ၶွင်ႇသီႇသိုၵ်းမၢၼ်ႈ ၸႂ်ႉၵွင်ႈလူင် 120 MM လႄႈ ႁိူဝ်းမိၼ်တိုၵ်း လၢမ်းပွႆႇမၢၵ်ႇသႂ်ႇၼႂ်းၸေႈဝဵင်းၼမ်ႉတူႈ မၢၵ်ႇတူၵ်းတႅၵ်ႇ ၼႂ်းဝၢၼ်ႈၼႂ်းသူၼ် ၸၢၵ်ႇမၢၵ်ႇတိူဝ်ႉပႃး ႁိူၼ်းၵူၼ်းမိူင်း လူႉၵွႆၸွမ်းထႅင်ႈ ၼႆယူႇယဝ်ႉ။

မိူဝ်ႈဝၼ်းထီႉ 23/12/2023 ၶၢဝ်းယၢမ်း 19:00 မူင်းၼၼ်ႉ ၶွင်ႇသီႇသိုၵ်းမၢၼ်ႈ လုၵ်ႉတီႈတပ်ႉ ၶမယ (324) ဝဵင်းၼမ်ႉ တူႈ ယိုဝ်းမၢၵ်ႇလူင် သႅၼ်း 120 MM ၵႂႃႇ ၾၢႆႇဢွၵ်ႇဝဵင်းၼမ်ႉတူႈ ၊ ၾၢႆႇၸဵင်ႇၸၢၼ်းဝၼ်းဢွၵ်ႇဝဵင်းၼမ်ႉတူႈမွၵ်ႈ 10 လုၵ်ႈပၢႆသေ ၾၢႆႇတပ်ႉသိုၵ်းတဢၢင်း TNLA ၵေႃႈ ၸႂ်ႉၵွင်ႈ လူင် ပိုတ်းယိုဝ်းတုမ်ႉတွပ်ႇၶိုၼ်း ဢမ်ႇယွမ်းမွၵ်ႈ (5) လုၵ်ႈ ၊ မၢၵ်ႇဢၼ်သိုၵ်းမၢၼ်ႈယိုဝ်းၵႂႃႇ ၾၢႆႇဢွၵ်ႇဝဵင်းၼမ်ႉတူႈ ၼၼ်ႉ တူၵ်းတႅၵ်ႇႁိမ်းဝၢၼ်ႈၼႃးလိၼ်းၵမ်ႈၽွင်ႈ လႄႈ ၼႂ်းဝၢၼ်ႈႁေႃၼႃး ဢိူင်ႇဝၢၼ်ႈသႃႇလူင် ၸေႈဝဵင်း ၼမ်ႉတူႈ ၸၢၵ်ႇမၢၵ်ႇ သဵၼ်တိူဝ်ႉၺႃး ႁိူၼ်းၵူၼ်းဝၢၼ်ႈ ႁေႃ ၼႃး လူႉၵွႆၸွမ်းၵမ်ႈၽွင်ႈၼႆယူႇယဝ်ႉ။

မိူဝ်ႈၶၢဝ်းယၢမ်း 22:30 မူင်း တေႃႇထိုင်ၶၢဝ်းယၢမ်း 24:00 မူင်းၼၼ်ႉၵေႃႈ ႁိူဝ်းမိၼ်တိုၵ်း ၶွင်ႇသီႇသိုၵ်းမၢၼ်ႈ (1) လမ်း ပွႆႇမၢၵ်ႇတိုၵ်းယိုဝ်းသႂ်ႇ ၾၢႆႇၸဵင်ႇၸၢၼ်းဝၼ်းတူၵ်း ဝဵင်းၼမ်ႉတူႈ လႄႈ ၾၢႆႇႁွင်ႇဝဵင်းၼမ်ႉတူႈ ၊ ၾၢႆႇၸဵင်ႇႁွင်ႇဝၼ်းတူၵ်းဝဵင်းၼမ်ႉတူႈ တီႈဢၼ်သိုၵ်းမၢၼ်ႈထၢင်ႇထိူမ် ဝႃႈတေမီး ၸုမ်းသိုၵ်းလွႆ TNLA ၼၼ်ႉ ယူႇယဝ်ႉ။

ယွၼ်ႉၶွင်ႇသီႇသိုၵ်းမၢၼ်ႈ တင်း တပ်ႉသိုၵ်းတဢၢင်း TNLA ၵႆႉယူႇတီႈၵႆ ၸႂ်ႉၵွင်ႈလူင်ပိုတ်းယိုဝ်းတေႃႇၵၼ် လႄႈ ၵူၼ်းမိူင်းၼႂ်းဝဵင်းၼမ်ႉတူႈ ဢၼ်ပႆႇလႆႈပၢႆႈၽေးၵမ်ႈ ၽွင်ႈၵေႃႈ လႆႈမႆႈၸႂ် ၵူဝ်မၢၵ်ႇတူၵ်းတိူဝ်ႉၺႃးႁိူၼ်းယေး ၊ သင်ဝႃႈတေပၢႆႈမူတ်းၵေႃႈ မီးလွင်ႈမႆႈၸႂ် ၵူဝ်ၸုမ်းယိပ်းၵွင်ႈၵၢင်ႇၶဝ် ၶဝ်ႈယႃႉသွၵ်ႈတဝ် ၶူဝ်းၶွင်ၼႂ်းႁိူၼ်း ၸဵမ်ၸိူဝ်းၼႆႉ ယူႇယဝ်ႉ။

#shanstateprogressparty

#shanstatearmy #SSPPInfo

#ဝဵင်းၼမ်ႉတူႈ

#TNLA

#ၶွင်ႇသီႇသိုၵ်းမၢၼ်ႈ

#ႁိူဝ်းမိၼ်တိုၵ်း

#ၵွင်ႈလူင်