ငဝ်ႈငုၼ်း ပႃႇတီႇမႂ်ႇသုင်ၸိုင်ႈတႆး တပ်ႉသိုၵ်းၸိုင်ႈတႆး ဢွၼ်ႁူဝ်ၼမ်းၼႃႈသေ ၸတ်းႁဵတ်းပၢင်ၵႅဝ်ႈ ဝၼ်းၵူၼ်းၼုမ်ႇလုမ်ႈၾႃႉ လႄႈ တွၼ်ႈသူး ၽူႈဢွင်ႇပူၼ်ႉၸၼ်ႉသုင် ဢွင်ႈတီႈႁူင်းႁေႃးလူင် ဝၢၼ်ႈႁႆး ၸေႈဝဵင်းၵေးသီး မီးၵူၼ်းၶိုၼ်ႈႁွတ်ႈ ၼပ်ႉႁူဝ်ပၢၵ်ႇ။

ဝၼ်းထီႉ-12 လိူၼ်ဢေႃးၵၢသ်ႉ 2024 ယၢမ်းၵၢင်ၼႂ်း 9 မူင်း တေႃႇ 12 မူင်း ၼၼ်ႉ ယူႇတီႈၵေႃႇမတီႇ ပၢႆးပိင်ႇၺႃႇငဝ်ႈငုၼ်း ဢွၼ်ႁူဝ်ၸတ်းႁဵတ်းပၢင်ၵႅဝ်ႈ ဝၼ်းၵူၼ်းၼုမ်ႇလုမ်ႈၾႃႉသေ ၼႂ်းၼၼ်ႉ လႆႈၸတ်းပၢင်တွၼ်ႈသူး လုၵ်ႈႁဵၼ်းဢၼ်ဢွင်ႇ ၸၼ်ႉသိပ်း ၸၼ်ႉ 12 ၊ ၸိူဝ်းပဵၼ်ၽူႈႁၢပ်ႇၵၢၼ် ၼႂ်းၵူႈတပ်ႉၵူႈႁွင်ႈၵၢၼ် လႄႈ မၢႆတွင်း ဝၼ်းၶွပ်ႊထူၼ်ႈ ပၢႆးပိင်ႇၺႃႇ ၵုၼ်ပၢင်ၵုၼ်ၶူင်း ဢၼ်လႆႈ ပူၵ်းပွင်မႃး ၶွပ်ႈတဵမ် 10 ပီႊ မီးၵူၼ်းၶိုၼ်ႈႁွတ်ႈ ပၢင်ၵႅဝ်ႈ 500 ပၢႆ ယူႇယဝ်ႉ။

ၸဝ်ႈႁၢၼ်သီႇႁ ၽူႈၵွၼ်းႁွင်ႈၵၢၼ် ၽၢႆႇပၢႆးပိင်ႇၺႃႇ ငဝ်ႈငုၼ်း SSPP/SSA – သပ်းလႅင်းၼႄဝႃႈ ဢၼ်ႁဝ်းၶႃႈ ၸတ်းႁဵတ်းမၢႆတွင်း ဝၼ်းၶူပ်ႈၶွပ်ႇ 10 ပီႊ ပၢႆးပိင်ႇၺႃႇၼႆႉ ႁဝ်းၶႃႈလႆႈမၵ်းမၼ်ႈဢဝ်မႃး ဢၼ်လႆႈပူၵ်းပွင်ပၢႆးပိင်ႇၺႃႇၵုၼ်ပၢင်ၵုၼ်ၶူင်း တီႈဢၼ်ႁူင်းႁဵၼ်းလူင်ပွင်ၸိုင်ႈဢမ်ႇႁွတ်ႈထိုင်လႆႈ ၸိူဝ်းၼႆႉယူႇၶႃႈ- ပၢႆးပိင်ႇၺႃႇ ဢၼ်ငဝ်ႈငုၼ်းႁဝ်းၶႃႈ ဢွၼ်ႁူဝ်ႁဵတ်းသၢင်ႈမႃးတႄႉၵေႃႈႁိုင်ယဝ်ႉၶႃႈ ၵူၺ်းၵႃႈ တီႈၵုၼ်ပၢင်ၵုၼ်ၶူင်းၼႆႉ ပၢႆးပိင်ႇၺႃႇ ႁူင်းႁဵၼ်းလူင်ပွင်ၸိုင်ႈ တိုၼ်းဢမ်ႇထိုင်မႃးသေဢိတ်း ၊ယူႇတီႈ ႁူဝ်ပဝ်ႈလူင် ၸင်ႇလႆႈပၼ်သုၼ်ႇလႆႈပုၼ်ႈၽွၼ်း ၸဝ်ႈႁိၼ်သႅင် ဢွၼ်ႁူဝ်ပူၵ်းပွင် ၽိုၵ်းၽွၼ်ႉ ၵိူတ်ႇဢွၵ်ႇမေႃသွၼ် လႄႈ ပိုတ်ႇၽုၺ်ႇႁူင်းႁဵၼ်း ပႃးၸဵမ်ငိုၼ်းၵမ်ႉၸွႆႈမေႃသွၼ်ၸိူဝ်းၼႆႉ ယူႇတီႈ ငဝ်ႈငုၼ်း SSPP/SSA ႁဝ်းၶႃႈဢဝ်ပုၼ်ႈၽွၼ်းသေ ပူၵ်းပွင်ပၢႆးပိင်ႇၺႃႇ ၶၢဝ်းတၢင်းမီးမႃး သိပ်းပီႊၼႆ လႄႈ ႁဝ်းၶႃႈ ၸင်ႇလႆႈႁဵတ်းတီႈမၢႆတွင်း တွၼ်ႈသူၼ်းၼမ်ႉၸႂ် ဢၼ်ဢွင်ႇပူၼ်ႉၸၼ်ႉသုင်ၸိူဝ်းၼႆႉယူႇ ၶႃႈဢေႃႈ ဝႃႈၼႆ။

ၼႂ်းပၢင်ၵႅဝ်ႈၼၼ်ႉ ၽူႈယႂ်ႇၵူၼ်းလူင် ငဝ်ႈငုၼ်းပႃႇတီႇမႂ်ႇသုင်ၸိုင်ႈတႆး မွၵ်ႇလၢတ်ႈၶေႃႈၵႂၢမ်း ပၼ်ႁႅင်း ၸုမ်းပွင်ၵၢၼ်ပၢႆးပိင်ႇၺႃႇ ၼင်ႇႁိုဝ် ပၢႆးပိင်ႇၺႃႇ ၵူၼ်းၼုမ်ႇ ၵူၼ်းမိူင်းႁဝ်း ပေႃးတေၶိုၼ်ႈယႂ်ႇမႃး လႄႈ မီးပႃးပၢင်တၢၼ်ႈၶႆႈ ၵဵဝ်ႇလူၺ်ႈႁူဝ်ၶေႃႈ ၵူၼ်းၼုမ်ႇလႄႈ တူင်ႇဝူင်းၵူၼ်း ဢိၵ်ႇပႃး ၵႃႈၶၼ်ပၢႆးပိင်ႇၺႃႇ ၸိူဝ်းၼႆႉသေ သိုပ်ႇတွၼ်ႈသူးလုၵ်ႈႁဵၼ်းဢွင်ႇပူၼ်ႉၸၼ်ႉသုင်ၵႂႃႇယူႇယဝ်ႉ။

တီႈၼႂ်းပၢင်ၵႅဝ်ႈၼႆႉ လႆႈတွၼ်ႈပၼ်သူး ၵူၼ်းၼုမ်ႇဢၼ်ဢွင်ႇပူၼ်ႉၸၼ်ႉသုင် တႃႇ 150 ၵေႃႉသေ ၵဵဝ်ႇလူၺ်ႈၵၢၼ်တွၼ်းသူးၼမ်ႉၸႂ် လုၵ်ႈႁဵၼ်းပွၵ်ႈၵမ်းၼႆႉ ပဵၼ်ပွၵ်ႈဢွၼ်တင်းသုတ်း လႄႈ ၸိူဝ်းဢၼ် တွပ်ႇဝႆႉၽိုၼ်တၢင်ႇယိုၼ်ႈ တူၵ်းလိုၼ်းၵေႃႈမီး ၸိူဝ်းဢၼ်ၶေႃႈမုၼ်းၽိုၼ်တၢင်ႇယိုၼ်ႈ ဢမ်ႇတဵမ်ထူၼ်ႈ ၸွမ်းၼင်ႇတႅပ်းတတ်းဝႆႉၵေႃႈမီးၼႆ လႄႈ ၼင်ႇႁိုဝ်တေပဵၼ်ႁႅင်းၸႂ် လုၵ်ႈႁဵၼ်းပေႃးတေသိုပ်ႇၶတ်းၸႂ် ႁႂ်ႈဢွင်ႇပူၼ်ႉၸၼ်ႉသုင်လႆႈၼၼ်ႉ မီးယိူင်းသေ တေသိုပ်ႇၶတ်းၸႂ်ႁဵတ်းသၢင်ႈၵႂႃႇၵူႈပီႊပီႊယူႇယဝ်ႉ ဝႃႈၼႆ။#shanstateprogressparty

#shanstatearmy

#SSPPInfo

#ႁွင်ႈၵၢၼ်ပၢႆႈပိင်ႇၺႃႇsspp

#တွၼ်ႈသူးလုၵ်ႈႁဵၼ်း