ၸုမ်းၾၢႆႇပၢႆးပၺ်ႇၺႃႇ ၼႂ်းဢိူင်ႇမၢႆ(8) သၢႆးၶၢဝ် ၸေႈဝဵင်းမၢႆ(18) ၼမ်ႉတူႈ ၸတ်းႁဵတ်းပွႆးလူင်းပၢင်သွၼ်လိၵ်ႈ တႆးၶၢဝ်းမႆႈ လႄႈ တွၼ်ႈသူးလုၵ်ႈႁဵၼ်းၵတ်ႉၶႅၼ်ႇ တီႈႁူင်းႁဵၼ်းသွၼ်လိၵ်ႈတႆး ၼႂ်းဢိူင်ႇသၢႆးၶၢဝ် ၸေႈဝဵင်း ၼမ်ႉတူႈ ၸိုင်ႈတႆးပွတ်းႁွင်ႇ။
မိူဝ်ႈလိူၼ်မေႇ 30 ဝၼ်းၼၼ်ႉ ယူႇတီႈ ၸုမ်းၾၢႆႇပၢႆးပၺ်ႇ ၺႃႇ ၵေႃႊလိၵ်ႈလၢႆးလႄႈၾိင်ႈငႄႈတႆး ၸုမ်းၾၢႆႇ ဢုပ်ႉပိူင်ႇ ပႃႇတီႇမႂ်ႇသုင်ၸိုင်ႈတႆး တပ်ႉသိုၵ်းၸိုင်ႈတႆး SSPP/SSA ႁူမ်ႈၵၼ်သေ လႆႈၸတ်းႁဵတ်း ပွႆးလူင်း လိုဝ်ႈပၢင်သွၼ်လိၵ်ႈတႆးၶၢဝ်းမႆႈ လႄႈ တွၼ်ႈသူးလုၵ်ႈႁဵၼ်းၵတ်ႉ ၶႅၼ်ႇ ဢွင်ႈတီႈ ႁူင်းႁဵၼ်း ၸူဝ်ႈၶၢဝ်း ဢိူင်ႇ သၢႆးၶၢဝ် ၸေႈဝဵင်းၼမ်ႉတူႈ ၊ ၼႂ်းၼၼ်ႉ မီးၸုမ်းမေႃသွၼ် ၊ ႁူဝ်ပဝ်ႈၵေႃႊလိၵ်ႈလၢႆးၾိင်ႈငႄႈတႆးဝဵင်းၼမ်ႉတူႈ ၊ ၾၢႆႇၵေႃႇမတီႇဢိူင်ႇ ပႃႇတီႇမႂ်ႇသုင်ၸိုင်ႈတႆး တပ်ႉသိုၵ်းၸိုင်ႈတႆး SSPP/SSA ၊ ၸုမ်းလုၵ်ႈႁဵၼ်း ၊ ပေႃႈမႄႈ လုၵ်ႈႁဵၼ်းၶဝ် ႁူမ်ႈၵၼ်ၶိုၼ်ႈႁွတ်ႈ (100 ) ၵေႃႉပၢႆ ယူႇယဝ်ႉ။
တီႈပွႆးလူင်းပၢင်သွၼ်ၼၼ်ႉ ၸုမ်းလုၵ်ႈႁဵၼ်း ႁူမ်ႈႁွင်ႉၵႂၢမ်း “ၵုင်ႇမုၼ်လိၵ်ႈလၢႆး” သေ ပိုတ်ႇပၢင် ၊ ႁူဝ်ပဝ်ႈ ၵေႃႊလိၵ်ႈလၢႆး ၾိင်ႈငႄႈတႆး မွၵ်ႇလၢတ်ႈၶေႃႈၵႂၢမ်း ပၼ်ႁႅင်းလုၵ်ႈႁဵၼ်း ၊ တၢင်တူဝ် ပႃႇတီႇမႂ်ႇသုင်ၸိုင်ႈတႆး သေ ၽူႈမီးပုၼ်ႈၽွၼ်း ၵေႃႇမတီႇဢိူင်ႇ ၵေႃႉၼိုင်ႈ မွၵ်ႇလၢတ်ႈ ၶေႃႈၵႂၢမ်း ပၼ်ႁႅင်းၸႂ်လုၵ်ႈႁဵၼ်း ပၼ်ႁႅင်းၸႂ် မေႃသွၼ် တိုၵ်းသူၼ်းပၼ် ၵၢၼ်ပၢႆးပၺ်ႇၺႃႇ လိၵ်ႈလၢႆးတႆး ႁႂ်ႈသိုပ်ႇၵႂႃႇလႆႈ မိူဝ်းၼႃႈၶၢဝ်းယၢဝ်း ၊ တၢင်တူဝ် မေႃသွၼ် တင်းသဵင်ႈသေ မေႃသွၼ်လူင် ၼၢင်းမျႃႉထူၺ်း မွၵ်ႇလၢတ်ႈ ၶေႃႈၵႂၢမ်း ငိၼ်းၸူမ်းထိုင် ၽူႈၶိုၼ်ႈ ႁွတ်ႈ လႄႈ ၽူႈယႂ်ႇ ၵူၼ်းလူင် သပ်းလႅင်း ပၼ်ပိုၼ်းႁူႉၵၢၼ်ပၢႆးပိင်ႇၺႃႇ ၊ တွၼ်ႈသူးလုၵ်ႈႁဵၼ်းၵတ်ႉၶႅၼ်ႇ ၊ လုၵ်ႈႁဵၼ်း မူၼ်ႈၸႂ်ပၼ် တၢင်းၵႃႈဝွၵ်းလၢႆလၢႆႁူဝ် ၊ လုၵ်ႈႁဵၼ်းႁူမ်ႈၵၼ် ၵၢၼ်ႇတေႃးၸုမ်းမေႃသွၼ် ၊ လုၵ်ႈ ႁဵၼ်းႁူမ်ႈမေႃသွၼ် ဢဝ်တၢင်းၽဵင်း “လိၵ်ႈလၢႆး” မူၼ်ႈၸႂ်ပၼ်သေ ပိုၼ်ၽၢဝ် ပၢင်ပွႆး ဢွင်ႇမၢၼ်ယဝ်ႉတူဝ်ႈၵႂႃႇ လီငၢမ်းယူႇ ယဝ်ႉ။
တႃႇပူၵ်းပွင် ၵၢၼ်ပၢႆးပၺ်ႇၺႃႇ ၵူႈၼႃႈတီႈဢုပ်ႉပိူင်ႇ ပႃႇတီႇမႂ်ႇသုင်ၸိုင်ႈတႆး တပ်ႉသိုၵ်းၸိုင်ႈ တႆး SSPP/SSA ႁႂ်ႈပေႃးၶိုၼ်ႈယႂ်ႇ ႁိူဝ်ႈႁိူင်းမႃးၼၼ်ႉ ယူႇတီႈႁွင်ႈၵၢၼ်ပၢႆးပၺ်ႇၺႃႇငဝ်ႈငုၼ်း ပႃႇတီႇမႂ်ႇသုင်ၸိုင်ႈတႆး လႆႈၶတ်း ၸႂ် ပူၵ်းပွင်ပၼ်မႃး ၸုမ်းမေႃသွၼ် ၊ ႁူင်းႁဵၼ်း လႄႈ ၵမ်ႉထႅမ်ပၼ်ငိုၼ်းလိူၼ်မေႃသွၼ် ၸဵမ်ၸိူဝ်းၼႆႉသေ ၼိုင်ႈၶူပ်ႇပီႊလႂ် ငိုၼ်းၸႂ်ႉတိုဝ်း တႃႇပူၵ်း ပွင်ၵၢၼ်ပၢႆးပၺ်ႇၺႃႇ ၼၼ်ႉ လႆႈၸႂ်ႉတိုဝ်းယူႇ (5000) သႅၼ် တေႃႇ ထိုင်(7000) သႅၼ် ယူႇယဝ်ႉ။
