ပႃႇတီႇမႂ်ႇသုင်ၸိုင်ႈတႆးတပ်ႉသိုၵ်းၸိုင်ႈတႆး SSPP/SSA ပွႆႇပၼ်ၶိုၼ်း ၽူႈမီးတၢင်းၽိတ်း ဢၼ်ပူၼ်ႉပႅၼ်ပၵ်းပိူင် လၵ်းမၢႆ လႄႈ ဢၼ်လႆႈတိၺွပ်းၵုမ်းၶင်ဝႆႉၸူဝ်ႈၶၢဝ်း ၼႂ်း ၸေႈဝဵင်းၼမ်ႉလၼ်ႈၼၼ်ႉ ၼႆယူႇယဝ်ႉ ။
မိူဝ်ႈဝၼ်းထီႉ 07/01/2024 ၼၼ်ႉ ယူႇတီႈ ၽူႈမီးပုၼ်ႈ ၽွၼ်း ၾၢႆႇဢုပ်ႉပိူင်ႇ ပႃႇတီႇမႂ်ႇသုင်ၸိုင်ႈတႆးတပ်ႉသိုၵ်း ၸိုင်ႈတႆးၼႂ်းၼႃႈတီႈဢုပ်ႉပိူင်ႇ ၸေႈဝဵင်းမၢႆ(26) ဝဵင်းၼမ်ႉလၼ်ႈ ၵိင်ႇၽႄၸေႈဝဵင်းသီႇပေႃႉ လႆႈပွႆႇတူဝ်ပၼ်ၶိုၼ်း ၽူႈမီးတၢင်းၽိတ်း ဢၼ်ပူၼ်ႉပႅၼ်ပၵ်းပိူင်လၵ်းမၢႆ လၵ်ႉယႃႉၶဝ်ႈႁိူၼ်း ဢၼ်ထုၵ်ႇႁေႉႁၢမ်ႈဝႆႉ တီႈၼႂ်းပွၵ်ႉ ၸၢၼ်း ၸေႈဝဵင်းၼမ်ႉလၼ်ႈ ၵိင်ႇၽႄၸေႈဝဵင်းသီႇပေႃႉ ၼၼ်ႉ ၼႆယူႇယဝ်ႉ။
ၽူႈမီးတၢင်းၽိတ်းဢၼ်ပွႆႇပၼ်တူဝ်ၶိုၼ်းၼႆႉ ၸိုဝ်ႈႁွင်ႉ ၸၢႆးၸွမ်ၽူင်း ဢႃႇယု (20) ပီႊ ပဵၼ်လုၵ်ႈၸၢႆး လုင်းသၢင်ႇ ၶွင်ႇ+ပႃႈၶမ်ႈဢွင်ႇ ယူႇပွၵ်ႉၸၢၼ်း ဝဵင်းၼမ်ႉလၼ်ႈ ၵိင်ႇ ၽႄၸေႈဝဵင်းသီႇပေႃႉၼႆယူႇယဝ်ႉ။
ၸၢႆးၸွမ်ၽူင်း ၼႆႉ ယွၼ်ႉဝႃႈ ဢမ်ႇလႆႈၶႂၢင်ႉၽူႈမီးပုၼ်ႈ ၽွၼ်း သေ မိူဝ်ႈဝၼ်းထီႉ 03/01/2024 ၼၼ်ႉ မၼ်းၸၢႆး လႆႈယႃႉလႅဝ်သေႃးႁိူၼ်း လၵ်ႉၶဝ်ယူႇၼႂ်းႁိူၼ်း ဢၼ်ထုၵ်ႇႁေႉႁၢမ်ႈဝႆႉ ၼႂ်းပွၵ်ႈၸၢၼ်းဝဵင်းၼမ်ႉလၼ်ႈ ၼၼ်ႉလႄႈ ယူႇတီႈၽူႈမီး ပုၼ်ႈၽွၼ်း ၸင်ႇလႆႈတိၺွပ်းၵုမ်းၶင်တူဝ်ဝႆႉၸူဝ်ႈၶၢဝ်း ၼႆယူႇယဝ်ႉ။
ဝၢႆးၼၼ်ႉ ယူႇတီႈၽူႈမီးပုၼ်ႈၽွၼ်း ၾၢႆႇဢုပ်ႉပိူင်ႇ ပႃႇတီႇမႂ်ႇသုင်ၸိုင်ႈတႆးတပ်ႉသိုၵ်းၸိုင်ႈတႆး SSPP/SSA ၸင်ႇလႆႈႁွင်ႉထူပ်း ဢူႈမႄႈပီႈၼွင်ႉ ၸၢႆးၸွမ်ၽူင်း သေ သပ်းလႅင်းၼႄ လွင်ႈပိူင်ပဵၼ်လီငၢမ်းယဝ်ႉ ပေႃႈမႄႈပီႈၼွင်ႉ ၸၢႆးၸွမ်ၽူင်း ၸင်ႇလႆႈ လူင်းလၢႆးမိုဝ်း ႁပ်ႉႁွင်းဝႆႉဝႃႈ ၵဵဝ်ႇလူၺ်ႈၵၢၼ်ပူၼ်ႉပႅၼ်ပၵ်းပိူင်လၵ်းမၢႆၼၼ်ႉ တေဢမ်ႇပၼ်ပဵၼ် ဢမ်ႇပၼ်မီးထႅင်ႈၼႆလႄႈ ယူႇတီႈၽူႈမီးပုၼ်ႈ ၽွၼ်း ၾၢႆႇဢုပ်ႉပိူင်ႇ SSPP/SSA ၵေႃႈ လႆႈဢဝ်တူဝ် ၸၢႆး ၸွမ်ၽူင်း ဢၢပ်ႈပၼ်ၶိုၼ်း တီႈဢူႈမႄႈပီႈၼွင်ႉၵႂႃႇ လီငၢမ်းယူႇယဝ်ႉ။
