ၶွင်ႇသီႇသိုၵ်းမၢၼ်ႈ တင်း TNLA ၸႂ်ႉၵွင်ႈလူင် ပိုတ်းယိုဝ်းသႂ်ႇၵၼ် ၼႂ်းဢိူင်ႇဢီႇၼၢႆးလူင် ၸေႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ။

မိူဝ်ႈၼႆႉ ဝၼ်းထီႉ 11/12/2023 ၶၢဝ်းယၢမ်း 16:41 မူင်း ၼၼ်ႉ ၶွင်ႇသီႇသိုၵ်းမၢၼ်ႈ လုၵ်ႉတီႈႁူဝ်လွႆ ၵွင်း (7) လၵ်း ၼႂ်းဢိူင်ႇဢီႇၼၢႆးလူင် ၸေႈဝဵင်းလႃႈသဵဝ်ႈ သေ ၸႂ်ႉၵွင်ႈလူင် သႅၼ်း (60MM) ပိုတ်းယိုဝ်းသႂ်ႇ တပ်ႉသိုၵ်းတဢၢင်း TNLA တီႈႁူဝ်ၶူဝ်ၼမ်ႉယၢဝ် ၼႂ်းဝၢၼ်ႈ ဢီႇၼၢႆးလူင် ဢိူင်ႇဢီႇၼၢႆး ၸေႈဝဵင်းလႃႈသဵဝ်ႈ လႄႈ ၾၢႆႇတပ်ႉသိုၵ်းတဢၢင်း TNLA ၵေႃႈ လုၵ်ႉတီႈႁူဝ်ၶူဝ်ၼမ်ႉယၢဝ် ၼႂ်းဝၢၼ်ႈဢီႇၼၢႆးလူင် ၶိုၼ်းယိုဝ်းမၢၵ်ႇ လူင် ၊ ၵွင်ႈၸၢၵ်ႈ တုမ်ႉတွပ်ႇၶိုၼ်း လႄႈ သွင်ၾၢႆႇ ယူႇယူႇ ယိုဝ်းမၢၵ်ႇလူင် ၸူးၵၼ် တေႃႇထိုင် ၶၢဝ်းယၢမ်း 18:00 မူင်းၼႆႉၵေႃႈ သဵင်မၢၵ်ႇပႆႇယဵၼ် တိုၵ်ႉသိုပ်ႇတိုၵ်းယိုဝ်း ၵၼ်ယူႇ ၼႆယဝ်ႉ။

တိုၵ်ႉမႅၼ်ႈၽွင်း သွင်ၾၢႆႇ တိုၵ်ႉပိုတ်းယိုဝ်းတေႃႇၵၼ် လႄႈ ၶေႃႈမုၼ်းႁူဝ်ယွႆႈ လွင်ႈလူႉတၢႆမၢတ်ႇၸဵပ်း ၼႂ်းပၢင်တိုၵ်းသေ လွင်ႈတုမ်ႉတိူဝ်ႉပေႃႈမႄႈၵူၼ်းမိူင်း ၸိူဝ်း ၼႆႉ ပႆႇလႆႈႁူႉၸွမ်း။

တီႈႁူဝ်ၶူဝ် ၼမ်ႉယၢဝ် ၼႂ်းဝၢၼ်ႈဢီႇၼၢႆးလူင်ၼၼ်ႉ မိူဝ်ႈၵူႈပွၵ်ႈ ပဵၼ်ၾၢႆႇၶွင်ႇသီႇသိုၵ်းမၢၼ်ႈ ပၵ်းသဝ်း ႁဵတ်းၵိၵ်ႉၵူတ်ႇထတ်းဝႆႉသေ မိူဝ်ႈဝႃးဝၼ်းထီႉ 10/12/2023 ၶၢဝ်းယၢမ်း ၵၢင်ၶိုၼ်း 24:15 ၼၼ်ႉ ၾၢႆႇ တပ်ႉသိုၵ်းတဢၢင်း TNLA ၸႂ်ႉ ၶိူင်ႈမိၼ် တရူၼ်း ပွႆႇမၢၵ်ႇတိုၵ်းယိုဝ်းလႄႈ ၶွင်ႇသီႇသိုၵ်းမၢၼ်ႈ ဢၼ်ပၵ်းသဝ်းတီႈၶူဝ်ၼမ်ႉယၢဝ်ၼၼ်ႉ လႆႈဢွၼ်ၵၼ် ပၢႆႈၶဝ်ႈ ၼႂ်းဝဵင်းလႃႈသဵဝ်ႈၵႂႃႇ ၼႆယူႇယဝ်ႉ။

Photo – Credit

#shanstateprogressparty

#shanstatearmy

#SSPPInfo

#TNLA

#ၶွင်ႇသီႇသိုၵ်းမၢၼ်ႈ#ပၢင်တိုၵ်း