ၵူၼ်းသိုၵ်း ၶွင်ႇသီႇဢဝ်ၶိုၼ်းၸိုင်ႈတႆး RCSS ႁၢင်ႈမၢၵ်ႇတိုၵ်းယိုဝ်းသႂ်ႇ လူတ်ႉၵႃး သၢႆသိုၵ်းပႃႇတီႇမႂ်ႇသုင် ၸိုင်ႈတႆး တပ်ႉသိုၵ်းၸိုင်ႈတႆး SSPP/SSA ပဵၼ်ပွၵ်ႈၵမ်း(7) ၼႂ်းၸေႈဝဵင်းလွၵ်းၸွၵ်ႇ ၸိုင်ႈတႆးပွတ်းၸၢၼ်း ၊ မၢၵ်ႇ တႅၵ်ႇ တိူဝ်ႉၺႃးလူတ်ႉၵႃး လူႉၵွႆၸွမ်းၵမ်ႈၽွင်ႈ ၼႆယူႇယဝ်ႉ။
မိူဝ်ႈလိူၼ် မေႇ 28 ဝၼ်း ၶၢဝ်းယၢမ်းဝၢႆးဝၼ်း 3:00 မူင်း ၼၼ်ႉ ၵူၼ်းသိုၵ်း RCSS တဵၵ်းမၢၵ်ႇ တႅၵ်ႇသႂ်ႇ လူတ်ႉ ၵႃး သၢႆသိုၵ်း SSPP/SSA တီႈၼႂ်းၵႄႈၵၢင် ဝၢၼ်ႈၼွင်ႁဵဝ်း လႄႈ ဝၢၼ်ႈမွၵ်ႇၸလီ ဢိူင်ႇမိူင်းယွၼ်း ၸေႈဝဵင်း လွၵ်းၸွၵ်ႇၸိုင်ႈတႆးပွတ်းၸၢၼ်း သေ ၸၢၵ်ႇမၢၵ်ႇသဵၼ်တိူဝ်ႉၺႃး လူတ်ႉၵႃး လူႉၵွႆၸွမ်းၵမ်ႈၽွင်ႈ ၼႆယူႇယဝ်ႉ။
မိူၼ်ၼင်ႇ SSPP တင်း RCSS ၼႆႉ မိူဝ်ႈပူၼ်ႉမႃး ၼႂ်းပီႊ 2023 ၼီႊ ၊ လိူၼ် ၼူဝ်ႊဝိၼ်ႇပိူဝ်ႊ ၊ 29 ဝၼ်း ၼၼ်ႉ ယူႇတီႈၸုမ်းတၢင်တူဝ် ငဝ်ႈငုၼ်း / ငဝ်ႈၸိုင်ႈ သွင်ၾၢႆႇ လႆႈႁူပ်ႉထူပ်း ဢုပ်ႇဢူဝ်းၵၼ်သေ တူၵ်းလူင်းလႆႈၸႂ် ၵိုတ်းတိုၵ်းၵၼ်ပဵၼ်တၢင်းၵၢၼ်ၵႂႃႇ လႄႈ ႁူမ်ႈၵၼ် ဢွၵ်ႇလိၵ်ႈပိုၼ်ၽၢဝ်ႇ ၵိုတ်းတိုၵ်းၵၼ် ၵႂႃႇယူႇယဝ်ႉ။
ဝၢႆးသေ သွင်ၾၢႆႇလႆႈၸႂ်တူၵ်းလူင်းၵိုတ်းတိုၵ်းၵၼ်ယဝ်ႉ ၼၼ်ႉ ၾၢႆႇ RCSS ၶိုၼ်းတေႇ မူၵ်းတိုၵ်း ၊ ႁၢင်ႈမၢၵ်ႇ တိုၵ်း သၢႆသိုၵ်း SSPP/SSA မိူဝ်ႈၼႂ်းပီႊ 2024 ၊ လိူၼ်မၢတ်ႉ ၼၼ်ႉ (1) ပွၵ်ႈ ၊ လိူၼ် မေႇၼႆႉ (6) ပွၵ်ႈ ႁူမ်ႈ သဵင်ႈမီးထိုင် (7) ပွၵ်ႈ ယူႇယဝ်ႉ။
ယွၼ်ႉပိူဝ်ႈ ႁၼ်ထိုင်ၵၢၼ်ၽွမ်ႉႁူမ်ႈပဵၼ်ယႂ်ႇ လႄႈ တေႃႇထိုင်ယၢမ်းၼႆႉၵေႃႈ ယူႇတီႈ SSPP/SSA သေ ဢမ်ႇ ပႆႇဢဝ်ၵၢၼ်သိုၵ်း တုမ်ႉတွပ်ႈတိုၵ်းယိုဝ်းၶိုၼ်း ၊ ဢမ်ႇပႆႇလႆႈ ႁၢင်ႈႁႅၼ်း ႁႅင်းသိုၵ်းလေႃႇတိုၵ်းၸူး မုၵ်ႉၸုမ်း RCSS လႃးလႃး တိုၵ်ႉပဵၼ်ၸုမ်း RCSS ၸွမ်းႁၢင်ႈမၢၵ်ႇ မူၵ်းတိုၵ်း SSPP/SSA ၾၢႆႇလဵဝ်ၵူၺ်း ယူႇယဝ်ႉ။
