ဢိင်ၼိူဝ်ပၢင်တိုၵ်း ၼႂ်းမိူင်းတႆးပွတ်းႁွင်ႇ​​ၶၢဝ်းတၢင်း လၢႆလိူၼ်​​သေ သဵၼ်ႈတႃႈသၢႆတၢင်း ၶူဝ်ၶၢတ်ႇၵွႆ လႄႈ ၵူၼ်းမိူင်း ၵႂႃႇမႃးယၢပ်ႇၵိၼ်းႁႅင်း ၼိူဝ်သဵၼ်ႈတၢင်းၵႂႃႇ ဝဵင်းလိူဝ်ႇ -လႃႈသဵဝ်ႈ- မူႇၸေႈ ၸိုင်ႈတႆးပွတ်းႁွင်ႇၼႆယူႇယဝ်ႉ။

ပၢင်တိုၵ်း 1027 လႄႈ ၶွင်ႇသီႇသိုၵ်းမၢၼ်ႈ မႃးၼႆႉ သဵၼ်ႈတၢင်းၵႃး၊ ၶူဝ်ၶၢတ်ႇလူႉၵွႆ မိူၼ်ၼင်ႇ ၶူဝ်ၼမ်ႉသိမ်ႇ ဢၼ်မီးၼႂ်းဝူင်ႈၵၢင် ၵျွၵ်ႉမႄး – သီႇပေႃႉ ၊ ၶူဝ်တႃႈတႄႈ သဵၼ်ႈတၢင်း သီႇပေႃႉ – ၼမ်ႉတူႈ၊ ၶူဝ်ၼမ်ႉမ ၸေႈဢႅၼ်ႇ ၼႃးလၢင်း ဝူင်ႈၵၢင် သီႇပေႃႉ – လႃႈသဵဝ်ႈ၊ ၶူဝ်ၼမ်ႉတူႈ – လႃႇသဵဝ်ႈ ၸိူဝ်းၼႆႉ သဵၼ်ႈတၢင်းၵႂႃႇမႃး ၶၢတ်ႇဝႆႉ​​သေ ၵူၼ်းမိူင်းၸိူဝ်းလူဝ်ႇၵႂႃႇ လူဝ်ႇပႆ လႆႈၸႂ်ႉတၢင်းထိူၼ်ႇ တၢင်းၵျၢမ်း လႄႈ မီးလွင်ႈယၢပ်ႇၽိုတ်ႇႁႅင်း ။

ၸဝ်ႈလႅင်းၵႃး ၵေႃႉၼိုင်ႈလၢတ်ႈၼႄဝႃႈ “ ယၢမ်းလဵဝ် ႁဝ်းၶႃႈလႅၼ်ႈလႅင်းၵႃး လႃႈသဵဝ်ႈ၊ မူႇ​​ၸေႈ၊ ဝဵင်းလိူဝ်ႇ ၸိူဝ်းၼႆႉ လႆႈ​​ႁေႃႈတၢင်းၵျၢမ်းတၢင်းၵႆ ၸွမ်းႁူၺ်ႈလွႆ ၶၢဝ်းတၢင်း (4) ဝၼ်းတေႃႇ (5) ဝၼ်းဢေႃႈ၊ ပေႃးၸွမ်းတၢင်း ဢမ်ႇပဵၼ်သင်လႄႈ ဢမ်ႇမီးၵႃးၶမ် တႄႉ မွၵ်ႈ (3) တေႃႇ (4) ဝၼ်း၊ ​​ပေႃးၵႃးၶမ် လႆႈၸၢင်ႈပိူၼ်ႈတိုတ်ႉၸၼ် 30,000 မိုၼ်ႇထိုင် 50,000 မိုၼ်ႇ ၊ ၵႃးလူႉၵွႆၼမ် ၸိူဝ်းၼႆၶႃႈ​​ဢေႃႈ ဝႃႈၼႆ ။

ပၢင်တိုၵ်း 1027 ယဵၼ်ဝႆႉၸူဝ်ႈၶၢဝ်း​​သေတႃႉ ၵွပ်ႈပိူဝ်ႈသဵၼ်ႈတၢင်းၶၢတ်ႇဝႆႉ လႄႈ ၶူဝ်းၵုၼ်ႇၵူႈမဵဝ်း ၶၼ်ၶိုၼ်ႈသုင်ႁႅင်း ၶူဝ်းၽုၵ်ႇသွမ်ႈ ဢမ်ႇၸၢင်ႈၶၢႆလႆႈလီ ၵူၼ်းမိူင်း​​ၵေႃႈ ပႆႇလႆႈၸႂ်ႉတိုဝ်းသဵၼ်ႈတၢင်းလီ လႄႈ ဢိင်ၼိူဝ်လွင်ႈႁူမ်ႇလူမ်ႈ သၢႆၸႂ်​​ၵေႃႈတိုၵ်ႉလႆႈၵူဝ် ယွၼ်ႉသဵၼ်ႈတၢင်းၵႂႃႇမႃးသမ်ႉလႆႈၸႂ်ႉၶၢဝ်းယၢမ်းႁိူင် ၼႆယူႇယဝ်ႉ။#shanstateprogressparty

#shanstatearmy

#SSPPInfo

#သဵၼ်ႈတႃႈသၢႆတၢင်း