ၾႆးမႆႈႁိူၼ်းၵူၼ်းဝၢၼ်ႈ ၸေႈဝဵင်းသီႇပေႃႉလင်ၼိုင်ႈ ၶူဝ်းၶွင်ႁိူၼ်းယေး မႆႈပႃးၸွမ်းၼႂ်းၾႆးမူတ်း လႄႈ ဢမ်ႇ တၼ်းလႆႈဢဝ်သင် ၼႆယူႇယဝ်ႉ။
မိူဝ်ႈဝၼ်းထီ 29/02/2024 ၶၢဝ်းယၢမ်း 16:30 ၼၼ်ႉ ဢွၼ်ႇၸၢႆး သႅၼ်းဢႃႇယု (5) ၶူပ်ႇ ၵေႃႉပဵၼ်လုၵ်ႈၸၢႆး လုင်းဢွင်ႇၸူဝ်း + ပႃႈယိင်းၵွႆႇ ယူႇဝၢၼ်ႈလူင်ၶၢၼ် ဢိူင်ႇတူၼ်ႈၵႅင်း ၸေႈဝဵင်းသီႇပေႃႉၼၼ်ႉ လဵၼ်ႈၾႆးသေ ဢဝ် ၾႆးၸုတ်ႇၺႃးၵွင်ၶႃး ဢၼ်မီးၾၢႆႇလင်ႁိူၼ်း လႄႈ ႁဵတ်း ႁႂ်ႈၾႆးလၢမ်းမႆႈပႃးလင်ႁိူၼ်းလူႉၵွႆၸွမ်းမူတ်း ၊ ၶူဝ်းၶွင် ၼႂ်းႁိူၼ်းၵေႃႈ ဢမ်ႇတၼ်းလႆႈဢဝ်သင် မႆႈပႃးၸွမ်းၼႂ်း ၾႆးမူတ်း ၼႆယူႇယဝ်ႉ။
ၶူဝ်းၶွင်ၼႂ်းႁိူၼ်း ဢၼ်လႆႈလူႉသုမ်းၸွမ်းၾႆးၼၼ်ႉ ၶဝ်ႈသၢၼ်(4)ပေႇ ၊ ငိုၼ်း (20000) ၵျၢပ်ႈ ၊ ပီႇႁူ (1) ၵူႈ ၊ လူတ်ႉၶိူင်ႈ(1) လမ်း ၊ ၸၢၵ်ႈထႆသူၼ် သႅၼ်းလဵၵ်ႉ (1) လူင်ႇ ၊ ၸၢၵ်ႈလိူဝ်ႈၽိုၼ်း (1) ဢၼ် ၊ ၸၢၵ်ႈတီႇႁႆႈ (1) ဢၼ် လႄႈ ၶူဝ်းႁိူၼ်းၽိူၼ်ဝၢၼ်ႇ မေႃႈၶဝ်ႈဝၢၼ်ႇၽၵ်း ၸဵမ် ၸိူဝ်းၼႆႉယူႇယဝ်ႉ။
ၵဵဝ်ႇလူၺ်ႈလွင်ႈ ၽေးၽိုၼ်းၾႆးၼႆႉသေ မိူဝ်ႈပူၼ်ႉမႃး 17/02/2024 ၼၼ်ႉ ယူႇတီႈ ႁွင်ႈၵၢၼ် ၵေႃႇမသိၼ်ႇ ၾၢႆႇထိင်းသိမ်းလၵ်းမၢႆ ထတ်းသၢင်ၼႃႈၵၢၼ် ငဝ်ႈငုၼ်း ပႃႇတီႇမႂ်ႇသုင်ၸိုင်ႈတႆးတပ်ႉသိုၵ်းၸိုင်ႈတႆး SSPP/SSA လႆႈဢွၵ်ႇလိၵ်ႈပိုၼ်ၽၢဝ်ႇ ႁၢမ်ႈႁေႉ ၶဵၼ်ၽေးၾႆးၵႂႃႇၵူႈတီႈ ၵူႈတပ်ႉ ၵူႈႁွင်ႈၵၢၼ်ဝႃႈ – တင်ႈဢဝ် ဝၼ်းဢွၵ်ႇ ၶေႃႈပူင်ပိုၼ်ၽၢဝ်ႇ ၼႆႉၵႂႃႇ ၵူၼ်းသိုၵ်း ၵူၼ်းမိူင်း ဢၼ်မီးၼႂ်း ၼႃႈတီႈဢုပ်ႉပိူင်ႇ ပႃႇတီႇမႂ်ႇသုင်ၸိုင်ႈ တႆး တပ်ႉသိုၵ်းၸိုင်ႈတႆးၵူႈၵေႃႉ တေဢမ်ႇလႆႈၸုတ်ႇထိူၼ်ႇပႃႇလႃးလႃး ၊ မိူဝ်ႈတေၸုတ်ႇၽဝ် ႁႆႊ/သူၼ် ၼၼ်ႉ တေလႆႈ ၵႅတ်ႇလႅၼ်မၼ်းလီငၢမ်းသေ ၸင်ႇၸုတ်ႇၽဝ် တေဢမ်ႇလႆႈပၼ်လၢမ်းမႆႈ တင်းၼွၵ်ႈ ႁႆႊ /သူၼ် လႃး လႃး ၊ ယွၼ်ႉၾႆးၸႂ်ႉတိုဝ်းၸဝ်ႈၵဝ်ႇ မိူၼ်ၼင်ႇ ၾႆးတူမ်ႈႁုင် ၊ ၾႆးတဵၼ်း ၊ ၾႆး ၾႃႉ ၊ ၾႆးၵႅတ်ႉ ၊ ၾႆးသႅင်လႅတ်ႇ ၊ ၾႆးၶိတ်ႇ ၊ ၾႆးပႅတ်ႇထရီႇ ၊ ၾႆးလႅၼ်းယႃႈ ၊ ၾႆးၵူႈသႅၼ်းသႅၼ်း ၸဵမ်ၸိူဝ်းၼႆႉ ယႃႇႁႂ်ႈယဵၼ်းပဵၼ် ၶဵၼ်ၽေး ၾႆးၵႂႃႇ ၼၼ်ႉ တေလႆႈၾၢင်ႉတိုဝ်းလီလီ တေလႆႈမီးလၵ်းမၢႆသေတိုဝ်း တေဢမ်ႇလႆႈ ၸႂ်ႉတိုဝ်းဝူၺ်ႇ လႃးလႃး ၼႆယူႇ ယဝ်ႉ။
