ၶွင်ႇသီႇသိုၵ်းမၢၼ်ႈ ၸတ်းႁဵတ်းပၢင်ၵုမ် ၶွင်ႇသီႇၾၢႆႇၵႅတ်ႇၶႄ/ႁူမ်ႇလူမ်ႈၸိူဝ်ႉၸၢတ်ႈ တီႈဝဵင်းလူင်ၼေႇပျီႇတေႃႇသေ သိုပ်ႇတိူဝ်းဢႃႇယု ၵၢၼ်ဢုပ်ႉပိူင်ႇၽွင်းငၢမ်းၸိုင်ႈမိူင်းထႅင်ႈ ၶၢဝ်းတၢင်း(6) လိူၼ်ၼႆယူႇယဝ်ႉ။မိူဝ်ႈဝၼ်းထီႉ 31/02/2024 ၼၼ်ႉ ၸွမ်ၸိၵ်းသိုၵ်းမၢၼ်ႈ မိၼ်းဢွင်ႇလႅင်ႇဢွၼ်ႁူဝ် ၸတ်းႁဵတ်းပၢင်ၵုမ် ၶွင်ႇ သီႇ ၾၢႆႇ ၵႅတ်ႇၶႄ/ႁူမ်ႇလူမ်ႈၸိူဝ်ႉၸၢတ်ႈ တီႈဝဵင်းလူင်ၼေႇပျီႇတေႃႇ သေ ယူႇတီႈၸွမ်ၸိၵ်းသိုၵ်းမၢၼ်ႈ မိၼ်းဢွင်ႇလႅင်ႇ လႆႈ တၢင်ႇလၢတ်ႈတီႈၼႂ်းပၢင်ၵုမ်ဝႃႈ တႃႇတေသိုပ်ႇ ႁဵတ်းသၢင်ႈႁႂ်ႈငဝ်းလၢႆးဝၢၼ်ႈမိူင်းမီးလွင်ႈၼိမ်သဝ်းမိူၼ် ၵဝ်ႇ ၊ တႃႇၽဵဝ်ႈ မူၺ်ႉၸုမ်းၵေႃႇၵၢၼ်ႁၢႆႉ ၊ တႃႇၽဵဝ်ႈမူၺ်ႉၸုမ်း(ၸႃးၽျႅၼ်ႉ)ဢၼ်လႅၼ်ငိုၼ်း ၼိူဝ်ဢွၼ်ႇလၢႆး (Online) ၊ တႃႇၵဵပ်း သဵၼ်ႈမၢႆ ႁူဝ်ၵူၼ်း ၊ တႃႇတေၸတ်း ႁဵတ်းလႆႈပၢင်လိူၵ်ႈတင်ႈ ၸဵမ်ၸိူဝ်းၼႆႉလႄႈ ၸင်ႇလႆႈတုၵ်းယွၼ်း ႁႂ်ႈလႆႈသိုပ်ႇတိူဝ်း ဢႃႇယု ၵၢၼ်ဢုပ်ႉပိူင်ႇၽွင်းငၢမ်းၸိုင်ႈမိူင်းထႅင်ႈၶၢဝ်းတၢင်း(6) လိူၼ်ၼႆ လႆႈႁၼ်သိုဝ်ႇၶၢဝ်ႇ ၾၢႆႇၶွင်ႇသီႇသိုၵ်း မၢၼ်ႈၶဝ် ပိုၼ်ၽၢဝ်ႇ ဢွၵ်ႇဝႆႉ ၸိူင်ႉၼင်ႇၼႆ ယူႇယဝ်ႉ။

ၵဵဝ်ႇလူၺ်ႈလွင်ႈ ၸွမ်းၸိၵ်းသိုၵ်းမၢၼ်ႈ မိၼ်းဢွင်ႇလႅင်ႇ လႆႈတၢင်ႇလၢတ်ႈၵႂႃႇၸိူဝ်းၼၼ်ႉသေ တီႈၼႂ်းပၢင်ၵုမ် ၾၢႆႇ ၵႅတ်ႇၶႄ/ႁူမ်ႇလူမ်ႈၸိူဝ်ႉၸၢတ်ႈၼၼ်ႉ ဢမ်ႇမီးၽႂ်သၢၼ် ၶတ်းလႄႈ လႆႈဢွၼ်ၵၼ်ႁူမ်ႈတူၵ်းလူင်းမၵ်းမၼ်ႈၵႂႃႇ တႃႇ တေတိူဝ်းဢႃႇယုၵၢၼ်ဢုပ်ႉပိူင်ႇၽွင်းငၢမ်းၸိုင်ႈမိူင်း ထႅင်ႈ(6) ၼႆ ယူႇယဝ်ႉ။

ပေႃးဢဝ်ၸွမ်း ပၵ်းပိူင်ၸိုင်ႈမိူင်း 2008 ဢၼ်ပဵၼ်ၼႂ်းမၢႆမီႈမတ်ႉတႃ (417) ဢၼ်ပႃးဝႆႉဝႃႈ ဝၢႆးသေ ႁူဝ်ပဝ်ႈၾၢႆႇၵႅတ်ႇ ၶႄၸိုင်ႈမိူင်း သိမ်းဢႃႇၼႃႇၸိုင်ႈမိူင်းယဝ်ႉ တေႇၼပ်ႉဝၼ်းဢၼ်သိမ်းဢႃႇၼႃႇၸိုင်ႈမိူင်းသေ မီးသုၼ်ႇလႆႈ ဢုပ်ႉပိူင်ႇ ၽွင်းငၢမ်းၸိုင်ႈမိူင်းၶၢဝ်းတၢင်း (1) ပီႊတဵမ် ၊ ဝၢႆးသေၼၼ်ႉသင်ၸိူဝ်ႉဝႃႈ ႁူဝ်ပဝ်ႈၾၢႆႇၵႅတ်ႇၶႄၸိုင်ႈမိူင်းတၢင်ႇၼႄ လႆႈဝႃႈ ငဝ်းလၢႆးဝၢၼ်ႈမိူင်း ဢမ်ႇမီးလွင်ႈၼိမ်သဝ်း ၼႆၸိုင် ဢိင်ဢဝ်ၼိူဝ် မၢႆမီႈမတ်ႉတႃ (425) ၼၼ်ႉသေ မီးသုၼ်ႇ လႆႈသိုပ်ႇတိူဝ်း ဢႃႇယု ဢုပ်ႉပိူင်ႇၽွင်းငၢမ်းၸိုင်ႈမိူင်းထႅင်ႈ (2)ပွၵ်ႈ ၼိုင်ႈပွၵ်ႈလႂ် ၶၢဝ်းတၢင်း(6) လိူၼ် ၼႆယူႇယဝ်ႉ။

တေႇဢဝ်ဝၼ်းၶွင်ႇသီႇသိုၵ်းမၢၼ်ႈသိမ်းဢႃႇၼႃႇၸိုင်ႈမိူင်းမႃးၼၼ်ႉ သေ ဢၼ်ၶွင်ႇသီႇသိုၵ်းမၢၼ်ႈ သိုပ်ႇတိူဝ်း ဢႃႇယု ၽွင်းငၢမ်းၸိုင်ႈမိူင်းမႃး တေႃႇထိုင်ပွၵ်ႈၵမ်းၼႆႉၸိုင် မီးၵႂႃႇ (5) ပွၵ်ႈ ယူႇယဝ်ႉ။

Photo-Credit

#shanstateprogressparty

#shanstatearmy

#SSPPInfo

#တိူဝ်းဢႃႇယု

#ဢုပ်ႉပိူင်ႇ

#သိမ်းဢႃႇၼႃႇ

#ၸွမ်ၸိၵ်းသိုၵ်းမၢၼ်ႈ