ၸုမ်းၵေႃႊႁူမ်ႈမိုဝ်းပွင်ၵၢၼ် ဢၼ်ပဵၼ် မုၵ်ႉၸုမ်းတီႇမူဝ်ႇၶရေႇၸီႇၸၢဝ်းၶိူဝ်းတႆး SNLD လႄႈ ပႃႇတီႇမႂ်ႇသုင် ၸိုင်ႈတႆး SSPP ႁူမ်ႈၵၼ်သေ ၸွႆႈထႅမ်ၵူၼ်းပၢႆႈၽေး ပၢင်တိုၵ်း တီႈၼႂ်းၸေႈဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ ၼႆယူႇယဝ်ႉ။
မိူဝ်ႈလိူၼ်ၵျူႇလၢႆႇ 7 ဝၼ်း ဢၼ်ပဵၼ် မုၵ်ႉၸုမ်း ၵေႃႊႁူမ်ႈမိုဝ်းပွင်ၵၢၼ် SNLD လႄႈ SSPP လႆႈလူင်းပိုၼ်ႉ တီႈ ၸွႆႈထႅမ် ၵူၼ်းပၢႆႈၽေးပၢင်တိုၵ်း ၼႂ်းၸေႈဝဵင်းၵျွၵ်ႉမႄး လၢႆလၢႆတီႈ ၊ မိူၼ်ၼင်ႇ တီႈဝတ်ႉၵျွင်း ပုင်ႇဝူဝ်း ဢိူင်ႇၼွင် ၵႂၢင် ႁူဝ်ၼပ်ႉၵူၼ်းပၢႆႈၽေး မီး (1200) ၵေႃႉၼၼ်ႉ လႆႈၸွႆႈထႅမ် ၶဝ်ႈသၢၼ် (100) ထူင် ၊ ၼမ်ႉမၼ်း (30) ပုင်း ၊ ၶႆႇၵႆႇ (10) ၽႃႇ ၊ ၽွင်ဝၢၼ် (50) ထုၵ်ႈ ၊ ငိုၼ်း (100) သႅၼ်ၵျၢပ်ႈ လႄႈ မိူၼ်ၼင်ႇ တီႈဝတ်ႉၵျွင်း ဝၢၼ်ႈ ၵုၼ် ႁႅၼ် ဢိူင်ႇၼွင်ၵႂၢင် ႁူဝ်ၼပ်ႉၵူၼ်းပၢႆႈၽေး မီး (359) ၵေႃႉ လႆႈၸွႆႈထႅမ် ၶဝ်ႈသၢၼ် (30) ထူင် ၊ ၼမ်ႉမၼ်း (10) ပုင်း ၊ ၶႆႇၵႆႇ (3) ၽႃႇ ၊ ၽွင်ဝၢၼ် (15) ထုၵ်ႈ ၊ ငိုၼ်း (25) သႅၼ် ၵျၢပ်ႈ ယူႇယဝ်ႉ။
.
လိူဝ်သေၼၼ်ႉ မိူၼ်ၼင်ႇ တီႈဝတ်ႉၵျွင်းဝၢၼ်ႈၼႃးသွင်း ဢိူင်ႇႁၢႆးၵုၺ် ႁူဝ်ၼပ်ႉၵူၼ်းပၢႆႈၽေး မီး (260) ၵေႃႉ ၼၼ်ႉ လႆႈၸွႆႈထႅမ် ၶဝ်ႈသၢၼ် (20) ထူင် ၊ ၼမ်ႉမၼ်း (6) ပုင်း ၊ ၶႆႇၵႆႇ(2) ၽႃႇ ၊ ၽွင်ဝၢၼ် (10) ထူင် ၊ ငိုၼ်း (15) သႅၼ် ၼႆယူႇယဝ်ႉ။
ၼႂ်းၸေႈဝဵင်းၵျွၵ်ႉမႄး ၼႆႉ ယွၼ်ႉပၢင်တိုၵ်း 10 27 ပွၵ်ႈၵမ်းသွင် ဢၼ်တေႇပဵၼ်မႃး မိူဝ်ႈလိူၼ်ၵျူၼ်ႇ 25 ဝၼ်း တေႃႇထိုင်ယၢမ်းလဵဝ်ၼႆႉသေ ႁဵတ်းႁႂ်ႈမၢၵ်ႇလူင် တူၵ်းတိူဝ်ႉၺႃး ႁိူၼ်းၵူၼ်းမိူင်း လႄႈ တိူဝ်ႉၺႃး ပေႃႈ မႄႈၵူၼ်းမိူင်း ၵမ်ႈၽွင်ႈ လႆႈမၢတ်ႇၸဵပ်း လူႉတၢႆ ၊ လႆႈဢွၼ်ၵၼ် ၸုၼ်ႉပွႆႇပႅတ်ႈ ႁိူၼ်းယေး တိူၵ်ႇႁႆႊ လွၵ်းၼႃး လႄႈ လႆႈ ဢွၼ်ၵၼ် ပၢႆႈၽေးပၢင်တိုၵ်း ၵႂႃႇသွၼ်ႈသဝ်းဝႆႉ တီႈဝတ်ႉ ၵျွင်းမုၼ်ၸဝ်ႈ ၊ တီႈႁိူၼ်းပီႊၼွင်ႉၽႂ်မၼ်း ၸဵမ်ၸိူဝ်း ၼႆႉ ယူႇယဝ်ႉ။
