ၾၢႆႇၶွင်ႇသီႇဢုပ်ႉပိူင်ႇၸိုင်ႈမိူင်း မိူင်းမၢၼ်ႈ ဢွၵ်ႇလိၵ်ႈ ၸိသင်ႇ ပုတ်ႈလႅၵ်ႈ ၽူႈၵိူဝ်းၵုမ် ၾၢႆႇႁူမ်ႇလူမ်ႈၸိူဝ်ႉၸၢတ်ႈ ၼႆ သိုဝ်ႇၶၢဝ်ႇ မျႃႉဝတီႇ ဢၼ်ယူႇၾၢႆႇတႂ်ႈ ၶွင်ႇသီႇသိုၵ်းမၢၼ်ႈၵုမ်းၵမ်ၼၼ်ႉ ဢွၵ်ႇၶၢဝ်ႇဝႆႉ ၼင်ႇၼႆ။

ၵႅမ်ၸွမ်ၸိၵ်းသိုၵ်းမၢၼ်ႈ သူဝ်းဝိၼ်း လၢတ်ႈၵႂႃႇတီႈၼႂ်း ပၢင်ၵုမ်တႃႇဢုပ်ႇဢူဝ်း လွင်ႈတေ ၶိုင်ပွင်ပၢင်ပွႆး ဝၼ်းၶွပ်ႈၶူပ်ႇ (77) ပီႊ ဝၼ်းမိူင်းႁူမ်ႈတုမ် ဢၼ်ၸတ်းႁဵတ်း တီႈလုမ်း ၾၢႆႇၶွင်ႇသီႇဢုပ်ႉပိူင်ႇၸိုင်ႈမိူင်း တီႈၼေႇပျီႇတေႃႇ မိူဝ်ႈဝၼ်းထီႉ 08/01/2024 ၼၼ်ႉဝႃႈ- ၼႃႈၵၢၼ်ပုၼ်ႈၽွၼ်း ၽူႈၵိူဝ်းၵုမ် ၾၢႆႇႁူမ်ႇလူမ်ႈၸိူဝ်ႉၸၢတ်ႈၸိုင်ႈမိူင်း ဢၼ် ၸွမ်သိုၵ်း ယႃႇပျေႃႉ ဢဝ်ပုၼ်ႈၽွၼ်းဝႆႉမိူဝ်ႈပူၼ်ႉမႃး ၼၼ်ႉ ၾၢႆႇၶွင်ႇသီႇဢုပ်ႉပိူင်ႇၸိုင်ႈမိူင်း ဢွၵ်ႇလိၵ်ႈၸိသင်ႇ တေၶိုၼ်းပုတ်ႈလႅၵ်ႈပၼ် ႁႂ်ႈပဵၼ် ၸွမ်ၽွင်းလူင်ၾၢႆႇမိူင်း ႁူမ်ႈတုမ် ၸွမ်သိုၵ်း မူဝ်းဢွင်ႇ သိုပ်ႇပုတ်ႈႁပ်ႉပဵၼ် ၽူႈၵိူဝ်းၵုမ် ၾၢႆႇႁူမ်ႇလူမ်ႈၸိူဝ်ႉၸၢတ်ႈၸိုင်မိူင်း ၵႂႃႇၼႆယူႇယဝ်ႉ။

ၸွမ်သိုၵ်းမူဝ်းဢွင်ႇ ဢၼ်လႆႈႁပ်ႉပုၼ်ႈၽွၼ်းပဵၼ် ၽူႈၵိူဝ်းၵုမ် ၾၢႆႇႁူမ်ႇလူမ်ႈၸိူဝ်ႉၸၢတ်ႈၼႆႉ မိူဝ်ႈပူၼ်ႉမႃး ယၢမ်ႈပဵၼ် ၽူႈၵွၼ်းၾၢႆႇႁူမ်ႇလူမ်ႈတပ်ႉၼမ်ႉ သေ ယူႇတီႈ ၸွမ်ၸိၵ်းသိုၵ်းမၢၼ်ႈ မိၼ်းဢွင်ႇလႅင်ႇ လႆႈၸိသင်ႇပူတ်းလိုဝ်ႈပႅတ်ႈၼႃႈၵၢၼ်ပုၼ်ႈၽွၼ်းၸွမ်သိုၵ်းမူဝ်းဢွင်ႇ လႄႈ ဢွင်ႈတီႈၽူႈၵွၼ်းၾၢႆႇ ႁူမ်ႇလူမ်ႈတပ်ႉၼမ်ႉၼၼ်ႉ ၶိုၼ်းဢဝ် ၸွမ်သိုၵ်း သွႆးဝုၼ်းမိၼ်ႉ ႁပ်ႉဢဝ်ပုၼ်ႈၽွၼ်းဝႆႉ ၼႆယူႇယဝ်ႉ။

ၸူဝ်ႈၶၢဝ်းၶွင်ႇသီႇသိုၵ်းမၢၼ်ႈ သုမ်းၵၢၼ်ႉပၢင်တိုၵ်း ၼမ်မႃး ၼႂ်းၸိုင်ႈတႆးပွတ်းႁွင်ႇၼႆႉ လႆႈႁၼ်ၾၢႆႇၶွင်ႇသီႇသိုၵ်းမၢၼ်ႈ ၵႆႉ မီးလွင်ႈပုတ်ႈလႅၵ်ႈ ၼႃႈၵၢၼ်ႈပုၼ်ႈၽွၼ်း ၼႂ်း ၽူႈမီးၸၼ်ႉသုင် လၢႆလၢႆၵေႃႉ ယူႇယဝ်ႉ။

Photo – Credit မြဝတီသတင်းစာ

#shanstateprogressparty

#shanstatearmy

#SSPPInfo

#ပုတ်ႈလႅၵ်ႈ

#ၶွင်ႇသီႇသိုၵ်းမၢၼ်ႈ