သၢႆသိုၵ်းၶိုၵ်ႉတွၼ်း ၾၢႆႇၵူတ်ႇမူၺ်ႉမၢၵ်ႇ ၼႂ်းပႃႇတီႇမႂ်ႇသုင်ၸိုင်ႈတႆး တပ်ႉသိုၵ်းၸိုင်ႈတႆး SSPP/SSA လူင်း ၵူတ်ႇမူၺ်ႉမၢၵ်ႇ ဢၼ်ၸုမ်း ၶွင်ႇသီႇဢဝ်ၶိုၼ်းၸိုင်ႈတႆး RCSS ႁၢင်ႈၵၢင်ဝႆႉ ၼႂ်းၸေႈဝဵင်းလၢႆးၶႃႈ လႄႈ ၸေႈဝဵင်းလွၵ်ႉ ၸွၵ်ႇ ၸိုင်ႈတႆးပွတ်းၸၢၼ်း ၼၼ်ႉသေ ယိုတ်းသိမ်းလႆႈ မၢၵ်ႇဢၼ်ပႆႇတႅၵ်ႇ (6) လုၵ်ႈ ၼႆယူႇ ယဝ်ႉ။
မိူဝ်ႈၼႆႉ လိူၼ်ၵျူၼ်ႇ 24 ဝၼ်း ၶၢဝ်းယၢမ်း ၵၢင်ၼႂ် 11:50 မူင်း မိူဝ်ႈသၢႆသိုၵ်းၶိုၵ်ႉတွၼ်း SSPP/SSA လူင်းၵူတ်ႇထတ်းၼႂ်းပိုၼ်ႉတီႈၼၼ်ႉ မီးပေႃႈမႄႈၵူၼ်းမိူင်း ၸွႆႈပွင်ႇၶၢဝ်ႇပၼ် လူင်ႈၼႃႈ လႄႈ သၢႆသိုၵ်း SSPP/SSA လႆႈၶဝ်ႈၵူတ်ႇထတ်းႁၼ် မၢၵ်ႇဢၼ် ၵူၼ်းသိုၵ်း RCSS ႁၢင်ႈၸပ်း ၶူဝ် တီႈဢၼ်ၵူၼ်းမိူင်း ၵႆႉၵႂႃႇမႃးပႆ ႁိမ်းဝၢၼ်ႈလုၵ်း ဢိူင်ႇ ႁၢႆးသႅင် ၸေႈဝဵင်းလၢႆးၶႃႈ ၼၼ်ႉသေ ယိုတ်းသိမ်းလႆႈ မၢၵ်ႇဢၼ်ပႆႇတႅၵ်ႇ (3) လုၵ်ႈ ယူႇယဝ်ႉ။
ၼႂ်းဝၼ်းလဵဝ်ၼႆႉၵူၺ်း ၶၢဝ်းယၢမ်း ၵၢင်ၼႂ် 08:09 မူင်း မိူဝ်ႈၽွင်းသၢႆသိုၵ်း ၶိုၵ်ႉတွၼ်း SSPP/SSA တိုၵ်ႉဢဝ် ႁူမ်ႇလူမ်ႈ ၵူတ်ႇထတ်းမၢၵ်ႇမႅင်း ၾၢႆႇဢွၵ်ႇ ဝၢၼ်ႈလၢႆးၶႃႈ ဢိူင်ႇမိူင်းပဵင်း ၸေႈဝဵင်းလွၵ်ႉၸွၵ်ႇၼၼ်ႉ လႆႈၽႃႇ ၺႃးၵၼ် တင်း ၵူၼ်းႁၢင်ႈမၢၵ်ႇ ၾၢႆႇ RCSS သေ သွင်ၾၢႆႇ လႆႈပဵၼ်ပၢင်တိုၵ်း ပိုတ်းယိုဝ်းၵၼ် ၶၢဝ်းတၢင်းႁိုင် မွၵ်ႈ (5) ပႅၵ်ႉ (မိၼိတ်ႉ) ၼႆယူႇယဝ်ႉ။
ဝၢႆးသေ သဵင်ၵွင်ႈသဵင်မၢၵ်ႇယဵၼ်ယဝ်ႉ လႆႈသိုပ်ႇၵူတ်ႇထတ်းတူၺ်း ႁိမ်းႁွမ်း ၸိူဝ်းဢၼ်ပဵၼ် ပၢင်တိုၵ်းၼၼ်ႉ လႄႈ လႆႈထူပ်းႁၼ် မၢၵ်ႇဢၼ်ပႆႇတႅၵ်ႇ ထႅင်ႈ(3) လုၵ်ႈယူႇယဝ်ႉ။
![](https://ssppssa.org/file/2024/06/1000309900-1024x1024.png)
ၼႂ်းလိူၼ်ၵျူၼ်ႇၼႆႉၵူၺ်း ယူႇတီႈ ၾၢႆႇ RCSS ႁၢင်ႈမၢၵ်ႇသႂ်ႇ သၢႆသိုၵ်း SSPP/SSA ၼႆႉ မီး(10) ပွၵ်ႈ ၊ ဢၼ် တႅၵ်ႇတိူဝ်ႉၺႃးၵူၼ်းမိူင်း ထိုင်တီႈတိၼ်ပုတ်း ပဵၼ်တုၶိတ မီး (1) ပွၵ်ႈ ၊ ၵူၼ်းမိူင်း လႆႈမၢတ်ႇၸဵပ်း ႁၢဝ်ႈႁႅင်း(1) ပွၵ်ႈ လႄႈ လိူဝ်သေၼၼ်ႉ တႅၵ်ႇတိူဝ်ႉၺႃး ၸၢၵ်ႈထႆသူၼ် ၊ လူတ်ႉၶိူင်ႈ ၵူၼ်းမိူင်း လႆႈလူႉၵွႆၸွမ်း ယူႇယဝ်ႉ။