ၽူႈမီးပုၼ်ႈၽွၼ်း ၾၢႆႇဢုပ်ႉပိူင်ႇ ပႃႇတီႇမႂ်ႇသုင်ၸိုင်ႈတႆး တပ်ႉသိုၵ်းၸိုင်ႈ SSPP/SSA ၸိူဝ်းဢၼ်ပၵ်းသဝ်း တူင်ႉ ၼိုင် ဝႆႉ ၼႂ်းၼႃႈတီႈဢုပ်ႉပိူင်ႇၸေႈဝဵင်းမၢႆ (19) သီႇပေႃႉ ၸေႈတွၼ်ႈမၢႆ(11) ၼၼ်ႉ လူင်းႁူပ်ႉထူပ်း မေႃ သွၼ် လႄႈ လုၵ်ႈႁဵၼ်း ၼႂ်းႁူင်းႁဵၼ်းပၢင်သွၼ် လိၵ်ႈတႆးၶၢဝ်းမႆႈ ၼႆယူႇယဝ်ႉ။
မိူဝ်ႈလိူၼ်မေႇ 2 ဝၼ်း ၼၼ်ႉ ၽူႈမီးပုၼ်ႈၽွၼ်းၾၢႆႇဢုပ်ႉပိူင်ႇ SSPP/SSA ၼႂ်းၼႃႈတီႈ ၸေႈဝဵင်းမၢႆ(19) သီႇ ပေႃႉ လႆႈဢွၼ်ႁူဝ် ၵေႃႉသိုၵ်းၵေႃႉႁၢၼ် ၼႂ်းတပ်ႉဢုပ်ႉပိူင်ႇ (12) ၵေႃႉသေ လူင်းႁူပ်ႉထူပ်း ပၼ်ႁႅင်းၸႂ် မေႃ သွၼ် လႄႈ လုၵ်ႈႁဵၼ်း တီႈႁူင်းႁဵၼ်း သွၼ်လိၵ်ႈတႆးၶၢဝ်းမႆႈ ႁူင်းႁဵၼ်း ဝၢၼ်ႈၵဝ်ႇ ၊ ဝၢၼ်ႈမူးလေး ၊ ဝၢၼ်ႈၽၢႆ ၵၢၼ်ႇ ၊ ဝၢၼ်ႈဢူမ်မူႉ ၊ ဝၢၼ်ႈၼမ်ႉႁူးၼွႆႉ ၊ ဝၢၼ်ႈတူၼ်ႈတီး ၊ ဝၢၼ်ႈႁၢႆး ၊ ဝၢၼ်ႈၶႃလိုင်ႈ ၊ ဝၢၼ်ႈမူင်ႈ ၊ ဝၢၼ်ႈၼႃး လိၼ်း ၊ ဝၢၼ်ႈတူၼ်ႈၵႃႈ ၊ ဝၢၼ်ႈၼႃးၶၢႆး ဢၼ်မီးၼႂ်း ၸေႈဝဵင်းသီႇပေႃႉ ၸဵမ်ၸိူဝ်းၼႆႉသေ လႆႈၸွႆႈထႅမ် ပပ်ႉ ၊ ၵမ်ၸိုမ်း ၊ ၵမ်တႅမ်ႈ ၊ မႆႉထတ်း တႃႇလုၵ်ႈႁဵၼ်းတေၸႂ်ႉတိုဝ်းၼႂ်းႁူင်းႁဵၼ်းၸဵမ်ၸိူဝ်းၼႆႉ ယူႇယဝ်ႉ။
မိူဝ်ႈ လိူၼ် ဢေႊပရိူဝ်ႊ 28 ဝၼ်း ၼၼ်ႉၵေႃႈ ယူႇတီႈ ၽူႈၸတ်းၵၢၼ်ၸေႈတွၼ်ႈ ၼႂ်းၼႃႈတီႈဢုပ်ႉပိူင်ႇ ၸေႈတွၼ်ႈ မၢႆ (11) ဢွၼ်ႁူဝ် ၵေႃႇမတီႇၸေႈတွၼ်ႈ ၸေႈဝဵင်းသေ လူင်းႁူပ်ႉထူပ်းပၼ်ႁႅင်းၸႂ်လုၵ်ႈႁဵၼ်း ၊ မေႃသွၼ် တီႈႁူင်းႁဵၼ်းလိၵ်ႈတႆးဝၢၼ်ႈၼႃးၶၢႆး ၊ ဝၢၼ်ႈတူၼ်ႈၵႃႈ ၊ ဝၢၼ်ႈၼမ်ႉႁူးၼွႆႉ ၼႂ်းၸုမ်းမၢႆ(1) ဢိူင်ႇၵၢင်ႉမေႃႇ ၸေႈ ဝဵင်း(19) သီႇပေႃႉ ၸိုင်ႈတႆးပွၼ်းႁွင်ႇ ၼၼ်ႉယူႇယဝ်ႉ။
တီႈပၢင်ႁူပ်ႉထူပ်းၼၼ်ႉ ၽူႈၸတ်းၵၢၼ်ၸေႈတွၼ်ႈမၢႆ(11) လႆႈမွၵ်ႇလၢတ်ႈၶေႃႈၵႂၢမ်း ပၼ်ပိုၼ်ႉႁူႉၵႂႃႇ လွင်ႈလုၵ်ႈဢွၼ်ႇၼေႃႇတႅၼ်းၶိူဝ်းမိူဝ်ႈၼႆႉ ႁႂ်ႈပေႃးပဵၼ်မႃး ၽူႈဢွၼ်ႁူဝ်လီမီးၼမ်ႉၵတ်ႉ မိူဝ်းၼႃႈ သေ ၵဵဝ်ႇ လူၺ်ႈလွင်ႈလိၵ်ႈလၢႆးပၺ်ႇၺႃႇၵေႃႈ လိၵ်ႈပိူၼ်ႈ ၵႂၢမ်းပိူၼ်ႈ ႁႂ်ႈမေႃလဵပ်ႈႁဵၼ်းႁူႉႁၼ် လိၵ်ႈတႆး ၵႂၢမ်းတႆး ႁႂ်ႈမေႃယိပ်းတိုဝ်းၵၼ်ၵႂႃႇ လႄႈ မွၵ်ႇလၢတ်ႈပၼ်ႁႅင်းၸႂ် လုၵ်ႈႁဵၼ်း ၊ မေႃသွၼ် ႁႂ်ႈမေႃဝႆႉ ၸႂ်ယႂ်ႇၸႂ်ယၢဝ်း ၶတ်းၸႂ်ပူင်သွၼ် လဵပ်ႈ ႁဵၼ်းၵႂႃႇ ႁႂ်ႈပေႃးထိုင်တီႈ ယိူင်းဢၢၼ်းလူင် ၵၢၼ်ပၢႆးပၺ်ႇ ၺႃႇ ၼၼ်ႉ ၼႆယူႇယဝ်ႉ။
ၼင်ႇႁိုဝ်လိၵ်ႈလၢႆးလႄႈ ၾိင်ႈငႄႈႁဝ်း တေဢမ်ႇႁၢႆသေ တေတိူဝ်းတွၼ်းၶိုၼ်ႈယႂ်ႇ ႁိူဝ်ႈႁိူင်းၵႂႃႇ မိူဝ်းၼႃႈၼၼ်ႉ မိူဝ်ႈပူၼ်ႉမႃး ၼႂ်းလိူၼ် မၢတ်ႉ 05 ဝၼ်းၼၼ်ႉၵေႃႈ ယူႇတီႈႁွင်ႈၵၢၼ်ပၢႆးပၺ်ႇၺႃႇ ငဝ်ႈငုၼ်း ပႃႇတီႇမႂ်ႇသုင် ၸိုင်ႈတႆးတပ်ႉသိုၵ်းၸိုင်ႈတႆး SSPP/SSA လႆႈဢွၵ်ႇလိၵ်ႈပိုၼ် ၽၢဝ်ႇ တိုၵ်းသူၼ်းထိုင် သင်ႇၶႃႇၸဝ်ႈ ၊ ၸုမ်း ၵေႃႊလိၵ်ႈလၢႆးၾိင်ႈငႄႈတႆး ၊ ပေႃႈမႄႈၵူၼ်းမိူင်း ၊ ၸုမ်းၸွႆႈထႅမ်တူင်ႇဝူင်းၵူၼ်း လႄႈ ဢိၵ်ႇပႃး ၾၢႆႇတပ်ႉ ၾၢႆႇ ဢုပ်ႉပိူင်ႇ ၵူႈၸၼ်ႉၸၼ်ႉ ၵူႈၼႃႈတီႈ ႁႂ်ႈလႆႈပိၼ်ႇပၢႆႇၸွႆႈထႅမ်ဢဝ်ပုၼ်ႈၽွၼ်း ပိုတ်ႇၽုၺ်ႇပၢင်သွၼ်လိၵ်ႈတႆး ၶၢဝ်းမႆႈၵႂႃႇ ၵူႈတီႈတီႈ ၼႆယူႇယဝ်ႉ။
