ၸုမ်းၶွင်ႇသီႇဢဝ်ၶိုၼ်းၸိုင်ႈတႆး RCSS လုၵ်ႉဢဝ်ၼႂ်းၼႃႈတီႈ သိုၵ်းၵူၼ်းမိူင်း ၵႃလိ သေ ၶၢမ်ႈၼမ်ႉပၢင် မႃးၸၼ်မၢၵ်ႇသႂ်ႇ သၢႆသိုၵ်း SSPP/SSA ၼႂ်းၸေႈဝဵင်း မိူင်းၼွင် ၸိုင်ႈတႆးပွတ်းၸၢၼ်း။
မိူဝ်ႈဝႃး လိူၼ်ၵျူၼ်ႇ 21 ဝၼ်း ၶၢဝ်းယၢမ်းၵၢင်ၼႂ် 08:30 မူင်းၼၼ်ႉ ၸုမ်း RCSS လုၵ်ႉတၢင်းၼႃႈတီႈ သိုၵ်း ၵူၼ်းမိူင်း ၸေႈဝဵင်းၵႃလိ သေ ၶီႇပေး ၶၢမ်ႈၼမ်ႉပၢင် မႃးႁၢင်ႈမၢၵ်ႇသွတ်ႉသႂ်ႇ သၢႆသိုၵ်း SSPP/SSA တီႈႁၢင်ၼႃး လူင်ၵဵင် ၼိူဝ်သဵၼ်ႈတၢင်း လုၵ်ႉၸေႈဝဵင်းၼမ်ႉၸၢင် ၵႂႃႇတႃႈသၢမ်ပူး ၼႂ်းၸေႈဝဵင်းမိူင်းၼွင် ၸိုင်ႈတႆး ပွတ်းၸၢၼ်း မၢၵ်ႇတႅၵ်ႇတိူဝ်ႉၺႃး ၵူၼ်းသိုၵ်း လႆႈမၢတ်ႇၸဵပ်းၸွမ်း ၵေႃႉၼိုင်ႈ လႄႈ လူတ်ႉၵႃး လူႉၵွႆၸွမ်းၵမ်ႈ ၽွင်ႈ ၼႆယူႇယဝ်ႉ။
ၼႂ်းဝၼ်းလဵဝ်ၼႆႉၵူၺ်း မိူဝ်ႈၶၢဝ်းယၢမ်း ၵၢင်ၼႂ် 11:55 မူင်းၼၼ်ႉ ၵူၼ်းသိုၵ်း RCSS ႁၢင်ႈမၢၵ်ႇသွတ်ႉသႂ်ႇ ၵူၼ်းမိူင်းပိုၼ်ႉတီႈ ဢၼ်ပဵၼ် ပူႇၵႄႇ ဝၢၼ်ႈပၢင်ႇပႅင်ႈ(မၢၵ်ႇလၢင်း) ၼႂ်းဢိူင်ႇမိူင်းယၢင်း ၸေႈဝဵင်း မိူင်းၼွင် ၼၼ်ႉသေ တူဝ်ပူႇၵႄႇ လႆႈတၢင်းမၢတ်ႇၸဵပ်းၸွမ်း ႁၢဝ်ႈႁႅင်း ယူႇယဝ်ႉ။
လိူဝ်သေၼၼ်ႉ မိူဝ်ႈၶၢဝ်းယၢမ်း ၵၢင်ဝၼ်း 12:00 မူင်း မိူဝ်ႈၽွင်း သၢႆသိုၵ်း SSPP/SSA ၵူတ်ႇထတ်းၼႃႈတီႈ ၼိူဝ်သဵၼ်ႈတၢင်း လုၵ်ႉဢဝ် ဝၢၼ်ႈၼႃးၸၢမ် ၵႂႃႇတၢင်း ဝဵင်းလွၵ်ႉၸွၵ်ႇ ၼႂ်းၸေႈဝဵင်းလွၵ်ႉၸွၵ်ႇၼၼ်ႉ ၵူတ်ႇထတ်း ႁၼ်ပႃး မၢၵ်ႇဢၼ်ပႆႇတႅၵ်ႇထႅင်ႈ (15) လုၵ်ႈ ယူႇယဝ်ႉ။
ၼႂ်းလိူၼ် ၵျူၼ်ႇ၊ ပီႊ2024 ၼႆႉၵူၺ်း ၾၢႆႇ RCSS ၶိုၼ်ႈလေႃႇတိုၵ်း တပ်ႉပၢင်သဝ်း SSPP/SSA မီးမႃး (2) ပွၵ်ႈ ၊ ဢၼ်ၸႂ်ႉ မၢၵ်ႇမႅင်းႁၢင်ႈၵၢင်သေတိုၵ်း မီးထိုင် (8) ပွၵ်ႈ ၊ ဢၼ်တႅၵ်ႇၺႃးတူဝ်သတ်းလဵင်ႉၵူၼ်းမိူင်း မီး (1) ပွၵ်ႈ ၊ ဢၼ်တႅၵ်ႇၺႃးၵူၼ်းမိူင်း မီး(2) ပွၵ်ႈ ၊ ဢၼ်တႅၵ်ႇၺႃး ၸၢၵ်ႈထႆၵူၼ်းမိူင်း လူႉၵွႆ (1) ပွၵ်ႈ ၊ ဢၼ်တႅၵ်ႇၺႃး လူတ်ႉၶိူင်ႈၵူၼ်းမိူင်း လူႉၵွႆ မီး(1) ပွၵ်ႈ ၊ ယူႇတီႈပေႃႈမႄႈ ၵူၼ်းမိူင်း ၸွႆႈပွင်ႇၶၢဝ်ႇပၼ် လႄႈ ၾၢႆႇ ၵူတ်ႇမူၺ်ႉမၢၵ်ႇ လႆႈလူင်းၵူတ်ႇမူၺ်ႉ သိမ်းလႆႈ မၢၵ်ႇမႅင်းဢၼ်ႁၢင်ႈဝႆႉသေ ပႆႇတႅၵ်ႇၼၼ်ႉ ၵေႃႈ ဢမ်ႇယွမ်း (20) လုၵ်ႈပၢႆ ယူႇယဝ်ႉ။
