ၽူႈမီးပုၼ်ႈၽွၼ်းၾၢႆႇဢုပ်ႉပိူင်ႇ SSPP ၼႂ်းၼႃႈတီႈဢုပ်ႉပိူင်ႇ ၸေႈဝဵင်းမၢႆ(17) ထုင်ႉမိူင်းယဵၼ် ၸေႈဝဵင်းၼမ်ႉတူႈ ၸေႈတွၼ်ႈမၢႆ(8) ၼၼ်ႉ လူင်းႁူပ်ႉထူပ်း ၵူၼ်းမိူင်းၸိူဝ်းပၢႆႈၽေးပၢင်တိုၵ်း လႄႈ ၸွႆႈထႅမ်ပၼ် ၶဝ်ႈသၢၼ် ၊ ၶိူင်ႈ ၵိၼ်ယမ်ႉ ၸဵမ်ၸိူဝ်းၼႆႉယူႇယဝ်။

မိူဝ်ႈဝၼ်းထီႉ 27/12/2023 ၶၢဝ်းယၢမ်း ၵၢင်ၼႂ် 10 မူင်း ၼၼ်ႉ ယူႇတီႈၽူႈမီးပုၼ်ႈၽွၼ်း ၾၢႆႇဢုပ်ႉပိူင်ႇ SSPP ၼႂ်းၼႃႈတီႈဢုပ်ႉပိူင်ႇ ၸေႈတွၼ်ႈမၢႆ(8) ၸေႈဝဵင်းမၢႆ(17) ထုင်ႉမိူင်းယဵၼ် ၸေႈဝဵင်းၼမ်ႉတူႈ လႆႈလူင်းႁူပ်ႉထူပ်း ပေႃႈမႄႈၵူၼ်းမိူင်း ၸိူဝ်းလုၵ်ႉတီႈ ဝၢၼ်ႈၼႃးလိၼ်း ၊ ဝၢၼ်ႈႁေႃၼႃး ဢိူင်ႇဝၢၼ်ႈသႃႇလူင် ၸေႈဝဵင်းၼမ်ႉတူႈ သေ ပၢႆႈၽေးပၢင်တိုၵ်း မႃးသွၼ်ႈသဝ်းဝႆႉ တီႈဝတ်ႉၵျွင်း မုၼ်ၸဝ်ႈ ဝၢၼ်ႈပၢင်ႇ ၊ ဝၢၼ်ႈၶူဝ်မႃႉ ဢိူင်ႇမိူင်းယဵၼ် လႄႈ လႆႈၸွႆႈထႅမ်ပၼ် တႃႇၵူၼ်းပၢႆႈၽေး တီႈဝတ်ႉၵျွင်းဝၢၼ်ႈၶူဝ်မ ၶဝ်ႈသၢၼ်(3)ထူင်၊ ၼမ်ႉမၼ်းၵိၼ်(2) တဝ်ႈ ၊ ၽၵ်းၵၢတ်ႇ (1)ထူင် ၊ တႃႇၵူၼ်းပၢႆႈၽေးတီႈဝတ်ႉၵျွင်းဝၢၼ်ႈပၢင်ႇ လႆႈၸွႆႈထႅမ် ၶဝ်ႈသၢၼ် (2) တၢင်ပၢႆ ၼိုင်ႈၶိုင်ႈထူင် ၊ ၼမ်ႉမၼ်း(2) တဝ်ႈ ၊ ၽၵ်းၵၢတ်ႇ (1) ထူင် ၸဵမ် ၸိူဝ်းၼႆႉယူႇယဝ်ႉ။

ၵူၼ်းပၢႆႈၽေးပၢင်တိုၵ်း ဢၼ်မႃးသွၼ်ႈသဝ်းဝႆႉ တီႈဝတ်ႉ ၵျွင်း ဝၢၼ်ႈပၢင်ႇ ၊ ဝတ်ႉၵျွင်းဝၢၼ်ႈၶူဝ်မႃႉၼႆႉ ႁူမ်ႈသဵင်ႈမီး (160) ၵေႃႉ လႄႈ ယွၼ်ႉၶွင်ႇသီႇသိုၵ်းမၢၼ်ႈ ၵႆႉယူႇတီႈ တပ်ႉ ၶမယ 324 ဝဵင်းၼမ်ႉတူႈ သေ ၸႂ်ႉၵွင်ႈလူင် 120 MM ယိုဝ်းၶဝ်ႈ ၼႂ်းဝၢၼ်ႈလႄႈ ၸင်ႇလႆႈဢွၼ်ၵၼ် ပၢႆႈႁႃတီႈလွတ်ႈၽေး ၼႆယူႇယဝ်ႉ။

#shanstateprogressparty

#shanstatearmy

#SSPPInfo

#SSPP

#ၵူၼ်းပၢႆႈၽေး