ၵူၼ်းမိူင်း ၼႂ်းၸေႈဝဵင်းၵုၼ်ႁဵင် ၽႃႇၺႃးမၢၵ်ႇ ဢၼ်ၸုမ်း RCSS ႁၢင်ႈဝႆႉ တီႈၼိူဝ် သဵၼ်ႈတၢင်း ဢၼ်ပေႃႈ မႄႈၵူၼ်းမိူင်း ၵႂႃႇမႃး လႄႈ ၵူၼ်းမိူင်း လူႉတၢႆ(1) ၵေႃႉ မၢတ်ႇၸဵပ်း (10) ၵေႃႉပၢႆ ၼႆယူႇယဝ်ႉ။

မိူဝ်ႈလိူၼ် ဢေႃးၵၢတ်ႉသ် 20 ဝၼ်း လိူၼ်ၵဝ်ႈလွင်ႈ(1) ၶမ်ႈ မိူဝ်ႈၶၢဝ်းယၢမ်းၵၢင်ၼႂ် 10:15 မူင်း ၼၼ်ႉ ၽူႈၸၢႆး ၵူၼ်းမိူင်း ဝၢၼ်ႈသၢႆးမူၼ်ႇ ၸေႈဝဵင်းၵုၼ်ႁဵင် သႅၼ်းဢႃႇယု 30 တေႃႇ 40 ပီႊ (3) ၵေႃႉ ၊ လုၵ်ႉတီႈ ဝၢၼ်ႈသၢႆးမူၼ်ႇ ၽွင်းတိုၵ်ႉၵႂႃႇ တီႈႁႆႈ/သူၼ် မိူဝ်ႈႁွတ်ႈၽႅဝ် ၼိူဝ်သဵၼ်ႈတၢင်းၵူၼ်းၵႂႃႇမႃး တီႈဝၢၼ်ႈႁူၺ်ႈဢေႃႈ ဢၼ်မီးၾၢႆႇဢွၵ်ႇ ဝၢၼ်ႈသၢႆးမူၼ်ႇ ၼႂ်းၵႄႈၵၢင် ဝၢၼ်ႈလၢႆးၵမ် – ဝၢၼ်ႈသၢႆးမူၼ်ႇ ၼၼ်ႉ လႆႈၽႃႇၺႃး မၢၵ်ႇ ဢၼ်ၸုမ်း RCSS ႁၢင်ႈ ၵၢင်ဝႆႉ လုၵ်ႈၼိုင်ႈ လႄႈ မၢၵ်ႇတႅၵ်ႇ တိူဝ်ႉၺႃး လႆႈလူႉတၢႆ (1)ၵေႃႉ၊မၢတ်ႇၸဵပ်းၸွမ်း (2)ၵေႃႉ ၼႆယူႇယဝ်ႉ။ ဝၢႆးသေမၢၵ်ႇတႅၵ်ႇယဝ်ႉ မိူဝ်ႈၶၢဝ်းယၢမ်းၵၢင်ဝၼ်း 12 မူင်းၼၼ်ႉ ၵူၼ်းဝၢၼ်ႈသၢႆးမူၼ်ႇ ဢွၼ်ၵၼ် ဢၢၼ်းၵႂႃႇ ဢဝ် ၵူၼ်းမၢတ်ႇၸဵပ်း ဢၼ်ၺႃးၸၢၵ်ႇမၢၵ်ႇၼၼ်ႉ ၼႆသေ လႆႈၶိုၼ်းၵႂႃႇၽႃႇၺႃး မၢၵ်ႇထႅင်ႈ လုၵ်ႈၼိုင်ႈ လႄႈ တႅၵ်ႇ တိူဝ်ႉၺႃး ၵူၼ်းဝၢၼ်ႈသၢႆးမူၼ်ႇ လႆႈတၢင်းမၢတ်ႇၸဵပ်းထႅင်ႈ ၼၢင်းယိင်း(10) ၵေႃႉ ၊ ၽူႈၸၢႆး(6) ၵေႃႉ ႁူမ်ႈသဵင်ႈၵူၼ်းလႆႈတၢင်းမၢတ်ႇၸဵပ်း မီး(18) ၵေႃႉ ၊ လႆႈသူင်ႇယူတ်းယႃတူဝ်ဝႆႉ တီႈႁူင်းယႃ ဝဵင်းၶူဝ်လမ် (13) ၵေႃႉ ၊ ယူတ်းယႃတီႈဝၢၼ်ႈသၢႆးမူၼ်ႇ (5) ၵေႃႉ ယူႇယဝ်ႉ။

“ၸႂ်ႈၶႃႈဢေႃႈ မၢၵ်ႇၼႆႉ တႅၵ်ႇ(2) လုၵ်ႈၶႃႈ မိူဝ်ႈၶဝ် လုၵ်ႉတီႈသူၼ်သေ မႃးၼႂ်းဝၢၼ်ႈ မိူဝ်ႈဝၼ်းၽိတ်ႈ တင်း ဝၼ်းသိၼ် ၼၼ်ႉ တေႉ ဢမ်ႇမီးမၢၵ်ႇၶႃႈ ဝၢႆးသိၼ် ၼိုင်ႈဝၼ်း ဝၼ်းလိူၼ်ၵဝ်ႈလွင်ႈ (႑) ၶမ်ႈ မိူဝ်ႈၶိုၼ်း လုၵ်ႉတီႈဝၢၼ်ႈသေ ၶိုၼ်းၵႂႃႇတီႈသူၼ်ၼၼ်ႉဢေႃႈ ၺႃးမၢၵ်ႇတႅၵ်ႇသႂ်ႇ တႅၵ်ႇမိူဝ်ႈၸဝ်ႉ ၼိုင်ႈလုၵ်ႈ မိူဝ်ႈၵၢင်ဝၼ်း မိူဝ်ႈၵူၼ်းဝၢၼ်ႈ ၵႂႃႇႁပ်ႉဢဝ်ၵူၼ်းမၢတ်ႇၼၼ်ႉ ၺႃးထႅင်ႈၼိုင်ႈလုၵ်ႈၶႃႈ ဢေႃႈ။ တၢင်းမူတ်း တိူဝ်ႉ(19) ၵေႃႉ တၢႆ(1) ၵေႃႉ မၢတ်ႇ (18) ၵေႃႉၶႃႈဢေႃႈ။ ႁဝ်းၶႃႈၶႆႈတုၵ်း ယွၼ်းတေႉ သိုၵ်း ၸုမ်းလႂ်ၵေႃႈယဝ်ႉ မဵဝ်းဢၼ်တေပဵၼ်ၽေးတေႃႇ ၵူၼ်းမိူင်းၼႆႉ ဢမ်ႇၶႆႈႁႂ်ႈႁဵတ်းၶႃႈ ႁဝ်းၶႃႈၵူၼ်းမိူင်းၼႆႉ လူဝ်ႇၶဝ်ႈ လူဝ်ႇငိုၼ်း ၵေႃႈ လႆႈၸွႆႈပၼ် ပွင်ႇဝႃႈ လဵင်ႉၶဝ်ႈၽၵ်း ၵိၼ်သေ သမ်ႉၶိုၼ်း ႁၢင်ႈမၢၵ်ႇႁဵတ်းႁၢႆႉၼိူဝ် သၢႆၸႂ်ႁဝ်း ၶႃႈၼႆႉ ထိုင်ၸႂ်တေႉယူႇၶႃႈ”။ ၼႆ ၵူၼ်းမိူင်းပိုၼ်ႉတီႈ ဝၢၼ်ႈသၢႆးမူၼ်ႇ ဢၼ်ဢမ်ႇၶႆႈဢွၵ်ႇၸိုဝ်ႈ ၵေႃႉၼိုင်ႈလၢတ်ႈ ၼႄၼင်ႇၼႆ။

မိူဝ်ႈပူၼ်ႉမႃး ၼႂ်းလိူၼ် ၵျူၼ်ႇ 2 ဝၼ်းၼၼ်ႉ ယူႇတီႈ သင်ႇၶႃႇၸဝ်ႈ ၊ ပေႃႈမႄႈၵူၼ်းမိူင်း ၼႂ်းဢိူင်ႇၽႃလၢႆး ၊ ဢိူင်ႇမိူင်းပဵင်း ၊ ဢိူင်ႇပႃၶီး ၊ ဢိူင်ႇလၢႆးသၢၵ်ႇ ၊ ဢိူင်ႇၼႃးပုင်ႇ ၸေႈဝဵင်းႁူဝ်ပူင်း ၊ ၼႂ်းဢိူင်ႇၵဵင်းၶမ်း ၊ ဢိူင်ႇမိူင်းလၢင်း ၊ ဢိူင်ႇမိူင်းယွၼ်း ၊ ဢိူင်ႇၵျွၵ်ႉၵူႇ ၊ ဢၢင်ႇတေႃး ၼႂ်းၸေႈဝဵင်းလွၵ်ႉၸွၵ်ႇ မီးၽိုၼ်လိၵ်ႈ တုၵ်းယွၼ်းထိုင် ၵူႈမူႇ ၊ ၵူႈၸုမ်း ၊ ၵူႈၵေႃႉ ႁႂ်ႈၵိုတ်းယိုတ်းပၼ် လွင်ႈၵေႃႇၵၢၼ်ႁၢႆႉ ၵၢၼ် ႁၢင်ႈမၢၵ်ႇတႅၵ်ႇ ၼႆသေ တႃႉ ယူႇတီႈၾၢႆႇ RCSS ဢမ်ႇယွမ်း ၵိုတ်းယိုတ်းသေဢမ်ႇၵႃး ဢမ်ႇဝူၼ်ႉသွၼ်ႇပႃးလွင်ႈႁူမ်ႇလူမ်ႈ ပေႃႈမႄႈၵူၼ်းမိူင်း လႄႈ လႄႇႁႃ ႁၢင်ႈၵၢင်မၢၵ်ႇပႃး ၸွမ်းသဵၼ်ႈတႃႈသၢႆတၢင်း ဢၼ်ပေႃႈမႄႈၵူၼ်းမိူင်းၵႂႃႇမႃးပႆ ၸိူဝ်းၼၼ်ႉယူႇယဝ်ႉ။#shanstateprogressparty

#shanstatearmy

#SSPPInfo

#မၢၵ်ႇတႅၵ်ႇ

#RCSS