ၽူႈၵွၼ်းၸေႈဝဵင်းၵေးသီး ဢၼ်ယူႇၾၢႆႇတႂ်ႈၶွင်ႇသီႇသိုၵ်းမၢၼ်ႈၵုမ်းၵမ်ၼၼ်ႉ ႁွင်ႉထူပ်းၵွၼ်းဢိူင်ႇၵွၼ်းပွၵ်ႉ ၼႂ်း ၸေႈဝဵင်းၵေးသီးသေ ဢုပ်ႇဢူဝ်း ပိူဝ်ႈတႃႇၵဵပ်းၵူၼ်းသိုၵ်းမႂ်ႇ ၼႆယူႇယဝ်ႉ။

ပူၼ်ႉမႃးမိူဝ်ႈဝၼ်းထီႉ 16 လိူၼ်မၢတ်ႊၶျ်(March) ၼၼ်ႉ ယူႇတီႈ ၽူႈၵွၼ်း ၸေႈဝဵင်းၵေးသီး ဢၼ်ယူႇၾၢႆႇတႂ်ႈၶွင်ႇသီႇသိုၵ်းမၢၼ်ႈ ၵုမ်းၵမ်ၼၼ်ႉ ႁွင်ႉဢဝ်ၵွၼ်းဢိူင်ႇ ၵွၼ်းပွၵ်ႉ ၸတ်းႁဵတ်းပၢင်ၵုမ်ႁူပ်ႉထူပ်းၵၼ် ဢွင်ႈတီႈလုမ်း ၸေႈဝဵင်းသေ ၸိသင်ႇ ႁႂ်ႈၵွၼ်းဢိူင်ႇ ၵွၼ်းပွၵ်ႉ ၵူႈဢိူင်ႇၵူႈပွၵ်ႉ ၼႂ်းၸေႈဝဵင်းၵေးသီး သူင်ႇပၼ်သၢႆမၢႆၵူၼ်းသိုၵ်းမႂ်ႇ ၸုပ်ႈ ဢွၼ်တၢင်းသုတ်းၼႆႉ (1) ဢိူင်ႇ/ပွၵ်ႉ လႂ် (1) ၵေႃႉ ၊ ပေႃးထိုင်ဝၼ်းထီႉ 18 လိူၼ်မၢတ်ႊၶျ်(March) ဝႆႉပဵၼ်ဝၼ်းလိုၼ်းသုတ်း ႁႂ်ႈသူင်ႇပၼ် သဵၼ်ႈသၢႆမၢႆတီႈလုမ်း ၸေႈဝဵင်း ၼႆယူႇယဝ်ႉ။

ၵဵဝ်ႇလူၺ်ႈလွင်ႈ ႁွင်ႈၵၢၼ်ၾၢႆႇဢုပ်ႉပိူင်ႇ ၶွင်ႇသီႇသိုၵ်းမၢၼ်ႈ ၸိသင်ႇတုၵ်းယွၼ်း သဵၼ်ႈမၢႆၵူၼ်းသိုၵ်းမႂ်ႇ ၼၼ်ႉသေ ၸိူဝ်းပဵၼ်ၵွၼ်းဢိူင်ႇ ႁူမ်ႈၵၼ် တုမ်ႉတွပ်ႇၶိုၼ်းဝႃႈ- သဵၼ်ႈမၢႆၵူၼ်းသိုၵ်းမႂ်ႇၼၼ်ႉတေႉ ၸိူင်ႉႁိုဝ် ၵေႃႈ တေဢမ်ႇၸၢင်ႈသူင်ႇပၼ် လိူဝ်သေၼၼ်ႉ တေဢမ်ႇမီးၽႂ်ၶႆႈႁဵတ်းလႃးလႃး ယူႇတီႈၵွၼ်းဢိူင်ႇၶဝ်ၵေႃႈ ဢမ်ႇ ၸၢင်ႈႁပ်ႉပၢၵ်ႇလႆႈဝႃႈ တေသူင်ႇပၼ်သဵၼ်ႈသၢႆမၢႆၵူၼ်းသိုၵ်းမႂ်ႇ သင်ၸိူဝ်ႉၶႆႈၵဵပ်းၵေႃႈ ႁႂ်ႈၵဵပ်းၵႂႃႇၼႂ်း ၸၢဝ်းၶိူဝ်းမၢၼ်ႈၵူၺ်း ၼႂ်းၸၢဝ်းၶိူဝ်းတႆး ၸိူဝ်းပဵၼ်သႅၼ်း ဢႃႇယု 15 ၶူပ်ႇ တေႃႇထိုင် 40 ၶူပ်ႇၼၼ်ႉ တေႉ ယူႇတီႈပႃႇတီႇမႂ်ႇသုင်ၸိုင်ႈတႆးတပ်ႉ သိုၵ်းၸိုင်ႈတႆး SSPP/SSA ၶဝ် လူင်းၵဵပ်းဢဝ်မူတ်းၵူၺ်းယဝ်ႉလႄႈ တႃႇတေၵဵပ်းပၼ်ထႅင်ႈၵေႃႈဢမ်ႇမီးၽႂ် သင်ၸိူဝ်ႉဝႃႈ ၾၢႆႇၶွင်ႇသီႇသိုၵ်းမၢၼ်ႈ တဵၵ်းတဵင် ႁႂ်ႈၵဵပ်းသိုၵ်းမႂ်ႇပၼ် တိၵ်းတိၵ်းၼႆ ၸိူဝ်းပဵၼ်ၵွၼ်းဢိူင်ႇ တေ ဢွၼ် ၵၼ်ပူတ်းလိုဝ်ႈၵၢၼ်ၵွၼ်းဢိူင်ႇ တၢင်းသဵင်ႈၼႆယူႇယဝ်ႉ။

ၶွင်ႇသီႇသိုၵ်းမၢၼ်ႈ ႁွင်ႉထူပ်း ၵွၼ်းဢိူင်ႇ ၵွၼ်းပွၵ်ႉ သေ ၵဵပ်းယွၼ်းသိုၵ်းမႂ်ႇၼႆႉ ဢမ်ႇၵွမ်ႉၵႃႈၼႂ်းၸေႈဝဵင်း ၵေးသီးတီႈလဵဝ်ၵူၺ်း မိူၼ်ၼင်ႇၼႂ်းၸေႈဝဵင်းတၢင်ႉယၢၼ်း ၊ ၸေႈဝဵင်း မိူင်းၵၢဝ် ၊ ၸေႈဝဵင်းမိူင်းသူႈ ၊ ၸေႈဝဵင်း မိူင်းၵိုင် ၊ ၸေႈဝဵင်းၵျွၵ်ႉမႄး ၊ ၸေႈဝဵင်းလႃႈသဵဝ်ႈ ၸဵမ်ၸိူဝ်း ၼႆၵေႃႈ မၢင်တီႈတုၵ်းယွၼ်းဝႆႉ ၼိုင်ႈဢိူင်ႇလႂ် (2) ၵေႃႉ မၢင်တီႈၵေႃႈ ထုၵ်ႇၺႃး ၶွင်ႇသီႇသိုၵ်းမၢၼ်ႈၶဝ် သူင်ႇသဵၼ်ႈသၢႆမၢႆတူၵ်ႇၸိုဝ်ႈသဵင် သေ တုၵ်းယွၼ်းဝႆႉယူႇ ယဝ်ႉ။

ၵူၼ်းၸိူဝ်းဢၼ် ပႃးသဵၼ်ႈသၢႆမၢႆႁၢပ်ႇထၢမ်းၵၢၼ်သိုၵ်းဝႆႉ ၼႂ်းပႃႇတီႇမႂ်ႇသုင်ၸိုင်ႈတႆးတပ်ႉသိုၵ်းၸိုင်ႈတႆး SSPP/SSA ၵူႈၵေႃႉၼၼ်ႉ လႄႈ ပေႃႈမႄႈၵူၼ်းမိူင်း ၸိူဝ်းဢၼ် ယူႇသဝ်းဝႆႉ ၼႂ်းၼႃႈတီႈဢုပ်ႉပိူင်ႇပႃႇတီႇမႂ်ႇသုင်ၸိုင်ႈတႆးတပ်ႉသိုၵ်းၸိုင်ႈတႆး ၼၼ်ႉ သင်ၸိူဝ်ႉဝႃႈ မူႇလႂ်ၸုမ်းလႂ် တဵၵ်းတဵင်တုၵ်းယွၼ်း ႁႂ်ႈႁၢပ်ႇထၢမ်းၵၢၼ်သိုၵ်း သေၾၢႆႇ ၾၢႆႇ လူၺ်ႈၵၢင်ၸႂ်ၸဝ်ႈၵဝ်ႇဢမ်ႇၶႆႈႁဵတ်းၼၼ်ႉၼႆၸိုင် ႁႂ်ႈၵပ်းသိုပ်ႇႁႃ ၽူႈမီးပုၼ်ႈၽွၼ်းႁဝ်းၶႃႈ ၼႃႈတီႈလႂ်ၼႃႈတီႈၼၼ်ႉသေ ယူႇတီႈပႃႇတီႇမႂ်ႇသုင်ၸိုင်ႈတႆးတပ်ႉသိုၵ်း ၸိုင်ႈတႆး SSPP/SSA တေႁႃလၢႆးတၢင်း ၵႄႈလိတ်ႈ ၵႅတ်ႇ ၶႄပၼ်ၵႂႃႇ ယူႇယဝ်ႉ။

#shanstateprogressparty

#shanstatearmy

#SSPPInfo

#ၵဵပ်းသိုၵ်းမႂ်ႇ

#ၸေႈဝဵင်းၵေးသီး