ယိူင်းဢၢၼ်းႁႂ်ႈပဵၼ်ဝၼ်းမၢႆတွင်း ဝၼ်းၵေႃႇတင်ႈပႃႇတီႇမႂ်ႉသုင်ၸိုင်ႈတႆး SSPP ၶွပ်ႈၶူပ်ႇ (53) ပီႊ ၼႆ သေ ယူႇတီႈ ႁွင်ႈၵၢၼ် ပၢႆးပၺ်ႇၺႃႇ ႁူင်းႁဵၼ်းၼေႃႈတႅၼ်းၶိူဝ်း ဢွၼ်ႁူဝ် ၸတ်းႁဵတ်း ပၢင်ၶေႉၶဵင်ႇ လဵၼ်ႈႁႅင်း ပွၵ်ႈၵမ်း (2) (ပီႊ 2024 ၼီႊ) ဢွင်ႈတီႈ ဝၢင်းမၢၵ်ႇၼင်ႁူင်းႁဵၼ်း ၼေႃႇတႅၼ်းၶိူဝ်း ငဝ်ႈငုၼ်း SSPP/SSA ဝဵင်းမႂ်ႇဝၢၼ်ႈႁႆး ၸိုင်ႈတႆးပွတ်း ၸၢၼ်း ၼႆယူႇယဝ်ႉ။
ပၢင်ၶႄႉၶဵင်ႇလဵၼ်ႈႁႅင်း ၼႂ်းဝၼ်းမၢႆတွင်း ၶွပ်ႈၶူပ်ႇ(53) ပီႊ SSPP ၼႆႉ တေႇၸတ်းႁဵတ်းမႃး မိူဝ်ႈလိူၼ်ဢေႃး ၵၢတ်ႉသ် (11) ဝၼ်း တေႃႇထိုင် လိူၼ်ဢေႃးၵၢတ်ႉသ် (16) ဝၼ်းသေ ၼႂ်းၼၼ်ႉ မီးလုၵ်ႈႁဵၼ်းၼေႃႇ တႅၼ်း ၶိူဝ်း ၶေႉၶဵင်ႇလဵၼ်ႈႁႅင်း ပိတ်ႉမၢၵ်ႇၼင်လွမ်ႈ ၊ ပိတ်ႉမၢၵ်ႇသွင်းဝၢႆ ၶေႉၶဵင်ႇ လႅၼ်ႈဝႆး၊ လႅၼ်ႈပုတ်ႈမိုဝ်း ၊ ဝႅၼ်သုင် ၸဵမ် ၸိူဝ်းၼႆႉ ယူႇယဝ်ႉ။
မိူဝ်ႈဝၼ်းတေႇ ပၢင်လဵၼ်ႈႁႅင်းၼၼ်ႉ မီးၸဝ်ႈႁၢၼ် ဢွင်ႇမျႃႉ ၽူႈဢွၼ်ႁူဝ်ၾၢႆႇလဵၼ်ႈႁႅင်း မွၵ်ႇလၢတ်ႈၶေႃႈၵႂၢမ်း ပိုတ်ႇပၢင်ပွႆး လဵၼ်ႈႁႅင်း ၊ တိုၵ်းသူၼ်းပၼ်ႁႅင်းၸႂ် တီႈလုၵ်ႈႁဵၼ်း သေ ၼင်ႇႁိုဝ် လုၵ်ႈႁဵၼ်း ၼေႃႇတႅၼ်းၶိူဝ်း ပေႃးတေ ဢမ်ႇလူင်လိုမ်း ၵၢၼ်မိူင်းဢၼ်ပူၼ်ႉမႃး ၸိူဝ်း ၼၼ်ႉ ၼႆလႄႈ ၶုၼ်ႁၢၼ် ႁၢၼ်ႇထုၼ်း လႆႈလူ ဢၢၼ်ႇ ၼႄ ယိူင်းဢၢၼ်း ပၢင်လဵၼ်ႈႁႅင်း ၼႂ်းဝၼ်းမၢႆတွင်း ၶွပ်ႈၶူပ်ႇ (53) ပီႊ SSPP ၼၼ်ႉၵႂႃႇယူႇယဝ်ႉ။
ယိူင်းၸူး ဝၼ်းၶွပ်ႈၶူပ်ႇ ပႃႇတီႇမႂ်ႇသုင်ၸိုင်ႈတႆး SSPP သေ ထိုင်မႃး မိူဝ်ႈၼႆႉ လိူၼ်ဢေႃးၵတ်ႉသ် 16 ဝၼ်း ၶၢဝ်းယၢမ်း ဝၢႆးဝၼ်း 16:00 မူင်းၼၼ်ႉ တီႈႁူင်းႁဵၼ်း ၼေႃႇတႅၼ်းၶိူဝ်း လႆႈၸတ်းႁဵတ်းပႃး ပၢင်ၵႅဝ်ႈ တွၼ်ႈသူး လုၵ်ႈ ႁဵၼ်း ၶေႉၶဵင်ႇလဵၼ်ႈႁႅင်း လႄႈ ၽူႈယႂ်ႇၵူၼ်းလူင် မွၵ်ႇလၢတ်ႈၶေႃႈၵႂၢမ်း ၊ လိူဝ်သေၼၼ်ႉ တီႈလၵ်းသဝ် ႁိၼ် SSPP တီႈဢိူင်ႇၶုမ်ႇပၢင်ၼၼ်ႉၵေႃႈ ယူႇတီႈ ႁူင်းႁဵၼ်းၽူႈမီးၸၼ်ႉ ၊ ႁွင်ႈၵၢၼ်လုမ်းၵူၼ်းၼုမ်ႇ ၊ လုမ်း မၢၵ်ႈမီး လႆႈႁူမ်ႈၵၼ် လူႇတၢၼ်းၶူဝ်းလူႇ တီႈသၢင်ႇၶႃႇၸဝ်ႈ ၊ ၵၢပ်ႈသွမ်း သၢင်ႇၶႃႇၸဝ်ႈ ၸဵမ်ၸိူဝ်းၼႆႉၵႂႃႇ ယူႇယဝ်ႉ။
ၼႂ်းပၢင်ၵႅဝ်ႈဢၼ်ၸတ်းႁဵတ်းတီႈႁူင်းႁဵၼ်း ၼေႃႇတႅၼ်း ၶိူဝ်း ၼၼ်ႉ မီးၸဝ်ႈသိုၵ်းလူင် သႅင်ႁၢၼ် မွၵ်ႇလၢတ်ႈၶေႃႈ ၵႂၢမ်း ပိုတ်ႇပၢင်ၵႅဝ်ႈ လႄႈ တိုၵ်းသူၼ်း လုၵ်ႈႁဵၼ်း ႁႂ်ႈမေႃ ၽွမ်ႉသဵင်ပဵင်းပၢၵ်ႇၵၼ် ၊ ၸဝ်ႈႁၢၼ်သီႇႁ ၽူႈၵွၼ်းႁွင်ႈ ၵၢၼ်ပၢႆးပၺ်ႇၺႃႇ မွၵ်ႇလၢတ်ႈၶေႃႈၵႂၢမ်း သပ်းလႅင်းၼႄ လွင်ႈလႆႈၸတ်းႁဵတ်း ပၢင်ၶႄႉၶဵင်ႇ လဵၼ်ႈႁႅင်း ၊ ပိုၼ်းပႃႇတီႇမႂ်ႇသုင်ၸိုင်ႈတႆး ၊ ၸဝ်ႈႁၢၼ် ဢွင်ႇလႅင်း ၽူႈဢွၼ်ႁူဝ် ၾၢႆႇလဵၼ်ႈႁႅင်း မွၵ်ႇလၢတ်ႈၶေႃႈၵႂၢမ်း သပ်းလႅင်းၼႄ ၽွၼ်းလီၾၢႆႇ လဵၼ်ႈႁႅင်း ၊ တိုၵ်းသူၼ်းထိုင် လုၵ်ႈႁဵၼ်း ႁႂ်ႈၶတ်းၸႂ် ႁႂ်ႈပဵၼ်မႃး ၽူႈလဵၼ်ႈႁႅင်းၵတ်ႉၶႅၼ်ႇ ၸဵမ်ၸိူဝ်းၼႆႉယူႇယဝ်ႉ။
ဝၢႆးသေၼၼ်ႉ ယူႇတီႈၽူႈယႂ်ႇၵူၼ်းလူင် လႆႈတွၼ်ႈသူးပၼ် ၸုမ်းလဵၼ်ႈႁႅင်း တေႇသူးထီႉ(1) တေႃႇထိုင် သူး လဝ်ႇၸႂ် လႄႈ ယူႇတီႈ ၶုၼ်သိုၵ်းလူင် မိူင်းထုၼ်း ၵႅမ်ၽူႈ ၵွၼ်းႁွင်ႈၵၢၼ်ပၢႆးပၺ်ႇၺႃႇ မွၵ်ႇလၢတ်ႈၶေႃႈၵႂၢမ်း တိုၵ်းသူၼ်း ႁႂ်ႈၵူၼ်းၼုမ်ႇ ႁဝ်းၶႃႈတၢင်းသဵင်ႈ ၵၢင်းယၢၼ်ၽေး ယႃႈမဝ်းၵမ် သေ လူပ်းလင်ပၢင်ၵႅဝ်ႈ ဢွင်ႇမၢၼ်ယဝ်ႉတူဝ်ႈၵႂႃႇ ၶၢဝ်း ယၢမ်း 17:40 မူင်း ၼၼ်ႉယူႇယဝ်ႉ။
#shanstateprogressparty
#shanstatearmy
#SSPPInfo
#ဝၼ်းၵိူတ်ႇပႃႇတီႇမႂ်ႇသုင်ၸိုင်ႈတႆး
