ပႃႇတီႇမႂ်ႇသုင်ၸိုင်ႈတႆး ၊ တပ်ႉသိုၵ်းၸိုင်ႈတႆး SSPP/SSA ဢၼ်ပဵၼ် ၵေႃႇမတီႇဢုပ်ႉပိူင်ႇ ၵူႈၸၼ်ႉၸၼ်ႉ ၼႂ်းၼႃႈလိၼ်သိုၵ်း တပ်ႉငဝ်ႈသိုၵ်း 798 ၸွႆႈထႅမ်ၵူၼ်းပၢႆႈၽေးပၢင်တိုၵ်း ဢၼ်ႁွတ်ႈ ၽႅဝ်ဝႆႉ ၼႂ်းၸေႈဝဵင်း မိူင်းၵိုင် ၸိုင်ႈတႆးပွတ်းၸၢၼ်း ၼၼ်ႉ ယူႇယဝ်ႉ။
မိူဝ်ႈလိူၼ်ဢေႃးၵတ်ႉသ် 7 ဝၼ်းၼၼ်ႉ ယူႇတီႈ ၽူႈမီးပုၼ်ႈၽွၼ်း ၾၢႆႇဢုပ်ႉပိူင်ႇ ၵူႈၸၼ်ႉၸၼ်ႉ ၼႂ်းၼႃႈတီႈ ဢုပ်ႉပိူင်ႇ ၸေႈတွၼ်ႈမၢႆ(15) ၊ ၸေႈဝဵင်းမၢႆ(35) ၊ ဢိူင်ႇတူင်ႇလဝ်း ၼႂ်းၼႃႈလိၼ်သိုၵ်း တပ်ႉငဝ်ႈသိုၵ်း 798 ၼၼ်ႉ လႆႈလူင်းႁူပ်ႉထူပ်း ပၼ်ႁႅင်းၸႂ် လႄႈ ၸွႆႈထႅမ် ပေႃႈမႄႈၵူၼ်းမိူင်း ၸိူဝ်းဢၼ်လုၵ်ႉတၢင်း ၸေႈဝဵင်းလႃႈသဵဝ်ႈ ၊ ၸေႈဝဵင်းၵျွၵ်ႉမႄး ၊ ဝဵင်းၼမ်ႉလၼ်ႈ ၸိုင်ႈတႆးပွတ်းႁွင်ႇ သေ ပၢႆႈၽေးပၢင်တိုၵ်း မႃးသွၼ်ႈသဝ်း ယူႇဝႆႉတီႈ ဝတ်ႉၵျွင်းမုၼ်ၸဝ်ႈ ဢိူင်ႇတူင်ႇလဝ်း ၊ ဢိူင်ႇပၢင်သၵ်း ၸေႈဝဵင်းမိူင်းၵိုင်ၼၼ်ႉ ယူႇယဝ်ႉ။
ၵူၼ်းပၢႆႈၽေးသိုၵ်း ဢၼ်မႃးသွၼ်ႈသဝ်း တီႈၼႂ်းဢိူင်ႇတူင်ႇလဝ်း မီး(917)ၵေႃႉ ၊ ၼႂ်းဢိူင်ႇပၢင်သၵ်း မီး(168) ၵေႃႉ ႁူမ်ႈသဵင်ႈမီး (1085) ၵေႃႉ လႄႈ လႆႈၸွႆႈထႅမ် သၢင်ႉငိုၼ်း (2,000,000) သဝ်းသႅၼ်ၵျၢပ်ႈ ၊ ၶဝ်ႈသၢၼ်(8) ထူင်လူင် ယူႇယဝ်ႉ။
ၵူၼ်းပၢႆႈၽေး ဢၼ်ႁွတ်ႈၽႅဝ်ဝႆႉၼႂ်းၼႃႈတီႈ ဢုပ်ႉပိူင်ႇ SSPP/SSA ၵူႈၼႃႈတီႈ ၼၼ်ႉ တေႃႇထိုင် လိူၼ် ဢေႃးၵတ်ႉသ် 9 ဝၼ်း ၼႆႉ ႁူမ်ႈသဵင်ႈမီး (14,681) ၵေႃႉ လႄႈ ယူႇတီႈ ပႃႇတီႇမႂ်ႇသုင်ၸိုင်ႈတႆး ၊ တပ်ႉသိုၵ်း ၸိုင်ႈတႆး SSPP/SSA လႆႈႁပ်ႉၸွႆႈထႅမ်တူၺ်းထိုင်ပၼ် ဢွင်ႈတီႈယူႇသဝ်း ၊ လွင်ႈၵိၼ်ယႅမ်ႉ လွင်ႈႁူမ်ႇလူမ်ႈ ၸဵမ် ၸိူဝ်း ၼႆႉ ၼႂ်းၵူႈၼႃႈတီႈ ယူႇယဝ်ႉ။#shanstateprogressparty
#shanstatearmy #SSPPInfo
#ၸွႆႈထႅမ်ၵူၼ်းပၢႆႈၽေး
#ၸေႈဝဵင်းမိူင်းၵိုင်
