ၶွင်ႇသီႇသိုၵ်းမၢၼ်ႈ တင်း ၸုမ်းဢူၺ်းလီ(3) ၸုမ်း ပဵၼ်ပၢင်တိုၵ်းၵၼ်ထႅင်ႈ ၼႂ်းၸေႈဝဵင်းၼမ်ႉၶမ်း ၊ ၸေႈဝဵင်းမိူင်းလူင် ၵိင်ႇၽႄ ၸေႈဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ ယွၼ်ႉပၢင်တိုၵ်းသေ မၢၵ်ႇလူင် တူၵ်းတႅၵ်ႇ ၺႃးႁိူၼ်းပေႃႈမႄႈၵူၼ်းမိူင်းလႆႈလူႉၵွႆသေဢမ်ႇၵႃး ၸၢၵ်ႇမၢၵ်ႇတိူဝ်ႉၺႃး ၵူၼ်းမိူင်း မီးလွင်ႈမၢတ်ႇၸဵပ်း လူႉတၢႆၼႆယူႇယဝ်ႉ ။

မိူဝ်ႈဝႃးဝၼ်းထီႉ 05/12/2023 ၼၼ်ႉ တပ်ႉသိုၵ်းတ ဢၢင်း TNLA ႁူမ်ႈၵၼ်တင်း ၸုမ်း PDF ႁႅင်းၵူၼ်း (100) ၵေႃႉပၢႆ ၶဝ်ႈလေႃႇတိုၵ်း တပ်ႉသိုၵ်းၶွင်ႇသီႇသိုၵ်းမၢၼ်ႈ ဢၼ်ပဵၼ်တပ်ႉ ၶမယ(71) ႁႅင်းၵူၼ်း(60) ပၢႆ တီႈငဝ်ႈတပ်ႉပၵ်းသဝ်း ၼႂ်းဝဵင်းမိူင်းလူင် ၵိင်ႇၽႄ ၸေႈဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ၊ သွင်ၾၢႆႇလႆႈပဵၼ်ပၢင်တိုၵ်းၵၼ် တေႃႇထိုင်ၶၢဝ်းယၢမ်း 22:00 မူင်း ၊ ၾၢႆႇၶွင်ႇသီႇသိုၵ်းမၢၼ်ႈ ထွႆ ဢွၵ်ႇတီႈဢၼ်ပဵၼ်ပၢင်တိုၵ်းၵႂႃႇသေ သဵင်ၵွင်ႈ သဵင်မၢၵ်ႇ ၸင်ႇယဵၼ် ၼႆယူႇယဝ်ႉ။

ယွၼ်ႉသွင်ၾၢႆႇပိုတ်းယိုဝ်းၵၼ်သေ မၢၵ်ႇလူင်လႆႈတူၵ်းတႅၵ်ႇတိူဝ်ႉၺႃးႁိူၼ်းၵူၼ်းမိူင်း ၼႂ်းဝဵင်းမိူင်းလူင် လႆႈလူႉၵွႆၵႂႃႇ(6) လင် ၸၢၵ်ႇမၢၵ်ႇလႆႈတိူဝ်ႉၺႃး ၵူၼ်းမိူင်းမၢတ်ႇၸဵပ်းၸွမ်းႁၢဝ်ႈႁႅင်း(5) ၵေႃႉ ၊ လူႉသဵင်ႈ သၢႆၸႂ် (1) ၵေႃႉၼႆယူႇယဝ်ႉ။ၵူၼ်းဢၼ်လႆႈလူႉသဵင်ႈသၢႆၸႂ်ၵႂႃႇယွၼ်ႉၸၢၵ်ႇမၢၵ်ႇတိူဝ်ႉၺႃးၼၼ်ႉ ၸိုဝ်ႈႁွင်ႉ ပႃႈၼၢင်းၼူႉ ဢႃႇယု(35) ပီႊ ပဵၼ်ၵူၼ်း ဝဵင်းမိူင်းလူင် ၵိင်ႇၽႄ ၸေႈဝဵင်းၵျွၵ်ႉမႄး ၼႆယူႇယဝ်ႉ။

ၼႂ်းဝၼ်းလဵဝ်ၵၼ်ၵူၺ်း မိူဝ်ႈၶၢဝ်းယၢမ်း ၵၢင်ဝၼ်း 12:00 မူင်းၼၼ်ႉ တပ်ႉသိုၵ်းၵဝ်ႈၵၢင်ႉ MNDAA ႁူမ်ႈ တပ်ႉသိုၵ်းတဢၢင်း TNLA ႁႅင်းသိုၵ်း မွၵ်ႈ (200) ပၢႆ ၶိုၼ်ႈလေႃႇတိုၵ်းတပ်ႉသိုၵ်းမၢၼ်ႈ ၸၶၢၼ်းတိတ်ႉ ၼႂ်း ၸေႈဝဵင်းၼမ်ႉၶမ်း သွင်ၾၢႆႇလႆႈပဵၼ်ပၢင်တိုၵ်းၵၼ်ႁၢဝ်ႈႁႅင်း တေႃႇထိုင်ၶၢဝ်းယၢမ်း 19:45 မူင်းသေ မိူဝ်ႈၽွင်း ပဵၼ်ပၢင်တိုၵ်းၵၼ် ၾၢႆႇၶွင်ႇသီႇသိုၵ်းမၢၼ်ႈ ၸႂ်ႉႁိူဝ်းမိၼ် ပွႆႇမၢၵ်ႇတိုၵ်းယိုဝ်းၸွႆႈ (11) ပွၵ်ႈၼႆယူႇယဝ်ႉ။

တင်ႈတေႇဢဝ် ၸုမ်းဢူၺ်းလီ(3) ၸုမ်း လႆႈပိုတ်ႇၼႃႈ သိုၵ်း ၶဝ်ႈလူမ်ႇတိုၵ်း ၶွင်ႇသီႇသိုၵ်းမၢၼ်ႈမႃး ၼႂ်းၸိုင်ႈတႆးပွတ်းႁွင်ႇ ၶၢဝ်းတၢင်းႁိုင်ၼိုင်ႈလိူၼ်ပၢႆၼႆႉ ယွၼ်ႉသွင်ၾၢႆႇပိုတ်းယိုဝ်းၵၼ်သေ ႁဵတ်းႁႂ်ႈ မၢၵ်ႇလူင် တူၵ်းတႅၵ်ႇ တိူဝ်ႉ ၺႃးႁိူၼ်းပေႃႈမႄႈၵူၼ်းမိူင်း လႆႈလူႉၵွႆၸွမ်းတၢင်းၼမ် ၊ ၸၢၵ်ႇမၢၵ်ႇတိူဝ်ႉၺႃးၵူၼ်းမိူင်း လႆႈမၢတ်ႇၸဵပ်း လူႉတၢႆၼပ်ႉႁူဝ်သိပ်း ၊ ၵူၼ်းမိူင်းၼႂ်း ပိုၼ်ႉတီႈမွၵ်ႈ (50,000) ၵေႃႉ လႆႈဢွၼ်ၵၼ်ပၢႆႈၽေး ပၢင်တိုၵ်းဝႆႉယူႇယဝ်ႉ။#shanstateprogressparty

#shanstatearmy

#SSPP

#SSA

#ပၢင်တိုၵ်း