ငဝ်ႈငုၼ်း ပႃႇတီႇမႂ်ႇသုင်ၸိုင်ႈတႆးတပ်ႉသိုၵ်းၸိုင်ႈတႆး SSPP/SSA ၸတ်းႁဵတ်းပၢင်ၵႅဝ်ႈ ၵိုတ်းလိုဝ်ႈ ပၢင်သွၼ် ၽူႈမီး ၸၼ်ႉဢွၼ်ႇၽိုၵ်းၵၢၼ်ယဝ်ႉ ၸုပ်ႈထီႉ(4) ဢွင်ႈတီႈ ႁူင်းႁဵၼ်းၽူႈမီးၸၼ်ႉ ငဝ်ႈငုၼ်း ၼႆယူႇယဝ်ႉ။

မိူဝ်ႈၼႆႉဝၼ်းထီႉ 08/02/2024 ၶၢဝ်းယၢမ်းၵၢင်ၼႂ် 08:00 မူင်း ၼၼ်ႉ ယူႇတီႈ ၸုမ်းဢွၼ်ႁူဝ်ပၢႆးမိူင်း ၊ ႁွင်ႈၵၢၼ် ၾၢႆႇ ၶူၼ်ႉၶႂႃႉ ၊ ႁူင်းႁဵၼ်း ၽူႈမီးၸၼ်ႉၼႂ်းငဝ်ႈငုၼ်း ပႃႇတီႇမႂ်ႇသုင်ၸိုင်ႈတႆး တပ်ႉသိုၵ်းၸိုင်ႈတႆး SSPP/SSA ဢွၼ်ႁူဝ် ၸတ်းႁဵတ်းပၢင်ၵႅဝ်ႈၵိုတ်းလိုဝ်ႈ ပၢင်သွၼ်ၽူႈမီးၸၼ်ႉဢွၼ်ႇၽိုၵ်းၵၢၼ် ၸုပ်ႈထီႉ(4) ဢွင်ႈတီႈႁူင်း ႁဵၼ်းၽူႈမီးၸၼ်ႉ ငဝ်ႈငုၼ်းသေ ၼႂ်းၼၼ်ႉမီးၽူႈယႂ်ႇ ၵူၼ်းလူင်ငဝ်ႈငုၼ်း(31) ၸဝ်ႈ ၊ သၢႆသိုၵ်း(175) ၵေႃႉ ၊ ထႆႇႁၢင်ႈမၢႆတွင်း(4) ၵေႃႉ ၊ တပ်ႉ ႁၢၼ် (35) ၵေႃႉ ၊ လုမ်း ၵူၼ်းၼုမ်ႇ(5) ၵေႃႉ ၊ မေႃသွၼ်ႁူင်းႁဵၼ်းၼေႃႇတႅၼ်းၶိူဝ်း (3) ၵေႃႉ ဢူႈမႄႈလုၵ်ႈႁဵၼ်း (80) ၵေႃႉ ၊ ၸုမ်းပွင်ၵၢၼ် ႁူင်းႁဵၼ်း(30) ၵေႃႉ ႁူမ်ႈသဵင်ႈ ၽူႈၶိုၼ်ႈႁွတ်ႈမီး (363 ) ၵေႃႉၼႆယူႇယဝ်ႉ။

တီႈၼႂ်းပၢင်ၵႅဝ်ႈၼၼ်ႉ မီးၽူႈၼၢမ်းၼႃႈ(1)ပႃႇတီႇမႂ်ႇသုင် ၸိုင်ႈတႆး တပ်ႉသိုၵ်းၸိုင်ႈတႆး SSPP/SSA ၸွမ်သိုၵ်းလူင် သိူဝ်ထႅၼ်ႈ မွၵ်ႇလၢတ်ႈၶေႃႈၵႂၢမ်း ပိုတ်ႇပၢင် သပ်းလႅင်း ၼႄ လွင်ႈ ၵၢၼ်သိုၵ်း ၵၢၼ်မိူင်းယၢမ်းလဵဝ် ၊ ၶၢဝ်းယၢမ်း ၵၢင်ၼႂ် 08:30 မူင်း ၶိုၼ်းသိုပ်ႇ ယိုၼ်ႈဢၢပ်ႈ ၶႅပ်းဝႂ်ဢွင်ႇပူၼ်ႉႁူင်းႁဵၼ်း ၊ ၶႅပ်းဝႂ်ၶိုၼ်ႈၸၼ်ႉ တီႈလုၵ်ႈႁဵၼ်း ၸုပ်ႈထီႉ(4) ၊ ၶၢဝ်း ယၢမ်းၵၢင်ၼႂ် 08:45 မူင်း ဢၼ်ပဵၼ်ၽူႈ ၵွၼ်းႁူင်းႁဵၼ်းၽူႈမီးၸၼ်ႉ ၸဝ်ႈႁၢၼ်ၾူၼ်ၸဵင် လၢႆးငၢၼ်းတၢင်ႇၼႄ သၢႆမၢႆ ၶဝ်ႈၼမ်ႉတၢင်းၵိၼ် ၊ ငိုၼ်းၸႂ်ႉ ၸၢႆႇ ၼႂ်းၶၢဝ်းတၢင်းပၢင်သွၼ် လႄႈ မွၵ်ႇလၢတ်ႈၶေႃႈၵႂၢမ်း သူင်ႇသင်ႇလုၵ်ႈႁဵၼ်းယဝ်ႉ သေ ယူႇတီႈၽူႈၶပ်ႉပၢင် ပိုၼ်ၽၢဝ်ႇပၢင်ၵႅဝ်ႈဢွင်ႇမၢၼ်ယဝ်ႉတူဝ်ႈၵႂႃႇ ၼႂ်းၶၢဝ်းယၢမ်း ၵၢင်ၼႂ် 09:00 မူင်းၼၼ်ႉ လီ ငၢမ်းယူႇယဝ်ႉ။

#shanstateprogressparty

#shanstatearmy

#SSPPInfo

#ပၢင်ၵႅဝ်ၵိုတ်းလိုဝ်ႈပၢင်သွၼ်ၽူႈမီးၸၼ်ႉဢွၼ်ႇ