လူတ်ႉၵႃးၵူၼ်းမိူင်း လမ်းၼိုင်ႈ ၽွင်းတိုၵ်ႉလုၵ်ႉၾၢႆႇၸေႈဝဵင်းသီႇပေႃႉ တေဢၢၼ်းတႆႇၶူဝ်တႃႈတေႈ သေ ဢၢၼ်းမိူဝ်း ၾၢႆႇၸေႈဝဵင်းၼမ်ႉတူႈၼၼ်ႉ မၢၵ်ႇလူတ်ႉၾၢႆႇၼႃႈယဵပ်ႇၺႃးမၢၵ်ႇ လႄႈ မၢၵ်ႇတႅၵ်ႇတိူဝ်ႉၺႃးလူတ်ႉၵႃးလူႉၵွႆ ၊ ၵူၼ်းႁေႃႈၵႃးလႆႈတၢင်းမၢတ်ႇၸဵပ်းၸွမ်း ၼႆယူႇယဝ်ႉ။

မိူဝ်ႈဝႃးဝၼ်းထီႉ 22/01/2024 ၶၢဝ်းယၢမ်း 11:35 မူင်း ၼၼ်ႉ လူတ်ႉၵႃး ၵူၼ်းမိူင်း တၢင်ႇၶူဝ်းၵုၼ်ႇ လမ်းၼိုင်ႈ လုၵ်ႉတၢင်းၾၢႆႇဝဵင်းသီႇပေႃႉ ဢၢၼ်းၶၢမ်ႈ ၶူဝ်တႃႈတေႈ ဢၼ်မီးႁိမ်းဝၢၼ်ႈတႃႈတေႈ ဢိူင်ႇတႃႈတေႈ ၸေႈဝဵင်းသီပေႃႉ တီႈၼႃႈလိၼ်ၶႅၼ်ႈသီႇပေႃႉ-ၼမ်ႉတူႈ ၼၼ်ႉလႄႈ တေဢၢၼ်းမိူဝ်းၾၢႆႇ ၸေႈဝဵင်းၼမ်ႉတူႈ မိူဝ်ႈၽွင်းၸမ်ၽႅဝ်ၼိူဝ်ၶူဝ်တႃႈတေႈၼၼ်ႉ မၢၵ်ႇလူတ်ႉတၢင်းၼႃႈ ယဵပ်ႇ ၺႃးမၢၵ်ႇမႅင်းၾၢင်လိၼ်လုၵ်ႈၼိုင်ႈ တႅၵ်ႇတိူဝ်ႉၺႃးႁူဝ် ၵႃးလူႉၵွႆတၢင်းၼမ် ၽူႈၸၢႆးသႅၼ်းဢႃႇယုႉ (30) ပၢႆ ဢၼ်ပဵၼ် ၵူၼ်းႁေႃႈၵႃးလႆႈတၢင်းမၢတ်ႇၸဵပ်း ၸွမ်းမိုဝ်းၾၢႆႇ ၶႂႃ ၊ ၸွမ်းတူဝ်ၵမ်ႈၽွင်ႈ သေ ၸုမ်းၾၢႆႇၸွႆႈထႅမ် (ၼႄႇသီးမၶျႃး) လႆႈၸွႆႈဢဝ်တူဝ်ၵူၼ်းပဵၼ်သူင်ႇပၼ်တီႈႁူင်းယႃလူင် ဝဵင်းသီႇပေႃႉၼႆယူႇယဝ်ႉ။

ယွၼ်ႉႁွႆးမၢတ်ႇၸဵပ်း ဢၼ်ၸၢၵ်ႇမၢၵ်ႇတိူဝ်ႉၺႃးၼၼ်ႉ ႁၢဝ်ႈႁႅင်းဝႆႉ လႄႈ လုၵ်ႉတီႈႁူင်းယႃလူင်ဝဵင်းသီႇပေႃႉသေ ယူႇတီႈၸုမ်း ၾၢႆႇၸွႆႈထႅမ် (မျၢတ်ႉမုၼ်ႇၸေႇတၼႃႇ) လႆႈ ၶိုၼ်းဢဝ်တူဝ်ၵူၼ်းပဵၼ် သိုပ်ႇသူင်ႇ ယူတ်းယႃတူဝ်ဝႆႉ တီႈႁူင်းယႃလူင်ဝဵင်းလိူဝ်ႇ ၼႆယူႇယဝ်ႉ။

မိူဝ်ႈပူၼ်ႉမႃးဝၼ်းထီႉ 19/01/2024 ၼၼ်ႉၵေႃႈ ထေႃႈ ၵူၼ်းမိူင်း ဝၢၼ်ႈၼႃးၶူဝ်လႅင် ဢိူင်ႇပၢင်လူင် ၸေႈဝဵင်းၼမ်ႉတူႈ လုၵ်ႉတီႈဝၢၼ်ႈၵုၼ်ၸၢင်ႈလဵၵ်း ဢိူင်ႇတႃႈတေႈ ၸေႈဝဵင်းသီႇပေႃႉ သေ တၢင်ႇၶဝ်ႈသၢၼ် ဢၢၼ်းမိူဝ်း ၶိုၼ်းတီႈႁိူၼ်း မိူဝ်ႈၽွင်းႁွတ်ႈၽႅဝ်ၼိူဝ်ၶူဝ်တႃႈတေႈ ၼၼ်ႉ လႆႈယဵပ်ႇၺႃးမၢၵ်ႇမႅင်းၾၢင်လိၼ်လုၵ်ႈၼိုင်ႈ တႅၵ်ႇတိူဝ်ႉ ၺႃးမၢၵ်ႇထေႃႈၾၢႆႇလင် လႆႈလူႉၵွႆၵႂႃႇ ၼႆယူႇယဝ်ႉ။

Photo- ၸုမ်းၸွႆႈထႅမ် (ၼႄႇသီးမၶျႃး)(နယ်စည်းမခြား)

#shanstateprogressparty

#shanstatearmy

#SSPPInfo

#မၢၵ်ႇမႅင်းၾၢင်လိၼ်