ယူႇတီႈ ၽူႈမီးပုၼ်ႈၽွၼ်း ၾၢႆႇဢုပ်ႉပိူင်ႇ SSPP/SSA ၼႂ်းပိုၼ်ႉတီႈ ၸေႈဝဵင်း မၢႆ (35) လွၵ်ႉၸွၵ်ႇ ၸေႈတွၼ်ႈမၢႆ (15) လႆႈဢွၼ်ႁူဝ် ပိုတ်ႇၽုၺ်ႇပၢင်ၽိုၵ်းၽွၼ်ႉ မေႃသွၼ်လိၵ်ႈလၢႆးတႆး ၶၢဝ်းမႆႈ ၼႂ်းပီႊ (2024) ၼီႊ ၼႆယူႇယဝ်ႉ။
မိူဝ်ႈဝၼ်းထီႉ 07-12/03/2024 ၶၢဝ်းတၢင်း (5)ဝၼ်း ၼၼ်ႉ ယူႇတီႈၽူႈမီးပုၼ်ႈၽွၼ်းၾၢႆႇဢုပ်ႉပိူင်ႇ ၼႂ်းၸေႈဝဵင်းမၢႆ (35) လွၵ်ႉၸွၵ်ႇ ၸေႈတွၼ်ႈမၢႆ (15) ဢွၼ်ႁူဝ်သေ လႆႈပိုတ်ႇၽုၺ်ႇၵႂႃႇ ပၢင်ၽိုၵ်းၽွၼ်ႉမေႃသွၼ် လိၵ်ႈ လၢႆးတႆးၶၢဝ်းမႆႈ ဢွင်ႈတီႈဝတ်ႉၵျွင်းၼွင်ဝူဝ်း ဢိူင်ႇၼွင်ဝူဝ်း ၸေႈဝဵင်းလွၵ်ႉၸွၵ်ႇ သေ ၼႂ်းၼၼ်ႉ မီးသၢင်ႇၶႃႇၸဝ်ႈ(4) ပႃး ၶူးပူင်သွၼ်ၾၢႆႇၾိင်ႈငႄႈ ပုတ်ႉထ (3) ပႃး ၊ ၶူးပွင်သွၼ်ငဝ်ႈငုၼ်း (1) ၵေႃႉ ၊ မေႃသွၼ် ၸၢႆး(18) ၵေႃႉ ၊ မေႃသွၼ်ယိင်း (95) ၵေႃႉ ၊ ၾၢႆႇတပ်ႉ(2) ၵေႃႉ ၊ ၾၢႆႇဢုပ်ႉပိူင်ႇ(4) ၵေႃႉ ၊ ၵေႃႇမတီႇပၢင်သွၼ်(7) ၵေႃႉ ႁူမ်ႈသဵင်ႈ မီးသင်ႇၶႃႇၸဝ်ႈ(7)ပႃး လႄႈ (127) ၵေႃႉ ယူႇယဝ်ႉ။
ဢၼ်တေပူင်သွၼ်ၵႂႃႇ ၼႂ်းပၢင်ၽိုၵ်းၽွၼ်ႉမေႃသွၼ် လႄႈ ၼႂ်းႁူင်းႁဵၼ်းလိၵ်ႈတႆးၶၢဝ်းမႆႈၼၼ်ႉ တေၸႂ်ႉတိုဝ်း ပူင်သွၼ်ၵႂႃႇ (6)ၽႃႇသႃႇ မိူၼ်ၼင်ႇ ၽႃႇသႃႇၾိင်ႈငႄႈ ၸၼ်ႉငဝ်ႈ ၊ ၾိင်ႈငႄႈၸၼ်ႉ(1) ၊ ၾိင်ႈငႄႈ ၸၼ်ႉ (2) ၊ ၾိင်ႈငႄႈ ၸၼ်ႉ (3) ၊ ၽိုၵ်းၽွၼ်ႉတၢင်းၵႃႈ ပၼ်ၵွင်၊ ပၢႆးၵပ်းသိုပ်ႇတူင်ႇဝူင်းၵူၼ်း ၸဵမ်ၸိူဝ်းၼႆႉယူႇယဝ်ႉ။
ပၢင်ၽိုၵ်းၽွၼ်ႉ ၽိူမ်ႉထႅမ်ၼမ်ႉၵတ်ႉမေႃသွၼ်ၼႆႉ မိူၼ် ၼင်ႇ ၼႂ်းၼႃႈတီႈဢုပ်ႉပိူင်ႇ ပႃႇတီႇမႂ်ႇသုင်ၸိုင်ႈတႆး တပ်ႉသိုၵ်းၸိုင်ႈတႆး SSPP/SSA ၸေႈဝဵင်းမၢႆ(18) ၼမ်ႉတူႈ ၸေႈတွၼ်ႈမၢႆ(8) ၵေႃႈ ယူႇတီႈၽူႈမီးပုၼ်ႈၽွၼ်းၼႂ်း ပိုၼ်ႉ တီႈၶဝ်ဢွၼ်ႁူဝ်ပိုတ်ႇၽုၺ်ႇၵႂႃႇယဝ်ႉတူဝ်ႈ သေ လႆႈတေႇ ပိုတ်ႇၽုၺ်ႇပႃး ႁူင်းႁဵၼ်းသွၼ်လိၵ်ႈတႆးၵႂႃႇ လၢႆလၢႆတီႈ ယူႇယဝ်ႉ။
ၼင်ႇႁိုဝ် လိၵ်ႈလၢႆးတႆးလႄႈ ၾိင်ႈငႄႈႁဝ်း တေဢမ်ႇႁၢႆသေ တေတိူဝ်းတွၼ်းၶိုၼ်ႈယႂ်ႇႁိူဝ်ႈႁိူင်းၵႂႃႇမိူဝ်းၼႃႈ ၊ ၼင်ႇႁိုဝ် ၵူၼ်းၵူႈၵေႃႉ ၵူၼ်းၵူႈတီႈ ႁႂ်ႈႁူႉလိၵ်ႈ ႁႂ်ႈလူင်ႉလႅၼ်ႇ လွင်ႈတႅမ်ႈ လွင်ႈလူ ၸဵမ်ၸိူဝ်းၼႆႉလႄႈ မိူဝ်ႈဝၼ်းထီႉ 05/03/2024 ၼၼ်ႉၵေႃႈ ယူႇတီႈ ႁွင်ႈၵၢၼ်ၾၢႆႇပၢႆးပၺ်ႇၺႃႇ ငဝ်ႈငုၼ်း SSPP/SSA လႆႈဢွၵ်ႇလိၵ်ႈပိုၼ်ၽၢဝ်ႇ တိုၵ်းသူၼ်းထိုင် သင်ႇၶႃႇၸဝ်ႈ ၊ ၸုမ်းၵေႃႊလိၵ်ႈလၢႆး ၾိင်ႈငႄႈတႆး ၊ ပေႃႈမႄႈၵူၼ်းမိူင်း ၊ ၾၢႆႇတပ်ႉၾၢႆႇဢုပ်ႉပိူင်ႇ ၵူႈၸၼ်ႉၸၼ်ႉ ၊ ၸုမ်းၸွႆႈထႅမ် တူင်ႇဝူင်းၵူၼ်းၸဵမ်ၸိူဝ်း ၼႆႉ ႁႂ်ႈမေႃ ပိၼ်ႇပၢႆႇၸွႆႈထႅမ် ဢဝ်ပုၼ်ႈၽွၼ်း ႁူမ်ႈ ၸွႆႈပိုတ်ႇၽုၺ်ႇ ပၢင်သွၼ်လိၵ်ႈတႆးၶၢဝ်းမႆႈၵႂႃႇၵူႈတီႈယူႇယဝ်ႉ။
