မီးၵူၼ်းယိပ်းၵွင်ႈ ဢမ်ႇႁူႉၾၢႆႇ ၶဝ်ႈၸူၼ်ၶမ်းတီႈလၢၼ်ႉ ၶၢႆၶမ်း လၢၼ်ႉတိတ်ႉသႃႇ(သစ္စာ) ၸေႈဝဵင်းတၢင်ႉ ယၢၼ်း သေ ဢဝ်ၵွင်ႈယိုဝ်းၸဝ်ႈလၢၼ်ႉ လႆႈလူႉသဵင်ႈသၢႆၸႂ် ၼႆယူႇယဝ်ႉ။

မိူဝ်ႈၼႆႉ ဝၼ်းထီႉ 13/02/2024 ၶၢဝ်းယၢမ်းၵၢင်ၼႂ် 11:30 မူင်း ၸဝ်ႈလၢၼ်ႉၶၢႆၶမ်း လၢၼ်ႉတိတ်ႉသႃႇ(သစ္စာ) ပွၵ်ႉမၢႆ(4) ၸေႈဝဵင်းတၢင်ႉယၢၼ်း ၸိုဝ်ႈႁွင်ႉ လုင်းၵျေႃႇဢူး ၸၢဝ်းၶိူဝ်းၶႄႇ ဢႃႇယုမွၵ်ႈ (50) ၶူပ်ႇႁိမ်းႁွမ်းၼၼ်ႉ ထုၵ်ႇၺႃးၽူႈၸၢႆးဢမ်ႇႁူႉၾၢႆႇၵေႃႉၼိုင်ႈ ၶဝ်ႈၸူၼ်ဢဝ် ၶမ်းၼႂ်းလၢၼ်ႉသေ ဢဝ်ၵွင်ႈပွတ်းသႂ်ႇလုင်းၵျေႃႇဢူး လႆႈလူႉတၢႆၵႂႃႇထင်တီႈ ၼႆယူႇယဝ်ႉ။

ၵဵဝ်ႇလူၺ်ႈလွင်ႈၼႆႉသေ ၵူၼ်းမိူင်းၸေႈဝဵင်းတၢင်ႉယၢၼ်း ၵေႃႉၼိုင်ႈလၢတ်ႈၼႄဝႃႈ – “ၸႂ်ႈၶႃႈဢေႃႈ မီးၵူၼ်း ၸၢႆး ၵေႃႉၼိုင်ႈ ဢႃႇယု တေမီးမွၵ်ႈ (40)ပၢႆယဝ်ႉၶႃႈ။ ၼုင်ႈသိူဝ်ႈသီႇသွမ်ႇ သႂ်ႇပႃးဢၼ်တူမ်းသူပ်းသီၶၢဝ် ၶႃႈ ဢေႃႈ။ မၼ်းႁေႃႈလူတ်ႉၶိူင်ႈမႃးၵိုတ်းဝႆႉၼွၵ်ႈၵၢတ်ႇသေ ပႆတိၼ် ၶဝ်ႈမႃးတီႈသႅင်ႇၶမ်းၼၼ်ႉဢေႃႈ။မႃးၸူၼ်ဢဝ်ၶမ်းသေ ယိုဝ်းၸဝ်ႈလၢၼ်ႉၶႃႈဢေႃႈ ယိုဝ်းၶဝ်ႈၺႃး သိုဝ်ႈႁူဝ်ၸႂ်မၼ်းၵမ်းလဵဝ်ယဝ်ႉၶႃႈဢေႃႈ” ဝႃႈၼႆ။

ဝၢႆးသေ ၸဝ်ႈလၢၼ်ႉၶမ်း ထုၵ်ႇၺႃးယိုဝ်းယဝ်ႉ ၵူၼ်းၵေႃႉ ဢၼ်ယိုဝ်းၼၼ်ႉ ၶိုၼ်းၶီႇလူတ်ႉၶိူင်ႈ ပၢႆႈဢွၵ်ႇၵႂႃႇ သေ ယူႇတီႈၽူႈမီးပုၼ်ႈၽွၼ်း ၾၢႆႇပလိၵ်ႈ ၼႂ်းဝဵင်းတၢင်ႉယၢၼ်း လႆႈမႃးဢဝ်ၶၢပ်ႈတူဝ်တၢႆ ၵေႃႉဢၼ် ထုၵ်ႇ ၺႃယိုဝ်းၼၼ်ႉ ၵႂႃႇၵူတ်ႇ ထတ်းတူၺ်း တီႈႁူင်းယႃ ၸေႈဝဵင်းတၢင်ႉယၢၼ်းၼၼ်ႉယူႇယဝ်ႉ။

photo- Credit

#shanstateprogressparty

#shanstatearmy

#SSPPInfo

#ၸူၼ်#လၢၼ်ႉၶၢႆၶမ်း