ၸုမ်းၾၢႆႇပၢႆးယူႇလီ ပႃႇတီႇမႂ်ႇသုင်ၸိုင်ႈတႆး တပ်ႉသိုၵ်းၸိုင်ႈတႆး SSPP/SSA ႁူမ်ႈတင်း ၾၢႆႇဢုပ်ႉပိူင်ႇ ၵူႈ ၸၼ်ႉ ၸၼ်ႉ ၼႂ်းၸေႈတွၼ်ႈမၢႆ(15) လူင်းတူၺ်းထိုင်ပၼ်ပၢႆးယူႇလီ လႄႈ လုၵ်ႈႁဵၼ်း ဢိၵ်ႇပႃး ပေႃႈမႄႈ ၵူၼ်းမိူင်း ၼႂ်းပိုၼ်ႉတီႈ ၸေႈဝဵင်းမိူင်းၵိုင် ၸိုင်ႈတႆးပွတ်းၸၢၼ်း ၼႆယူႇယဝ်ႉ။
မိူဝ်ႈလိူၼ်ၵျူၼ်ႇ 24 ဝၼ်း တေႃႇထိုင် 25 ဝၼ်း ၶၢဝ်းတၢင်းသွင်ဝၼ်းၼၼ်ႉ ၸုမ်းၾၢႆႇပၢႆးယူႇလီ SSPP/SSA ၼႂ်းၸေႈတွၼ်ႈမၢႆ(15) ႁူမ်ႈတင်း ၾၢႆႇဢုပ်ႉပိူင်ႇ ၵူႈ ၸၼ်ႉၸၼ်ႉ လႆႈလူင်း ပိုၼ်ႉတီႈ တူၺ်းထိုင်ပၼ်ပၢႆးယူႇလီ တီႈလုၵ်ႈႁဵၼ်း ၊ မေႃသွၼ် ဢိၵ်ႇပႃးပေႃႈမႄႈၵူၼ်းမိူင်း တီႈဝၢၼ်ႈ သႃးတေႃး ၊ ဝၢၼ်ႈတူၼ်ႈၵႅင်း ၊ ဝၢၼ်ႈၼမ်ႉ ၵတ်း ၊ ဝၢၼ်ႈပၢင်ႇလေႃႉ ၊ ဝၢၼ်ႈၽၵ်းႁီႉ ဢိူင်ႇတူင်ႇလဝ်း ၸေႈဝဵင်းမိူင်းၵိုင် သေ လႆႈလဵင်ႉလူပႃး တၢင်းၵိၼ် (ဢႁႃႇရ) ဢၼ်မီး ဢဵၼ်ႁႅင်း တီႈ လုၵ်ႈႁဵၼ်းၶဝ် ၵႂႃႇယူႇယဝ်ႉ။
ယွၼ်ႉဝႃႈ ပၢႆးယူႇလီၼႆႉ ပဵၼ်ဢၼ်လမ်ႇလွင်ႈသုတ်း တႃႇၵူၼ်းႁဝ်း လႄႈ ၼင်ႇႁိုဝ်တေပဵၼ် တႃႇၵမ်ႉၸွႆႈလႆႈ ပၢႆးယူႇလီပေႃႈမႄႈၵူၼ်မိူင်းၼၼ်ႉ ယူႇတီႈငဝ်ႈငုၼ်း SSPP/SSA သေ လႆႈၵိူတ်ႇၶိုၼ်ႈမႃး ၸုမ်းမေႃယႃ ၊ ဢွင်ႈ တီႈဢၼ်ၵႆႁူင်းယႃၸိူဝ်းၼၼ်ႉၵေႃႈ လႆႈႁဵတ်းသၢင်ႈ ပိုတ်ႇပၼ် ႁူင်းယႃ ၊ လႆႈၸွႆႈထႅမ်ယူတ်းယႃပၼ် ပေႃႈမႄႈ ၵူၼ်းမိူင်း လူၺ်ႈၼမ်ႉၸႂ် ၸေႇတၼႃႇ ၸဵမ်ၸိူဝ်းၼႆႉ လႄႈ ၼႂ်းတွၼ်ႈၵၢၼ် ပူၵ်းပွင်ပၼ် ၾၢႆႇပၢႆးယူႇလီၼႆႉ ၼိုင်ႈၶူပ်ႇပီႊလႂ် လႆႈၸႂ်ႉတိုဝ်းငိုၼ်း (5000) သႅၼ် တေႃႇ (10000) သႅၼ်ယူႇၼႆ ၵႅမ်ၽူႈၵွၼ်းႁွင်ႈၵၢၼ် ၾၢႆႇပၢႆး ယူႇလီ ငဝ်ႈငုၼ်း SSPP/SSA လၢတ်ႈၼႄ ၼင်ႇၼႆ။
