ယိူင်းဢၢၼ်း ပိူဝ်ႈတႃႇ ပၢႆးတူဝ် ၊ ပၢႆးၸႂ် လႄႈ ပိူဝ်ႈတႃႇပၢႆးယူႇလီ ၊ တႃႇၵၢင်းယၢၼ် ၽေးယႃႈမဝ်းၵမ် ၊ တႃႇမေႃၽွမ်ႉသဵင်ပဵင်းပၢၵ်ႇၵၼ်ၼႆသေ ယူႇတီႈႁွင်ႈၵၢၼ်ၵူၼ်းၼုမ်ႇ ငဝ်ႈငုၼ်း ဢွၼ်ႁူဝ်သေ ႁူမ်ႈတင်းၸုမ်းၾၢႆႇပၢႆးပိင်ႇ ၺႃႇ ငဝ်ႈငုၼ်း ပႃႇတီႇမႂ်ႇသုင်ၸိုင်ႈတႆးတပ်ႉသိုၵ်းၸိုင်ႈတႆး SSPP/SSA လႆႈၸတ်းႁဵတ်း ပၢင်လဵၼ်ႈႁႅင်းၶႄႉၶဵင်ႇပိတ်ႉ မၢၵ်ႇၼင်လွမ်ႈ ဢွင်ႈတီႈ ဝၢင်းပိတ်ႉမၢၵ်ႇၼင်လွမ်ႈ ဝဝၢၼ်ႈပဵင်း ဢိူင်ႇၶုမ်ႇပၢင်ႇ ၸေႈဝဵင်းဝၢၼ်ႈႁႆး ၸိုင်ႈတႆးပွတ်းၸၢၼ်း ၼႆယူႇယဝ်ႉ။
ပၢင်ၶႄႉၶဵင်ႇလဵၼ်ႈႁႅင်း ပိတ်ႉမၢၵ်ႇၼင်ႁိမ်ဢုပ်းၵႅဝ်ႈၶမ်း ပွၵ်ႈၵမ်း (5) ၼႆႉ တေႇမိူဝ်ႈဝၼ်းထီႉ15-12-2023 ၼၼ်ႉ သေ ဢွင်ႇမၢၼ်ယဝ်ႉတူဝ်ႇၵႂႃႇၼႂ်း ဝၼ်းထီႉ 04 -01-2024 ၼၼ်ႉလႄႈ ၼႂ်းၼၼ်ႉ မီးၸုမ်း ၵူၼ်းၼုမ်ႇ ပိတ်ႉမၢၵ်ႇၼင်လွမ်ႈ (20) ၸုမ်း ၶဝ်ႈႁူမ်ႈလဵၼ်ႈႁႅင်း ၶႄႉၶဵင်ႇပိတ်ႉမၢၵ်ႇၼင်လွမ်ႈ ၸွမ်းယူႇယဝ်ႉ။
ၸုမ်း ၶဝ်ႈႁူမ်ႈၶႄႇၶဵင်ႇ (20)ၸုမ်းၼၼ်ႉ ၸုမ်းၵူၼ်းၼုမ်ႇ ဝၢၼ်ႈၶုမ်ႇပၢင်(ၵ) (FC )၊ၸုမ်းၵူၼ်းၼုမ်ႇ ဝၢၼ်ႈဝ (FC) ၊ၸုမ်းဝၢၼ်ႈၵိဝ်ႇ (FC)၊ ၸုမ်းပၢင်ႇလေႃႉ (FC) ၊ႁူင်းႁဵၼ်း ၽူႈမီးၸၼ်ႉ (FC)၊ၸုမ်းမိူင်းသူႈ (FC) ၊ ၸုမ်းဝဵင်း ၵဝ်ႇ (FC )၊ ၸုမ်းပၢင်ၶၢၼ် (FC)၊ ၸုမ်းဝၢၼ်ႈႁႆး (ၶ) (FC) ၊ ၵွင်းမူးၶမ်း (FC)၊ ၸုမ်းဝၢၼ်ႈႁႆး (ၵ) FC ၊ ၸုမ်းၵေးသီး (FC)၊ ၸုမ်းၵုၼ်ႁုင်း (FC )၊ ၸုမ်းၽၵ်းၼၢမ် (FC) ၊ၸုမ်း ၶုမ်ႇပၢင် (ၶ) (FC) ၊ ၸုမ်းတၢင်းၽႄ (FC) ၊ ၸုမ်းၼေႃႇတႅၼ်းၶိူဝ်း (FC) ၊ ၸုမ်းၼမ်ႉတႅၵ်ႉ (FC) ၊ ႁူင်းယႃလူင် ငဝ်ႈငုၼ်း (FC ) လႄႈ ၸုမ်းဝၢၼ်ႈလူၺ် (FC) ၸဵမ်ၸိူဝ်း ၼႆႉယူႇယဝ်ႉ။
ၼႂ်းပၢင်ၶႄႉၶဵင်ႇလဵၼ်ႈႁႅင်းပိတ်ႉမၢၵ်ႇၼင်လွမ်ႈ ၼၼ်ႉ ၸုမ်းဝၢၼ်ႈႁႆး (ၶ)(FC) လႆႈသူးထီႉ (1) ၊ ၸုမ်းဝၢၼ်ႈႁႆး(ၵ) (FC) လႆႈသူးထီႉ(2) ၊ ၸုမ်းၵူၼ်း ၼုမ်ႇတၢင်းၽႄ လႆႈသူးထီႉ (3) သေ ယူႇတီႈငဝ်ႈငုၼ်း SSPP/SSA လႆႈယိုၼ်ႈမွပ်ႈပၼ် သူးထီႉ(1) ဢုပ်းၵႅဝ်ႈၶမ်း သူးငိုၼ်း (1,500,000) သိပ်းႁႃႈသႅၼ်ၵျၢပ်ႈ ၊ သူးထီႉ(2) (1,200,000) သိပ်းသွင်သႅၼ်ၵျၢပ်ႈ ၊ သူးထီႉ(3) (1,000,000) သိပ်းသႅၼ်ၵျၢပ်ႈ ၊ သူးၶတ်းၸႂ် ဢၼ်ၵတ်ႉၶႅၼ်ႇ ၶႅမ်ႉသုတ်း ၵူၼ်းပႂ်ႉၵူဝ်း (5) ၵေႃႉ ၼိုင်ႈၵေႃႉလႂ် (100,000) ၼိုင်ႈသႅၼ်ၵျၢပ်ႈ လႄႈ သူးလဝ်ႇၸႂ် ၼိုင်ႈၸုမ်း (500,000) ႁႃႈသႅၼ်ၵျၢပ်ႈ ၸဵမ်ၸိူဝ်းၼႆႉ ယူႇယဝ်ႉ။
ယိူင်းဢၢၼ်း ပိူဝ်ႈတႃႇၵူၼ်းၼုမ်ႇတႆး/ၼႂ်းမိူင်းတႆးႁဝ်း ပေႃးတေမီးလွင်ႈၸမ်ၸႂ်မိုတ်ႈၵိုဝ်းၵၼ် ၊ ႁႂ်ႈမေႃ ၽွမ်ႉသဵင်ပဵင်းပၢၵ်ႇၵၼ် ၊ ႁႂ်ႈၵၢင်းယၢၼ်ၽေးယႃႈမဝ်းၵမ် ၸဵမ်ၸိူဝ်းၼႆႉသေ ယူႇတီႈငဝ်ႈငုၼ်းပႃႇတီႇမႂ်ႇသုင် ၸိုင်ႈတႆးတပ်ႉသိုၵ်းၸိုင်ႈတႆး SSPP/SSA ၵေႃႈ လႆႈၸတ်းႁဵတ်းပၢင်ၶႄႉ ၶဵင်ႇ လဵၼ်ႈႁႅင်း ပိတ်ႉမၢၵ်ႇၼင်လွမ်ႈမႃး ၵူႈပီႊပီႊ ယူႇယဝ်ႉ။
ၼင်ႇႁိုဝ်ၼႂ်းပိုၼ်ႉတီႈ ၼႃႈတီႈဢုပ်ႉပိူင်ႇ SSPP/SSA တီႈလႂ် တီႈၼၼ်ႈ ပေႃးတေမီးမႃး ပၢင်ၶႄႉၶဵင်ႇလဵၼ်ႈႁႅင်းပိတ်ႉမၢၵ်ႇၼင်လွမ်ႈၼၼ်ႉ ဢိင်ၼိူဝ်ငဝ်းလၢႆးလွင်ႈၼိမ် သဝ်းၼႂ်းပိုၼ်ႉတီႈပၼ်လႄႈ ယူႇတီႈပႃႇတီႇမႂ်ႇသုင်ၸိုင်ႈတႆး တပ်ႉသိုၵ်းၸိုင်ႈတႆး SSPP/SSA ၵေႃႈ ၵႃႈၼင်ႇပွင်ပဵၼ်လႆႈ တေႁူမ်ႈမိုဝ်းၸွမ်း ၸုမ်းၵူၼ်းၼုမ်ႇ ၼႂ်းပိုၼ်ႉတီႈသေ ၶတ်းၸႂ် ၸွႆႈၵၼ် ၶိုင်ပွင် ႁဵတ်းသၢင်ႈၵႂႃႇၸွမ်းငဝ်းလၢႆး ယူႇယဝ်ႉ။
#shanstateprogressparty
#shanstatearmy
#SSPPInfo
#ၸုမ်းၵူၼ်းၼုမ်ႇငဝ်ႈငုၼ်း
#ငဝ်ႈငုၼ်း
#ပၢင်ၶႄႉၶဵင်ႇလဵၼ်ႈႁႅင်းပိတ်ႉမၢၵ်ႇၼင်
