RCSS ပွႆႇသိုၵ်းမူၵ်းဝႆႉၼႂ်း ၼႂ်းဢိူင်ႇပၢင်သၵ်း ၸေႈဝဵင်းမိူင်းၵိုင် လႄႈ လႆႈၽႃႇၺႃး သၢႆသိုၵ်းၾၢႆႇႁူမ်ႇလူမ်ႈ SSPP/SSA သေ သွင်ၾၢႆႇ လႆႈပိုတ်းယိုဝ်းပဵၼ်ပၢင်တိုၵ်းၵၼ် ၸူဝ်ႈၵႅပ်ႉ ၊ ၾၢႆႇပႃႇတီႇမႂ်ႇသုင်ၸိုင်ႈတႆး တပ်ႉသိုၵ်းၸိုင်ႈတႆး SSPP/SSA ယိုတ်းသိမ်းလႆႈ မၢၵ်ႇၵွင်ႈ တင်း ၶိူင်ႈၶူဝ်းသိုၵ်း ၵမ်ႈၽွင်ႈ ယူႇယဝ်ႉ။
မိူဝ်ႈဝႃး ဝၼ်းထီႉ 12/ 06 / 2024 ယၢမ်းၵၢင်ၼႂ် ၽွင်းသၢႆသိုၵ်းတူင်ႉၼိုင် SSPP/SSA တူင်ႉၼိုင်ၵႂႃႇမႃး ဢဝ်ႁူမ်ႇလူမ်ႈၼႃႈတီႈ ယူႇၼႂ်းပိုၼ်ႉတီႈၼၼ်ႉ လႆႈၽႃႇၺႃး သၢႆသိုၵ်း RCSS ဢၼ်မႃးမူၵ်းယူႇဝႆႉ ၾၢႆႇၸၢၼ်း ဝၢၼ်ႈၽွင်းသႅင် ဢိူင်ႇပၢင်သၵ်း ၾၢႆႇတူၵ်းဝၢၼ်ႈတူင်ႇလၢဝ်း ၸေႈဝဵင်းမိူင်းၵိုင် လႄႈ သွင်ၾၢႆႇလႆႈပိုတ်းယိုဝ်းၵၼ် တၢင်းႁိုင် မွၵ်ႈ 15 ပႅၵ်ႉ သေ ၾၢႆႇ RCSS လႆႈထွႆဢွၵ်ႇၵႂႃႇၼႂ်းတီႈ ဢၼ်ပဵၼ် ပၢင်တိုၵ်းၼၼ်ႉ ယူႇယဝ်ႉ။
ၼႂ်းဝၼ်းလဵဝ်ၵူၺ်းၼင်ႇၵဝ်ႇ မိူဝ်ႈၶၢဝ်းယၢမ်း ၵၢင်ဝၼ်း 14:15 မူင်း မႅၼ်ႈၽွင်းလူတ်ႉၵႃးတၢင်ႇသၢႆသိုၵ်း SSPP/SSA ဢွၵ်ႇတူင်ႉၼိုင် ၵူတ်ႇထတ်း ၸွမ်းသဵၼ်ႈတႃႈသၢႆ တၢင်း ႁိမ်းႁွမ်း ဝၢၼ်ႈၼွင်ပၢတ်ႇ ဢိူင်ႇမိူင်းယွၼ်း ၸေႈဝဵင်း မိူင်းၵိုင်ၼၼ်ႉ ထုၵ်ႇၺႃး သိုၵ်း RCSS သွတ်ႉမၢၵ်ႇသႂ်ႇ (3) လုၵ်ႈ ႁဵတ်းႁႂ်ႈ မီးလွင်ႈတုမ်ႉတိူဝ်ႉ ၵႃးလူႉလႅဝ်ၵမ်ႈၽွင်ႈ လႄႈ ၸၢၵ်ႇမၢၵ်ႇၽၢတ်ႈတိူဝ်ႉၺႃး ၶႃၵူၼ်းသိုၵ်းၵေႃႉ ၼိုင်ႈ လႆႈတၢင်းမၢတ်ႇၸဵပ်းၸွမ်း ယူႇယဝ်ႉ။
ၵဵဝ်ႇလူၺ်ႈ လွင်ႈလၢႆးႁဵတ်းသၢင်ႈ RCSS လၵ်ႉလွမ်မူၵ်းတိုၵ်း ႁၢင်ႈမၢၵ်ႇၸိူဝ်းၼႆႉ ပွင်ႇဝႃႈ တိုၼ်းၶႂ်ႈသၢင်ႈ ႁႂ်ႈပဵၼ်မႃးပၢင်တိုၵ်းၶိုၼ်းၵူၺ်း သေ ယူႇတီႈ ၾၢႆႇ SSPP/SSA ၶတ်း ၸႂ်ၵုမ်းထိင်း ယႃႇႁႂ်ႈၵိူတ်ႇၶိုၼ်ႈပဵၼ်မႃးပၢင်တိုၵ်းသေတႃႉ ၾၢႆႇၼိုင်ႈသမ်ႉ ႁဵတ်းလၢႆး လၵ်ႉလွမ်မူၵ်းတိုၵ်းယူႇၶိူဝ်းယႂ်ႇ လႄႈ သင်ဝႃႈ ဢမ်ႇဝႄႈလွတ်ႈ လႆႈပဵၼ်ပၢင်တိုၵ်းမႃးၸိုင် တိုၼ်းဢမ်ႇၸႂ်ႈပုၼ်ႈၽွၼ်း ၽၢႆႇ SSPP/SSA ယူႇယဝ်ႉ။
