ၶွင်ႇသီႇသိုၵ်းမၢၼ်ႈ ၸႂ်ႉႁိူဝ်းမိၼ်တိုၵ်း(jet) ၊ၸႂ်ႉၵွင်ႈလူင် သႅၼ်း 120 MM သေ ပွႆႇမၢၵ်ႇသႂ်ႇ ႁိမ်းတပ်ႉပၢင်သဝ်း သိုၵ်းၶၢင် KIA ဢၼ်မီးၾၢႆႇႁွင်ႇဝၢၼ်ႈၼႃးလိၼ်း ဢိူင်ႇဝၢၼ်ႈသႃႇလူင် ၸေႈဝဵင်းၼမ်ႉတူႈ ၵူၼ်းမိူင်းပိုၼ်ႉတီႈ ဢွၼ်ၵၼ် ပိၵ်ႉႁိူၼ်းယေး ပၢႆႈၵႂႃႇလၢႆတီႈလၢႆတၢင်းၼႆယူႇယဝ်ႉ။

မိူဝ်ႈၼႆႉ ဝၼ်းထီႉ 22/11/2023 မိူဝ်ႈၶၢဝ်းယၢမ်း 14:30 မူင်းၼၼ်ႉ ၶွင်ႇသီႇသိုၵ်းမၢၼ်ႈ ၸႂ်ႉႁိူဝ်းမိၼ်(jet) ၼိုင်ႈလမ်း ၵႂႃႇပွႆႇမၢၵ်ႇသႂ်ႇ တီႈႁိမ်းတပ်ႉပၢင်သဝ်း သိုၵ်းၶၢင် KIA ဢၼ်မီးၾၢႆႇႁွင်ႇဝၢၼ်ႈၼႃးလိၼ်း ဢိူင်ႇဝၢၼ်ႈသႃႇလူင် ထုင်ႉမိူင်းယဵၼ် ၸေႈဝဵင်းၼမ်ႉတူႈၼၼ်ႉ လႄႈ မိူဝ်ႈ ၶၢဝ်းယၢမ်း 16:00 မူင်းသမ်ႉ ၶွင်ႇသီႇသိုၵ်းမၢၼ်ႈ လုၵ်ႉတီႈတပ်ႉပၵ်းသဝ်း ၶမယ 324 ယိုဝ်းမၢၵ်ႇလူင် သႅၼ်း 120 MM ၊ ယိုဝ်းၵွင်ႈၸၢၵ်ႈ ၵႂႃႇ ၾၢႆႇဢွၵ်ႇဝဵင်းၼမ်ႉတူႈ ဢမ်ႇယွမ်း မွၵ်ႈ 25 ၵမ်းၼႆယူႇယဝ်ႉယွၼ်ႉသဵင်ၵွင်ႈသဵင်မၢၵ်ႇ ဢွၵ်ႇၼမ် ၵူၼ်းမိူင်းပိုၼ်ႉတီႈ ၼႂ်းဝဵင်းၼမ်ႉတူႈ ဢွၼ်ၵၼ်ဢိုတ်းလၢၼ်ႉ ပိၵ်ႉႁိူၼ်း သေ ၵမ်ႈၽွင်ႈၵေႃႈ ဢွၼ်ၵၼ်ပၢႆႈ ၵႂႃႇသွၼ်ႈသဝ်းဝႆႉတီႈ ဝတ်ႉၵျွင်းမုၼ်ၸဝ်ႈ ဝၢၼ်ႈၸၢမ် ဢိူင်ႇဝၢၼ်ႈၸၢမ် ၸေႈဝဵင်းၼမ်ႉတူႈ ၊ ၵမ်ႈၽွင်ႈပၢႆႈၵႂႃႇတၢင်းၸေႈဝဵင်းလႃႈသဵဝ်ႈ ၊ ၵမ်ႈၽွင်ႈပၢႆႈမူၵ်းၼႂ်းႁႆႈၼႂ်းသူၼ် လႄႈ ထိုင်တီႈၼႂ်းဝဵင်း ၼမ်ႉတူႈဢမ်ႇမီးၵူၼ်းၵႂႃႇမႃး ၼႆယူႇယဝ်။

သဵၼ်ႈမၢႆႁူဝ်ယွႆႈၵူၼ်းပၢႆႈၽေးသိုၵ်းတေႉ မႅၼ်ႈၽွင်းတိုၵ်ႉၵဵပ်းႁွမ်ၶေႃႈမုၼ်းလႄႈ ပႆႇလႆႈႁူႉၸွမ်း ၼႆယူႇယဝ်ႉ။ၶႅပ်းႁၢင်ႈ – ၼႂ်းဝဵင်းၼမ်ႉတူႈ

#shanstateprogressparty

#shanstatearmy

#SSPPInfo

#ၶွင်ႇသီႇသိုၵ်းမၢၼ်ႈ

#ယိုဝ်းမၢၵ်ႇလူင်