ငဝ်ႈငုၼ်း ပႃႇတီႇမႂ်ႇသုင်ၸိုင်ႈတႆး တပ်ႉသိုၵ်းၸိုင်ႈတႆး SSPP/SSA ၸတ်းႁဵတ်းပၢင်ၵႅဝ်ႈဝၼ်းၸိူဝ်ႉၸၢတ်ႈၸိုင်ႈတႆး ၶွပ်ႈၶူပ်ႇ (77) ပီႊ ဢွင်ႈတီႈႁူင်းႁဵၼ်းသိုၵ်း ငဝ်ႈငုၼ်း ၼႆယူႇယဝ်ႉ။

မိူဝ်ႈၼႆႉဝၼ်းထီႉ 07/02/2024 ပဵၼ်ဝၼ်း ၶွပ်ႈၶူပ်ႇ(77) ပီႊ ဝၼ်းၸိူဝ်ႉၸၢတ်ႈၸိုင်ႈတႆးၼႆလႄႈ တေႇမိူဝ်ႈၶၢဝ်းယၢမ်း ၵၢင်ၼႂ် 08:20 မူင်းၼၼ်ႉ ယူႇတီႈငဝ်ႈငုၼ်း ပႃႇတီႇမႂ်ႇသုင်ၸိုင်ႈတႆး တပ်ႉသိုၵ်းၸိုင်ႈတႆး SSPP/SSA လႆႈၸတ်း ႁဵတ်း ပၢင်ၵႅဝ်ႈဝၼ်းၸိူဝ်ႉၸၢတ်ႈၸိုင်ႈတႆး ဢွင်ႈတီႈ ႁူင်း ႁဵၼ်းသိုၵ်း တီႈငဝ်ႈငုၼ်း SSPP/SSA သေ ၼႂ်း ၼၼ်ႉ မီးၽူႈယႂ်ႇ ၵူၼ်းလူင် ၊ ၸုမ်းလုၵ်ႈႁဵၼ်း ၊ ၸုမ်း ၵူၼ်းၼုမ်ႇ ၊ ၸုမ်းမေႃယႃ ၊ ၸုမ်းၼၢင်းယိင်းငဝ်ႈငုၼ်း SSPP/SSA ၊ ၽူႈၵွၼ်း တပ်ႉ/လုၵ်ႈတပ်ႉ SSPP/SSA ၊ ပေႃႈမႄႈၵူၼ်းမိူင်း ၶိုၼ်ႈႁွတ်ႈ ႁူမ်ႈသဵင်ႈမီး (1733) ၵေႃႉ ၼႆယူႇယဝ်ႉ။

တီႈၼႂ်းပၢင်ၵႅဝ်ႈၼၼ်ႉ မီးၸွမ်သိုၵ်းလူင်သိူဝ်ထႅၼ်ႈ မွၵ်ႇလၢတ်ႈၶေႃႈၵႂၢမ်းပိုတ်ႇပၢင် ၊ သပ်းလႅင်းၼႄပိုၼ်း ဝၼ်း ၸိူဝ်ႉၸၢတ်ႈၸိုင်ႈတႆး ႁဵတ်းႁိုဝ်ပဵၼ်မႃး ငဝ်းလၢႆးၵၢၼ်မိူင်းၵၢၼ်သိုၵ်းယၢမ်းလဵဝ် ၊ ၸဝ်ႈသိုၵ်းလူင်သႅင်ႁၢၼ် လူ ဢၢၼ်ႇ ၼႄၽိုၼ်လိၵ်ႈ ဢၼ်ငဝ်ႈငုၼ်း တီႇမူဝ်ႇ ၶရေႇ ၸီႇၸိူဝ်ႉၶိူဝ်းတႆး (Shan Nationalities League for Democracy) ယိုၼ်ႈထိုင်မႃး သေ ယူႇတီႈၽူႈၶိုၼ်ႈႁွတ်ႈ တၢင်းသဵင်ႈ ႁူမ်ႈႁွင်ႉၶေႃႈႁွင်ႉသႅၼ်ႇ(5)ၶေႃႈ ဢၼ်မီးဝႃႈ (1) ပႃႇတီႇ ႁႂ်ႈ မိူၼ်ပႃႇတီႇ ၵေႃႇသၢင်ႈတႃႉ ၵေႃႇသၢင်ႈတႃႉ (2) တပ်ႉႁႂ်ႈမိူၼ်တပ်ႉ ၵေႃႇသၢင်ႈတႃႉ ၵေႃႇသၢင်ႈတႃႉ (3) လွင်ႈၶွတ်ႇ လိူတ်ႈၽွမ်ႉႁူမ်ႈ ပႃႇတီႇမႂ်ႇသုင်ၸိုင်ႈတႆးတပ်ႉသိုၵ်း ၸိုင်ႈတႆး လႄႈ ပေႃႈမႄႈၵူၼ်းမိူင်း ႁႂ်ႈယိုၼ်းယၢဝ်း ႁႂ်ႈယိုၼ်းယၢဝ်း (4) ၽူႈၶဵၼ်ၸိူဝ်ႉၸၢတ်ႈၸိုင်ႈတႆး တၵ်းလႆႈတူၵ်းသုမ်း တၵ်းလႆႈတူၵ်းသုမ်း (5) လၢႆးလုၵ်ႉၽိုၼ်ႉတီႇမူဝ်ႇၶရေႇၸီႇၸိူဝ်ႉ ၸၢတ်ႈ တၵ်းလႆႈဢွင်ႇပေႉ တၵ်းလႆႈဢွင်ႇပေႉ ၸဵမ်ၸိူဝ်းၼႆႉ လႄႈ ထိုင်မႃးၶၢဝ်းယၢမ်း ၵၢင်ၼႂ် 09:05 မူင်း ယူႇတီႈၽူႈ ၶပ်ႉပၢင် ပိုၼ်ၽၢဝ်ႇ ပၢင်ၵႅဝ်ႈဢွင်ႇမၢၼ်ယဝ်ႉ တူဝ်ႈ ၵႂႃႇလီငၢမ်းယူႇယဝ်ႉ။

#shanstateprogressparty

#shanstatearmy

#SSPPInfo

#ဝၼ်းၸိူဝ်ႉၸၢတ်ႈၸိုင်ႈတႆး77ပီႊ