ပၢင်ၵုမ်လူင် ၾၢႆႇၽွင်းလူင်ၼွၵ်ႈမိူင်း မိူင်းဢႃႇသီႇယၼ်ႇ ဢၼ်ၸတ်းႁဵတ်းၵႂႃႇ တီႈၸေႈဝဵင်း လုၼ်ႇပရႃႇပၼ်ႇ ၼႂ်း ၸိုင်ႈမိူင်းလၢဝ်း(လႃႇဢူဝ်ႇ) မိူဝ်ႈဝၼ်းထီႉ 28-29/01/2024 ၶၢဝ်းတၢင်း (2) ဝၼ်း ၼၼ်ႉ ၾၢႆႇႁွင်ႈ ၵၢၼ် ၽွင်းလူင်ၼွၵ်ႈ မိူင်းၶွင်ႇသီႇသိုၵ်းမၢၼ်ႈ သူင်ႇတူဝ်တႅၼ်း ဢၼ်ပဵၼ်ၽွင်းလူင် တေႃႇမႃႇလႃႇတၢၼ်း ၵႂႃႇ ၶိုၼ်ႈႁွတ်ႈ ၶဝ်ႈႁူမ်ႈၸွမ်း ၼႆ ယူႇယဝ်ႉ။

ၵဵဝ်ႇလူၺ်ႈလွင်ႈဢၼ် ၾၢႆႇၶွင်ႇသီႇသိုၵ်းမၢၼ်ႈ လႆႈသူင်ႇတူဝ်တႅၼ်း ၶိုၼ်ႈႁွတ်ႈၼႂ်းပၢင်ၵုမ် ဢႃႇသီႇယၼ်ႇပွၵ်ႈၵမ်း ၼႆႉသေ ၽူႈလဵပ်ႈႁဵၼ်းၵၢၼ်မိူင်းၵမ်ႈၽွင်ႈၼပ်ႉသၢင်ႈဝႃႈ ၾၢႆႇၶွင်ႇသီႇသိုၵ်းမၢၼ်ႈ ဢမ်ႇၶိုၼ်ႈႁွတ်ႈ ပၢင်ၵုမ်ဢႃႇသီႇ ယၼ်ႇၼႆႉ မီးၶၢဝ်းတၢင်း(2) ပီႊပၢႆယဝ်ႉ ၊ ယွၼ်ႉၾၢႆႇသိုၵ်းမၢၼ်ႈ ထုၵ်ႇၺႃးၸုမ်းလုၵ်ႉၽိုၼ်ႉၶဝ် ၶဝ်ႈတိုၵ်း ၵူႈၾၢႆႇ ၾၢႆႇ ထိုင်တီႈမီးလွင်ႈတူၵ်းသုမ်းၼမ် ယွၼ်ႉၼၼ် ၾၢႆႇၶွင်ႇသီႇသိုၵ်းမၢၼ်ႈၶဝ် ၶႆႈႁႃတၢင်းဢွၵ်ႇ လူၺ်ႈတၢင်းၵၢၼ်မိူင်းၵေႃႈ ၸၢင်ႈပဵၼ်လႆႈယူႇ ၊ လိူဝ်သေၼၼ်ႉၵေႃႈ မိူင်းလၢဝ်း ဢၼ်လႆႈႁပ်ႉပုၼ်ႈၽွၼ်းပဵၼ်ႁူဝ်ပဝ်ႈ မိူင်းဢႃႇသီႇယၼ်ႇ ၼႂ်းပီႊ 2024 ၼႆႉ ယၢမ်ႈလၢတ်ႈဝႆႉဝႃႈ ၵဵဝ်ႇလူၺ်ႈလွင်ႈမိူင်းႁူမ်ႈတုမ်မိူင်းမၢၼ်ႈသေ ထုၵ်ႇလီဝႆႉၼမ်ႉ ၼၵ်း တိတ်းတေႃႇၵပ်းသိုပ်ႇၸွမ်းၾၢႆႇၶွင်ႇသီႇသိုၵ်းမၢၼ်ႈ ၼႆလႄႈ ၸၢင်ႈၶဝ်ႈလွၵ်း တႃႇၶွင်ႇသီႇသိုၵ်းမၢၼ်ႈ တေလဵၼ်ႈၵၢၼ်မိူင်း သေ ၵႄႈ လိတ်ႈပၼ်ႁႃမၼ်းၵႂႃႇယူႇ ဝႃႈ ၼႆ။

ဝၢႆးၶွင်ႇသီႇသိုၵ်းမၢၼ်ႈ ယိုတ်းသိမ်းဢႃႇၼႃႇၸိုင်ႈမိူင်းမႃးၼၼ်ႉ ယူႇတီႈမိူင်းဢႃႇသီႇယၼ်ႇ ဢမ်ႇႁၼ်လီၸွမ်း လၢႆး ႁဵတ်းသၢင်ႈၶွင်ႇသီႇသိုၵ်းမၢၼ်ႈသေ မိူဝ်ႈၼႂ်းလိူၼ် ဢွၵ်ႇတူဝ်ႇပိူဝ်ႊ 2021 ၼၼ်ႉ ယူႇတီႈဢႃႇသီႇယၼ်ႇ လႆႈပိၵ်ႉႁၢမ်ႈဝႆႉ ဢမ်ႇပၼ်ၽူႈမီးၸၼ်ႉ ၼႂ်းၶွင်ႇသီႇသိုၵ်းမၢၼ်ႈၶဝ်ၶိုၼ်ႈႁွတ်ႈၸွမ်း ၼႂ်းပၢင်ၵုမ်ဢႃႇသီႇယၼ်ႇၼႆ လႄႈ ၾၢႆႇၶွင်ႇသီႇ သိုၵ်းမၢၼ်ႈ မီးလွင်ႈဢမ်ႇႁၢၼ်ႉၸႂ် တိုၼ်းဢမ်ႇသူင်ႇတူဝ်တႅၼ်း ၶဝ်ႈႁူမ်ႈၸွမ်း ၼႂ်းပၢင်ၵုမ်ဢႃႇသီႇယၼ်ႇ ၼႆႉ မီးမႃး ၶၢဝ်းတၢင်း (2) ပီႊပၢႆယူႇ ယဝ်ႉ။

Photo- Credit

#shanstateprogressparty

#shanstatearmy

#SSPPInfo

#ဢႃႇသီႇယၼ်ႇ