ်ႉၾူၼ်တူၵ်းႁႃႇယႂ်ႇ ဢမ်ႇထၢတ်ႇသေ ႁဵတ်းႁႂ်ႈ ၼမ်ႉႁူၺ်ႈ ၼမ်ႉလွႆ ၼွင်းၶဝ်ႈ ၼႂ်းပွၵ်ႉ ၼႂ်းဝဵင်း ၊ ထူမ်ႈ ၺႃး ႁိူၼ်းၵူၼ်းမိူင်း ၼႂ်းၸေႈဝဵင်းၼမ်ႉလၼ်ႈ ၵိင်ႇၽႄၸေႈဝဵင်းသီႇပေႃႉ မီးလွင်ႈလူႉသုမ်းၸွမ်း တင်းၼမ် ယူႇယဝ်ႉ။မိူဝ်ႈလိူၼ် ဢေႃးၵၢတ်ႉသ် 31 ဝၼ်း တေႃႇပေႃးထိုင် လိူၼ်သႅပ်ႇထိမ်ႊပိူဝ်ႇ 1 ဝၼ်း ၶၢဝ်းယၢမ်းၵၢင်ၼႂ်ၸဝ်ႉ ၼၼ်ႉ ယွၼ်ႉၾူၼ်တူၵ်းႁႃႇယႂ်ႇ ဢမ်ႇထၢတ်ႇ လႄႈ ၼမ်ႉၸွမ်း ႁူၺ်ႈ ၸွမ်းလွႆ လႆၼွင်းၶဝ်ႈၼႂ်းပွၵ်ႉၵွင်း လၢင်း ဝဵင်းၼမ်ႉလၼ်ႈသေ ၼွင်းထူမ်ႈႁိူၼ်း ပေႃႈမႄႈၵူၼ်းမိူင်း လၢႆလၢႆလင် ႁဵတ်းႁႂ်ႈ လင်ႁိူၼ်း ၊ ၶူဝ်းႁိူၼ်းၽိူၼ် ဝၢၼ်ႇ ဢၼ်ၵိုၵ်းမီးၸွမ်းႁိူၼ်း လႆႈလူႉသုမ်းၸွမ်း တင်းၼမ် ၼႆယူႇယဝ်ႉ။

ၵဵဝ်ႇလူၺ်ႈလွင်ႈၼႆႉသေ ၵူၼ်းမိူင်းပိုၼ်ႉတီႈ ဝဵင်းၼမ်ႉလၼ်ႈ ၵေႃႉၼိုင်ႈလၢတ်ႈၼႄဝႃႈ- “ၾူၼ်တူၵ်းမိူဝ်ႈ ဝၼ်းထီႉ 31 ၼၼ်ႉ တၢင်းၶိုၼ်း တေႃႇမိူင်းၸမ်လႅင်းၵေႃႈဢမ်ႇထၢတ်ႇၶႃႈ။ ၼမ်ႉၼႆႉ ပဵၼ်ၼမ်ႉႁူၺ်ႈ ၼမ်ႉ ႁွင်ႈ လၢႆမႃး ၵူႈႁူး ၵူႈတၢင်းယဝ်ႉၶႃႈ။ ႁဵတ်းၼၼ်သေ လႆၵပ်ႉၵိဝ်ႇ ၵပ်ႉတၢင်းၶဝ်ႈၼႂ်းပွၵ်ႉ ၼၼ်ႉၶႃႈၼႃႇ။ ၵမ်ႈ ၽွင်ႈတေႉ ဢၼ်မီးဝႆႉတီႈႁိူၼ်းၼႂ်းပွၵ်ႉၼၼ်ႉၵေႃႈ တၼ်းတေႃႉၶူဝ်း တေႃႉလဵင်း ၶၢႆႉဢွၵ်ႇ ယူႇၶႃႈ။ ပၢင်တိုၵ်း ၵေႃႈသမ်ႉၸမ်ႁိမ်း ၼႆႉမႃးလႄႈ ၵမ်ႈၽွင်ႈၵေႃႈ တိုၵ်ႉငိူင်ႉပၢႆႈၽေးဝႆႉသေ သမ်ႉဢမ်ႇၸၢင်ႈမႃးၶႃႈ ၼႃႇၼေႃႈ ။ၸိူဝ်းၼၼ်ႉတေႉ လိူဝ်သေ ႁိူၼ်းၶဝ်လူႉၵွႆယဝ်ႉ ၶူဝ်းႁိူၼ်း ၶူဝ်းယေးၵေႃႈ သုမ်းမူတ်း ၶႃႈဢေႃႈ” ဝႃႈၼႆ။

ၵဵဝ်ႇလူၺ်ႈလွင်ႈ ၼမ်ႉလူၵ်ႈၺႃး ႁိူၼ်းပေႃႈမႄႈၵူၼ်းမိူင်းၼႆႉ သေ ယူႇတီႈၽူႈမီးပုၼ်ႈၽွၼ်း ၾၢႆႇဢုပ်ႇပိူင်ႇ ပႃႇတီႇမႂ်ႇ သုင်ၸိုင်ႈတႆး တပ်ႉသိုၵ်းၸိုင်ႈတႆး SSPP/SSA တိုၵ်ႉႁႃၵဵပ်းၶေႃႈမုၼ်း ႁူဝ်ယွႆႈယႅမ်း ၸိူဝ်းလႆႈလူႉ သုမ်း ၼၼ်ႉ လႄႈ ၵႃႈၼင်ႇပွင်ပဵၼ်လႆႈ ၼၼ်ႉ တေႁႃလၢႆးတၢင်း ၸွႆႈထႅမ်ပေႃႈမႄႈၵူၼ်းမိူင်း ၵႂႃႇယူႇယဝ်ႉ။#shanstateprogressparty

#shanstatearmy

#SSPPInfo

#ၼမ်ႉလူၵ်ႈ

#ဝဵင်းၼမ်ႉလၼ်ႈ

#ၽေးၼမ်ႉ