ႁူင်းႁဵၼ်းၽူႈမီးၸၼ်ႉ ငဝ်ႈငုၼ်း SSPP/SSA လႆႈၸတ်းႁဵတ်းပၢင်ၵႅဝ်ႈ ပိုတ်ႇၽုၺ်ႇ ပၢင်သွၼ်ၽူႈမီးၸၼ်ႉဢွၼ်ႇ ၸုပ်ႈထီႉ(5) လႄႈ တွၼ်ႈသူးလုၵ်ႈႁဵၼ်း ၸုပ်ႈထီႉ(4) ၼႆယူႇယဝ်ႉ။

မိူဝ်ႈၼႆႉ ဝၼ်းထီႉ 08/01/2024 ၶၢဝ်းယၢမ်း 8 မူင်း ၼၼ်ႉ ယူႇတီႈႁူင်းႁဵၼ်း ၽူႈမီးၸၼ်ႉ ငဝ်ႈငုၼ်း SSPP/SSA ၸတ်းႁဵတ်း ပၢင်ပိုတ်ႇၽုၺ်ႇ ပၢင်သွၼ် ၽူႈမီးၸၼ်ႉဢွၼ်ႇ ၸုပ်ႈထီႉ(5) လႄႈ တွၼ်ႈသူးလုၵ်ႈႁဵၼ်းၵတ်ႉၶႅၼ်ႇ ၸုပ်ႈထီႉ(4) ဢွင်ႈတီႈႁူင်းႁဵၼ်းၽူႈမီးၸၼ်ႉ ငဝ်ႈငုၼ်းဝၢၼ်ႈႁႆးသေ ၽူႈယႂ်ႇၵူၼ်းလူင်ငဝ်ႈငုၼ်း လႄႈ ၵေႃႇမတီႇႁူင်းႁဵၼ်း လႄႈ လုၵ်ႈႁဵၼ်း ၊ ၽူႈႁၢပ်ႇၵၢၼ် ၶိုၼ်ႈႁွတ်ႈ မီး (130) ၵေႃႉယူႇယဝ်ႉ။

ၼႂ်းပၢင်ပိုတ်ႇၽုၺ်ႇပၢင်သွၼ်ၼၼ်ႉ ၵႅမ်ၽူႈဢွၼ်ႁူဝ်ထီႉ (2) ၼႂ်းၸုမ်းပူင်သွၼ် ၸဝ်ႈသိုၵ်းသႅင်ႁၢၼ် မွၵ်ႈလၢတ်ႈၶေႃႈၵႂၢမ်းပိုတ်ႇပၢင်ၵႅဝ်ႈသပ်းလႅင်းၼႄ ယိူင်းဢၢၼ်းပၢင်သွၼ်ၽူႈမီးၸၼ်ႉဢွၼ်ႇၼႆႉ ၵူၼ်းၼိုင်ႈ​​ၵေႃႉၼႆႉ သင်ဝႃႈလူင်းၵၢၼ်ႁဵၼ်းၵႂႃႇယဝ်ႉၸိုင် ႁႂ်ႈ​​ပေႃးပဵၼ်မႃးလႆႈ ၽူႈၵတ်ႉၶႅၼ်ႇ မီးၼမ်ႉၵတ်ႉ ဢၼ်ႁၢပ်ႇလႆႈ ၵၢၼ်ဢုပ်ႉပိူင်ႇ ၊ ၵၢၼ်လုမ်း ၊ၵၢၼ်သိုၵ်း ၊ ၵၢၼ်ပူၵ်းပွင်ၸွႆႈထႅမ်ၵူၼ်းမိူင်း ၸိူဝ်းၼႆႉ ႁႂ်ႈ​​ပေႃးလူင်ႉလႅၼ်ႇ​​ပေႉတူဝ် ၵုမ်းၵမ်ၸတ်းၵၢၼ် ဢွၼ်ႁူဝ်လႆႈၵမ်းသိုဝ်ႈ ၸိူဝ်းၼႆႉယူႇယဝ်ႉ၊ လိူဝ်ၼၼ်ႉ ၽူႈၵွၼ်းႁူင်းႁဵၼ်းၽူႈမီးၸၼ်ႉ ၸဝ်ႈႁၢၼ်ၾူၼ်ၸဵင် လူဢၢၼ်ႇၼႄပၵ်းပိူင်လၵ်းမၢႆပၢင်သွၼ် / ၶၵ်ႉတွၼ်ႈၵၢၼ်ႁဵၼ်းသွၼ် ၸဵမ် ၸိူဝ်းၼႆႉ ယူႇယဝ်ႉ။

ဝၢႆးသေသပ်းလႅင်းယိူင်းဢၢၼ်းပၢင်သွၼ် လႄႈ လၵ်းမၢႆပၢင်သွၼ်ၵႂႃႇယဝ်ႉ သိုပ်ႇတွၼ်ႈသူးပၼ် ၽူႈမီးၸၼ်ႉဢွၼ်ႇ ၸုပ်ႈထီႉ(4) ၸိူဝ်းဢၼ်တူင်ႉတူင်ႉတိုၼ်ႇတိုၼ်ႇ မီးတၢင်းၶတ်းၸႂ်ၼႃႈၵၢၼ်လႄႈ ႁဵတ်းၸွမ်းပၵ်းပိူင်လၵ်းမၢႆ တဵမ်တဵမ်ထူၼ်ႈထူၼ်ႈ ၼႂ်းၶၢဝ်းတၢင်း ပၢင်သွၼ်ၸုပ်ႈထီႉ(4) မိူဝ်ႈပီႊ 2023 ၼႆယူႇယဝ်ႉ။

ၼင်ႇႁိုဝ်ၵူၼ်းၼုမ်ႇႁဝ်းၶႃႈ ​​ပေႃးတေမီးၼမ်ႉၵတ်ႉတၢင်းႁူႉ တၢင်းမေႃပိင်ႇၺႃႇသေ သိုပ်ႇပုတ်ႈႁၢပ်ႇၵၢၼ်လူင် ဢွၼ်ႁူဝ်ၸိူဝ်ႉၸၢတ်ႈဝၢၼ်ႈမိူင်းၵႂႃႇ မိူဝ်းၼႃႈၼၼ်ႉ ယူႇတီႈပႃႇတီႇမႂ်ႇသုင်ၸိုင်ႈတႆးတပ်ႉသိုၵ်းၸိုင်ႈတႆး SSPP/SSA တိုၼ်ႈတေသိုပ်ႇၶတ်းၸႂ်ပူၵ်းပွင်ၼမ်ႉၵတ်ႉၵူၼ်းၼုမ်ႇၵႂႃႇယူႇယဝ်ႉ။#shanstateprogressparty

#shanstatearmy

#SSPPInfo

#ႁူင်းႁဵၼ်းၽူႈမီးၸၼ်ႉ