ၵေႃႊႁူမ်ႈမိုဝ်းပွင်ၵၢၼ် ႁူမ်ႈၵၼ် လူင်းပိုၼ်ႉတီႈ တူၺ်းထိုင် ပၼ်ႁႅင်းၸႂ် လႄႈ ၸွႆႈထႅမ်ပေႃႈမႄႈၵူၼ်းမိူင်း ၸိူဝ်းပၢႆႈၽေး ပၢင်တိုၵ်း ဢၼ်ႁွတ်ႈၽႅဝ်ဝႆႉ ၼႂ်းၸေႈဝဵင်းမၢႆ (39) လၢႆးၶႃႈ ၸိုင်ႈတႆးပွတ်းၸၢၼ်းၼၼ်ႉ ၼႆ ယူႇယဝ်ႉ။

မိူဝ်ႈလိူၼ်ၵျူႇလၢႆႇ 29 ဝၼ်း ယူႇတီႈၸုမ်း ၵေႃႊႁူမ်ႈမိုဝ်းပွင်ၵၢၼ် ဢၼ်ပႃးဝႆႉ ၽူႈမီးပုၼ်ႈၽွၼ်း ၾၢႆႇတပ်ႉ ၾၢႆႇ ဢုပ်ႉပိူင်ႇ ပႃႇတီႇမႂ်ႇသုင်ၸိုင်ႈတႆး ၊ တပ်ႉသိုၵ်းၸိုင်ႈတႆး ၸေႈတွၼ်ႈမၢႆ (15) ၸေႈဝဵင်းမၢႆ(39) ပႃႇတီႇမႂ်ႇ သုင်ၸိုင်ႈတႆး တပ်ႉသိုၵ်းၸိုင်ႈတႆး SSPP/SSA လႄႈ ပေႃႈမႄႈ ၵူၼ်းမိူင်း ဢိူင်ႇမိူင်းယၢႆး ဢိၵ်ႇပႃး ၸုမ်းပႃႇတီႇႁူဝ်သိူဝ် (SNLD) ႁူမ်ႈမိုဝ်းၵၼ်သေ လႆႈလူင်း ႁူပ်ႉထူပ်း ပၼ်ႁႅင်းၸႂ် လႄႈ ၸွႆႈထႅမ် ပေႃႈမႄႈ ၵူၼ်းမိူင်း ၸိူဝ်းပၢႆႈၽေးပၢင်တိုၵ်း ဢၼ်လုၵ်ႉတၢင်း ၸိုင်ႈတႆးပွတ်း ႁွင်ႇ ပၢႆႈမႃး သွၼ်ႈသဝ်း ယူႇဝႆႉတီႈ ၵျွင်းၶရိတ်ႉယၢၼ်ႇ ၊ ဝတ်ႉၵျွင်း ၵုင်းၼိမ် ၊ ဝတ်ႉၵျွင်းၵမ်ႇမထၢၼ်း ၊ ႁူင်းႁေႃးဝၢၼ်ႈႁူဝ်ၽၢႆ ၊ ႁူင်းႁေႃးဝၢၼ်ႈၽူၺ်းႁႆး ၼႂ်းၸေႈဝဵင်းလၢႆးၶႃႈ ၸဵမ်ၸိူဝ်းၼႆႉ ယူႇယဝ်ႉ။

ပေႃႈမႄႈၵူၼ်းမိူင်း ၸိူဝ်းပၢႆႈၽေးပၢင်တိုၵ်း ၼၼ်ႉ လင် ႁိူၼ်းႁူမ်ႈ မီး (181) လင် ႁူဝ်ၵူၼ်းႁူမ်ႈသဵင်ႈ မီး (803) ၵေႃႉ လႄႈ လႆႈၸွႆႈထႅမ်ၵႂႃႇ မိူၼ်ၼင်ႇ ၶဝ်ႈသၢၼ် (22) ထူင် ၊ ၼမ်ႉမၼ်း (10) ၽႃႇ ၊ ၽွင်ဝၢၼ် (2) ထူင်လူင် ၊ ၵိူဝ် (2) ထူင်လူင် ၸဵမ်ၸိူဝ်းၼႆႉ ယူႇယဝ်ႉ။ဢိင်ၼိူဝ်ငဝ်းလၢႆး ၵၢၼ်သိုၵ်း/ပၢင်တိုၵ်း ပဵၼ်ယူႇႁၢဝ်ႈႁႅင်း ပွတ်းႁွင်ႇၼႆႉသေ ပေႃႈမႄႈၵူၼ်းမိူင်းႁဝ်း ၵူႈ တီႈၵူႈတၢင်း ၼႂ်းၸိုင်ႈတႆးပွတ်းႁွင်ႇ လႆႈဢွၼ်ၵၼ် ပၢႆႈၽေးသိုၵ်း ၵႂႃႇလၢႆတီႈ လၢႆတၢင်း လႄႈ တေႃႇထိုင် လိူၼ် ၵျူႇလၢႆႇ 31 ဝၼ်း ၼၼ်ႉ သဵၼ်ႈမၢႆၵူၼ်းပၢႆႈၽေး ဢၼ်ႁွတ်ႈၽႅဝ်ဝႆႉ ၼႂ်းၼႃႈတီႈဢုပ်ႉပိူင်ႇ SSPP/SSA မီးယူႇ (17,471) ၼိုင်ႈမိုၼ်ႇ ၸဵတ်းႁဵင် သီႇပၢၵ်ႇၸဵတ်းသိပ်းဢဵတ်းၵေႃႉ ယူႇယဝ်ႉ။

ၼင်ႇႁိုဝ် တေၸွႆႈထႅမ်လႆႈ ပေႃႈမႄႈ ၵူၼ်းမိူင်း ၸိူဝ်းပၢႆႈ ၽေး/ထူပ်းၽေးပၢင်တိုၵ်းၼႆသေ မိူဝ်ႈပူၼ်ႉမႃး လိူၼ် ၵျူႇလၢႆႇ 10 ဝၼ်းၼၼ်ႉၵေႃႈ ယူႇတီႈ ငဝ်ႈ ငုၼ်း SSPP/SSA သေ လႆႈဢွၵ်ႇလိၵ်ႈပိုၼ်ၽၢဝ်ႇ တုၵ်း သူၼ်းထိုင် လွင်ႈၵၢၼ် ၸွႆႈထႅမ် ၵူၼ်းမိူင်းပၢႆႈၽေးသိုၵ်း ၸဵမ်ၸိူဝ်းၼႆႉ ယူႇယဝ်ႉ။#shanstateprogressparty #shanstatearmy

#SSPPInfo

#ပႃႇတီႇမႂ်ႇသုင်ၸိုင်ႈတႆး

#ၸွႆႈထႅမ်ၵူၼ်းပၢႆႈၽေး

#ၵေႃႊႁူမ်ႈမိုဝ်းပွင်ၵၢၼ်