ယွၼ်ႉပၢင်တိုၵ်း ၼႂ်းၸိုင်ႈတႆးပွတ်းႁွင်ႇ မိူၼ်ၼင်ႇ ၼႂ်း ၸေႈဝဵင်းလႃႈသဵဝ်ႈ ၊ ၸေႈဝဵင်းၵျွၵ်ႉမႄး ၊ ၸေႈဝဵင်းသီႇ ပေႃႉ ၸဵမ်ၸိူဝ်းၼႆႉ ႁၢဝ်ႈႁႅင်းၶိုၼ်ႈမႃးထႅင်ႈ လႄႈ ပေႃႈမႄႈၵူၼ်းမိူင်း ၸိူဝ်းဢၼ်ပၢႆႈၽေး ပၢင်တိုၵ်း သေ မႃးသွၼ်ႈသဝ်းဝႆႉ ၼႂ်းၼႃႈတီႈဢုပ်ႉပိူင်ႇ SSPP/SSA ၼၼ်ႉ မီးထိုင် (10000) ၵေႃႉပၢႆ ယူႇယဝ်ႉ။
ယူႇတီႈ ၸုမ်းဢူၺ်းလီ သွင်ၸုမ်း ဢၼ်ပဵၼ် တပ်ႉသိုၵ်းတဢၢင်း (TNLA) ၊ တပ်ႉသိုၵ်းၵဝ်ႈၵၢင်ႉ (MNDAA) ႁူမ်ႈ ၸုမ်း (PDF) တင်း ၶွင်ႇသီႇသိုၵ်းမၢၼ်ႈ သိုပ်ႇပဵၼ်ပၢင်တိုၵ်းၵၼ်ႁၢဝ်ႈႁႅင်း ၼႂ်းၸေႈဝဵင်းလႃႈသဵဝ်ႈ ၊ ၵျွၵ်ႉ မႄး ၊ သီႇပေႃႉသေ မိူဝ်ႈလိူၼ် ဢေႃးၵတ်ႉသ် 4 ဝၼ်း ၼၼ်ႉ ပေႃႈမႄႈၵူၼ်းမိူင်း ၼႂ်းၸိုင်ႈတႆးပွတ်းႁွင်ႇ100 ၵေႃႉပၢႆ တိုၵ်ႉ လႆႈဢွၼ်ၵၼ်ပၢႆႈၽေးပၢင်တိုၵ်းထႅင်ႈ လႄႈ လႆႈမႃးသွၼ်ႈသဝ်းဝႆႉ တီႈငဝ်ႈငုၼ်း SSPP/SSA ထႅင်ႈ ယူႇယဝ်ႉ။
တေႃႇထိုင် မိူဝ်ႈၼႆႉ လိူၼ်ဢေႃးၵတ်ႉသ် 5 ဝၼ်း ပေႃႈမႄႈၵူၼ်းမိူင်း ၼႂ်းၸိုင်ႈတႆးပွတ်းႁွင်ႇ ဢၼ်ပၢႆႈၽေး ပၢင်တိုၵ်း သေ မႃးသွၼ်ႈသဝ်း ယူႇဝႆႉ ၼႂ်းၼႃႈတီႈ ဢုပ်ႉပိူင်ႇ SSPP/SSA ၵူႈၼႃႈတီႈ ၼႂ်းၸိုင်ႈတႆး ပွတ်းႁွင်ႇ ပွတ်း ၸၢၼ်းၼၼ်ႉ ႁူမ်ႈသဵင်ႈမီး (14,000) ၵေႃႉပၢႆလႄႈ ၵမ်ႈ ၽွင်ႈ ဢၼ်ၵႂႃႇသွၼ်ႈသဝ်းဝႆႉ ၸွမ်းႁိူၼ်းပီႈၼွင်ႉ ၽႂ်မၼ်းၵေႃႈ မီးထႅင်ႈတင်းၼမ် ယူႇယဝ်ႉ။
လွင်ႈယၢပ်ႇၽိုတ်ႇ ပေႃႈမႄႈၵူၼ်းမိူင်း ၸိူဝ်းပၢႆႈၽေးပၢင်တိုၵ်းၼၼ်ႉ ယူႇတီႈ ပႃႇတီႇမႂ်ႇသုင်ၸိုင်ႈတႆး တပ်ႉ သိုၵ်း ၸိုင်ႈတႆး SSPP/SSA လႆႈၶတ်းၸႂ် ၵွင်ႉသၢၼ်ၸွမ်း ၸုမ်းတူင်ႇဝူင်းၵူၼ်း ၊ ၸုမ်းတူင်ႇဝူင်း ၵၢၼ်မိူင်း ၸဵမ်ၸိူဝ်းၼႆႉ သေ ၸွႆႈတူၺ်းထိုင်ပၼ် လွင်ႈၵိၼ်ယႅမ်ႉ ၊ ငိုၼ်းၸႂ်ႉၸၢႆႇ ဢိၵ်ႇပႃး လွင်ႈပၢႆးယူႇလီ ၸဵမ်ၸိူဝ်း ၼႆႉ လႄႈ မိူဝ်းၼႃႈမႃးၵေႃႈ ၵႃႈၼင်ႇပွင်ပဵၼ်လႆႈ တေသိုပ်ႇတူၺ်းထိုင် ၸွႆႈထႅမ်ၵႂႃႇယူႇယဝ်ႉ။
