ဝၢႆးသေ သိုၵ်းမၢၼ်ႈယိုတ်းသိမ်းဢႃႇမႃးၼႆႉ လွင်ႈႁေႉႁၢမ်ႈ မၵ်းတတ်း ၵၢၼ်ၸႂ်ႉတိုဝ်း လႅင်းၽူင်း ၊ လႅင်းၼႅတ်ႇ လႄႈ လွင်ႈၸွပ်ႇသွၵ်ႈ ပၵ်းတႃပႂ်ႉတူၺ်း ၸိူဝ်းၼႆႉ တိူဝ်း ၼမ်မႃးလိူဝ်ၵဝ်ႇ သေ ဝဵင်းဢၼ်လႆႈ ၶၢမ်ႇထုၵ်ႇ ဢိုတ်း ပႅတ်ႈလႅင်းၼႅတ်ႇၼၼ်ႉ မီး ( 90) ၸေႈဝဵင်းပၢႆ ယူႇယဝ်ႉ။တေႇဢဝ်ၼႂ်းလိူၼ် မေႇ တေႃႇထိုင် လိူၼ်ၵျူႇလၢႆႇ ၼႂ်းၶၢဝ်းတၢင်း (3) လိူၼ်ၼႆႉ ၵူၼ်းမိူင်းဢၼ် ၸႂ်ႉလႅင်း ၼႅတ်ႇ (Online) သေ ၸိၸမ်ႈ တႅမ်ႈလၢတ်ႈ သေႉၼႄး လွင်ႈ ၶွင်ႇသီႇသိုၵ်းမၢၼ်ႈ ၸိူဝ်းၼၼ်ႉ လႆႈထုၵ်ႇ ၺႃးသိုၵ်းမၢၼ်ႈတီႉၺွပ်းၵႂႃႇ (70) ၵေႃႉႁိမ်းႁွမ်း ယူႇယဝ်ႉ။
ၼႂ်းမိူင်းႁူမ်ႈတုမ်ၼႆႉ မၢင်တီႈၵေႃႈ ထုၵ်ႇၺႃးပိၵ်ႉလႅင်းၾူၼ်း ပႅတ်ႈလုမ်းလုမ်း ၊ မၢင်တီႈ ၶျေႃႉယွမ်းပႅတ်ႈ လႅင်းၾူၼ်း ၵေႃႈမီး ၊ မၢင်တီႈ ပိုတ်ႇပၼ်လႅင်းၾူၼ်း ပိၵ်ႉလႅင်းၼႅတ်ႇပႅတ်ႈလုမ်းလုမ်းၵေႃႈမီး ယွၼ်ႉၼၼ် တႃႇၸႂ်ႉ တိုဝ်း ဝႅပ်ႉသၢႆႉ(website) ၊ တႃႇတေတူၺ်းၶၢဝ်ႇ ၊ လူ ဢၢၼ်ႇၶၢဝ်ႇ ၊ တႃႇတေၸႂ်ႉတိုဝ်း လႅင်းၼႅတ်ႇ( internet) သေ ႁဵတ်းၵၢၼ် ၸဵမ်ၸိူဝ်းၼႆႉၵေႃႈ ၵူၼ်းမိူင်း မီးလွင်ႈယၢပ်ႇၽိုတ်ႇဝႆႉ လႄႈ လၢႆးႁဵတ်းၸိူင်ႉၼႆၼႆႉ မိူၼ်ၸိူင်ႉၼင်ႇ ပိၵ်ႉႁူ ၊ ပိၵ်ႉတႃ ၊ ပိၵ်ႉသဵၼ်ႈတၢင်း ၵၢၼ်ႁႃၵိၼ်လဵင်ႉတွင်ႉ ၵူၼ်းမိူင်းၵူၺ်းၼႆ ၵူၼ်းမိူင်း ဢၼ်ယၢမ်ႈ ႁဵတ်း ၵၢၼ် သိုဝ်ႉၶၢႆၼိူဝ် (Online) ၵေႃႉၼိုင်ႈ လၢတ်ႈၼႄၼင်ႇ ၼႆ။ဢွင်ႈတီႈဢၼ် ၸုမ်းယိပ်းၵွင်ႈၵၢင်ႇ ၸၢဝ်းၶိူဝ်း တင်း ၶွင်ႇသီႇသိုၵ်းမၢၼ်ႈ ပဵၼ်ပၢင်တိုၵ်းၵၼ် မိူၼ်ၼင်ႇ မိူင်းၶျၢင်း၊ မိူင်းၶၢင်၊ မိူင်းရၶႅင်ႇ၊ မိူင်းတႆးပွတ်းႁွင်ႇ ဢၼ်ပဵၼ် ၸေႈဝဵင်းလႃႈသဵဝ်ႈ ၊ ၸေႈဝဵင်းၵျႂၵ်ႉမႄး ၊ ၸေႈဝဵင်းသီႇပေႃႉ ၊ ၸေႈဝဵင်းၼမ်ႉတူႈ ၊ ၸေႈဝဵင်းသႅၼ်ဝီ ၊ ၸေႈဝဵင်းၵူတ်ႉၶၢႆ ၸဵမ်ၸိူဝ်းၼႆႉၵေႃႈ တေႇဢဝ် ၼႂ်းႁၢင်လိူၼ် ၵျူႇလၢႆ ပူၼ်ႉမႃးၼႆႉ ထုၵ်ႉၺႃးပိၵ်ႉဢိုတ်း လႅင်းၾူၼ်းလႅင်းၼႅတ်ႇသေဢမ်ႇၵႃး ထုၵ်ႉၺႃးပိၵ်ႉဢိုတ်းပႃးၾႆးၾႃႉ လႄႈ ႁဵတ်းႁႂ်ႈၵူၼ်းမိူင်း ထူပ်းတၢင်းယၢပ်ႇၽိုတ်ႇ ၼႂ်းၵၢၼ်တိတ်း တေႃႇၵပ်းသိုပ်ႇ ဝႆႉယူႇယဝ်ႉ။
မိူဝ်ႈလဵဝ် ႁဝ်းၶႃႈၶၢတ်ႇလွင်ႈၵပ်းသိုပ်ႇတီႈႁိူၼ်းဝႆႉ ဢေႃႈ ယွၼ်ႉငဝ်းလၢႆးပၢင်တိုၵ်းသေ သဵၼ်ႈတၢင်းၵေႃႈၶၢတ်ႇ တီႈႁိူၼ်းၵေႃႈဢမ်ႇၸၢင်ႈမိူဝ်း တၢင်းႁိူၼ်းသမ်ႉ ဢမ်ႇမီးလႅင်းၽူင်းလႄႈ ငိုၼ်းၵေႃႈ ဢမ်ႇၸၢင်ႈသူင်ႇ ပၢႆးယူႇလီၵူၼ်းတၢင်းႁိူၼ်း ပဵၼ်ႁိုဝ်ၵေႃႈဢမ်ႇလႆႈႁူႉ လႃးလႃး ပႆႇၸၢင်ႈမိူဝ်းၵေႃႈ ပေႃးၵပ်းသိုပ်ႇၵၼ်လႆႈတေႉ တၢင်း ၶႅၼ်းၶႃႈဢေႃႈ ယွၼ်ႉလႅင်းၾူၼ်းပိၵ်ႉပႅတ်ႈသေ ၵပ်းသိုပ်ႇဢမ်ႇလႆႈၼႆႉ ႁၢင်ႈႁၢႆႉႁႅင်းၼႃႇ” ၼႆ ၸၢႆးၶိူဝ်း ဝဵင်းၼမ်ႉတူႈ ဢၼ်မႃးႁဵတ်းၵၢၼ် မီးဝႆႉ တီႈဝဵင်းမိူင်းသူႈ ၵေႃႉၼိုင်ႈ လၢတ်ႈၼင်ႇၼႆ။#shanstateprogressparty
#shanstatearmy
#SSPPInfo
#ၵၢၼ်တိိတ်းတေႃႇၵပ်းသိုပ်ႇ
