ယွၼ်ႉသၢႆသိုၵ်းၵဝ်ႈၵၢင်ႉ MNDAA ၶဝ်ႈဢဝ်တီႈယူႇ ထိုင် ၼႂ်းဝၢၼ်ႈ တၢၼ်ႇလုၼ်ႇ ထုင်ႉၼမ်ႉပွင်ႈ ၸေႈဝဵင်းလႃႈ သဵဝ်ႈလႄႈ ၵူၼ်းဝၢၼ်ႈၵူဝ်ပဵၼ်ပၢင်တိုၵ်း ၵူဝ်ႁိူဝ်းမိၼ်ၵႂႃႇ ပွႆႇမၢၵ်ႇသေ လႆႈဢွၼ်ၵၼ် ပွႆႇပႅတ်ႈႁိူၼ်းယေး တိူၵ်ႇႁႆႈလွၵ်း ၼႃး ငိူင်ႉပၢႆႈထႃႈ ၵမ်ႈၽွင်ႈၼႆယူႇယဝ်ႉ။

မိူဝ်ႈဝၼ်းထီႉ 22/01/2024 မိူဝ်ႈၶၢဝ်းယၢမ်း ၵၢင်ၼႂ် 8:00 မူင်းၼၼ်ႉ သၢႆသိုၵ်း ၵဝ်ႈၵၢင်ႉ MNDAA ႁႅင်းသိုၵ်း မွၵ်ႈ (100) ၵေႃႉႁိမ်းႁွမ်း တူင်ႉၼိုင် ၶဝ်ႈၽႅဝ်ထိုင် ၼႂ်းဝၢၼ်ႈ တၢၼ်ႇလုၼ်ႇ ဢိူင်ႇတၢၼ်ႇလုၼ်ႇ ထုင်ႉၼမ်ႉပွင်ႈ ၸေႈဝဵင်းလႃႈသဵဝ်ႈလႄႈ ၵူၼ်းဝၢၼ်ႈဢွၼ်ၵၼ်မႆႈၸႂ် ၵူဝ်ပဵၼ်ပၢင် တိုၵ်းၼႂ်းဝၢၼ်ႈ ၵူဝ်ၾၢႆႇသိုၵ်းမၢၼ်ႈ ၸႂ်ႉၵွင်ႈလူင် ၊ ၸႂ်ႉ ႁိူဝ်းမိၼ်သေ တိုၵ်းယိုဝ်း ယွၼ်ႉၼၼ် ၵူၼ်းဝၢၼ်ႈ ၸၢႆး (19) ၵေႃႉ ၊ ယိင်း(21) ၵေႃႉ ႁူမ်ႈသဵင်ႈ (40) ၵေႃႉ ဢွၼ် ၵၼ်ပၢႆႈၵႂႃႇ သွၼ်ႈသဝ်းဝႆႉတီႈ ဝတ်ႉၵျွင်းမုၼ်ၸဝ်ႈ ၵျွင်းသၢင်ႇၶမ်း ဝၢၼ်ႈၵုင်းပဝ်း ဢိူင်ႇၼႃးၼိဝ်ႉ ၸေႈဝဵင်းလႃႈသဵဝ်ႈ ၼၼ်ႉယူႇယဝ်ႉ။

ၶွင်ႇသီႇသိုၵ်းမၢၼ်ႈ တင်း တပ်ႉသိုၵ်း ၵဝ်ႈၵၢင်ႉ MNDAA ၵႆႉပဵၼ်ပၢင်တိုၵ်းၵၼ်သေ ၶႅင်ႈၶႅင်ၼႃႈသိုၵ်းတေႃႇၵၼ်ဝႆႉ ၼႂ်းထုင်ႉၼမ်ႉပွင်ႈ ၸိူဝ်းႁိမ်းဝၢၼ်ႈတၢၼ်ႇလုၼ်ႇၼႆႉ မီးၶၢဝ်း တၢင်းလိူၼ်ပၢႆ ၊ ၵူၼ်းဝၢၼ်ႈတိုၵ်ႉလွမ်မႆႈၸႂ် ၵူဝ်ပၢင် တိုၵ်းၵိူတ်ႇၶိုၼ်ႈ ၼႂ်းဝၢၼ်ႈၼႂ်းသူၼ် ၼႆယူႇယဝ်ႉ။#shanstateprogressparty

#shanstatearmy

#SSPPInfo #ၵူၼ်းပၢႆႈၽေး

#ထုင်ႉၼမ်ႉပွင်ႈ