ယွၼ်ႉၶွင်ႇသီႇသိုၵ်းမၢၼ်ႈ ယူႇယူႇၵႆႉၸႂ်ႉၵွင်ႈလူင် ၊ ၵွင်ႈ ၸၢၵ်ႈ ပိုတ်းယိုဝ်းၵႂႃႇ ၵူႈၾၢႆႇၾၢႆႇလႄႈ မၢၵ်ႇမၢင်လုၵ်ႈ ၵႂႃႇတူၵ်းၸွမ်း ၼႂ်းႁႆႈၼႂ်းသူၼ်ၵူၼ်းမိူင်း ၊ ၵူၼ်းမိူင်းပိုၼ်ႉတီႈ ၼႂ်းၸေႈဝဵင်းၼမ်ႉတူႈ ဢၼ်ပၢႆႈၽေး သိုၵ်းၵႂႃႇသွၼ်ႈယူႇဝႆႉ ၸွမ်းၼႂ်းႁႆႈ/သူၼ် ၼၼ်ႉ ဢမ်ႇမီးလွင်ႈႁူမ်ႇလူမ်ႈ သေ တေသိုပ်ႇပၢႆႈၵႂႃႇ တၢင်းၸေႈဝဵင်းလႃႈသဵဝ်ႈၼႆယူႇယဝ်ႉ။
မိူဝ်ႈဝၼ်းထီႉ 22-23/12/2023 ၼႂ်းၶၢဝ်းတၢင်း သွင်ဝၼ်း ၼႆႉ သိုၵ်းမၢၼ်ႈ တီႈတပ်ႉ ၶမယ (324) ဝဵင်းၼမ်ႉတူႈ ယိုဝ်းမၢၵ်ႇလူင်ၵႂႃႇ ၵူႈတီႈၵူႈတၢင်း မၢင်လုၵ်ႈယိုဝ်းတူၵ်း ၸွမ်းၼႂ်းႁႆႊၼႂ်းသူၼ် တီႈဢၼ်ဢမ်ႇမီးသိုၵ်းၸုမ်းလႂ် တီႈႁိမ်း ဢၼ်မီးၵူၼ်းၶၢႆႉပၢႆႈၽေးသိုၵ်း ၵႂႃႇႁဵတ်းသုမ်ႉယူႇဝႆႉ ၼႂ်း ႁႆႈၼႂ်းသူၼ် ၼၼ်ႉ လႄႈ ၵူၼ်းမိူင်းပိုၼ်ႉတီႈ ဢၼ်ၶၢႆႉပၢႆႈ ၵႂႃႇသွၼ်ႈသဝ်းယူႇဝႆႉ ၸွမ်းၼႂ်းႁႆႊၼႂ်းသူၼ်ၼၼ်ႉ ဢမ်ႇမီးလွင်ႈႁူမ်ႇလူမ်ႈသေ တေသိုပ်ႇၶၢႆႉပၢႆႈၵႂႃႇ ၼႂ်းၸေႈဝဵင်း လႃႈသဵဝ်ႈ ၼႆယူႇယဝ်ႉ။
တႃႇတေၶၢႆႉပၢႆႈၵႂႃႇ ၼႂ်းၸေႈဝဵင်းလႃႈသဵဝ်ႈၼၼ်ႉ ယွၼ်ႉ ၾၢႆႇၶွင်ႇသီႇသိုၵ်းမၢၼ်ႈ ႁေႉႁၢမ်ႈဢမ်ႇပၼ်ၶဝ်ႈၼႂ်းဝဵင်း လႃႈသဵဝ်ႈလႄႈ ယူႇတီႈၸုမ်းၵူၼ်းၼုမ်ႇတႆးၼႂ်းဝဵင်းလႃႈ သဵဝ်ႈ တေဢဝ်ပုၼ်ႈၽွၼ်းၸွႆႈထႅမ် ႁပ်ႉသူင်ႇၶဝ်ႈ ၼႂ်းဝဵင်း လႃႈသဵဝ်ႈၼႆယူႇယဝ်ႉ။
ၵဵဝ်ႇလူၺ်ႈလွင်ႈၼႆႉသေ ၵူၼ်းမိူၼ်းပိုၼ်ႉတီႈၸေႈဝဵင်းၼမ်ႉတူႈၵေႃႉၼိုင်ႈလၢတ်ႈၼႄဝႃႈ-“ၸႂ်ႈၶႃႈဢေႃႈ ၸုမ်းၵူၼ်း ၼုမ်ႇတႆးၶဝ် ဢဝ်ၵႃးမႃးႁပ်ႉႁဝ်းၶႃႈဢေႃႈ ႁဝ်းၶႃႈတိုၵ်ႉႁၢင်ႈႁႅၼ်းၶူဝ်းပႂ်ႉဝႆႉယူႇၶႃႈ ။ သိုၵ်းမၢၼ်ႈတေႉ တေႃႇမိူဝ်ႈလဵဝ်ယူႇယူႇယိုဝ်းၵွင်ႈလူင်ၵႂႃႇယူႇၶႃႈ ယိုဝ်းၵႂႃႇတၢင်းလႂ်လၢႆလၢႆတေႉဢမ်ႇႁူႉ မိူဝ်ႈပူၼ်ႉမႃးသွင်သၢမ်ဝၼ်းတေႉ တၢင်းႁႆႊတၢင်းသူၼ်ၵေႃႈ မၢၵ်ႇၵႂႃႇတူၵ်းဢေႃႈ ယွၼ်ႉၼၼ် ဢၼ်ႁဝ်းၶႃႈ ယူႇၸွမ်းၼႂ်းႁႆႊ/သူၼ်ၵေႃႈ ဢမ်ႇမီးလွင်ႈႁူမ်ႇလူမ်ႈလႄႈ တေၶိုၼ်းပၢႆႈၵႂႃႇ ၼႂ်းဝဵင်းလႃႈသဵဝ်ႈၶႃႈ ဢေႃႈ” ဝႃႈ ၼႆ။
ၼႂ်းၸေႈဝဵင်းၼမ်ႉတူႈၼႆႉ တေႃႇထိုင်မိူဝ်ႈလဵဝ်ၵေႃႈ ၶွင်ႇသီႇသိုၵ်းမၢၼ်ႈ တိုၵ်ႉၸႂ်ႉၵွင်ႈလူင်ယိုဝ်းၵႂႃႇၵူႈႁူးၵူႈတၢင်း ဢမ်ႇပႆႇမီးသိုၵ်းၸုမ်းလႂ် ယိုဝ်းတုမ်ႉတွပ်ႇၶိုၼ်း ၊ ယွၼ်ႉၵူဝ် မၢၵ်ႇလူင်သိုၵ်းမၢၼ်ႈ တူၵ်းတိူဝ်ႉၺႃးလႄႈ ၵူၼ်းဝဵင်းၼမ်ႉ တူႈၼပ်ႉႁူဝ်ပၢၵ်ႇ ဢွၼ်ၵၼ်ပၢႆႈၵႂႃႇ သွၼ်ႈသဝ်းဝႆႉ တီႈဝတ်ႉၵျွင်းႁွင်ႇဝၢၼ်ႈၸၢမ် ၼႂ်းဢိူင်ႇဝၢၼ်ႈၸၢမ် သေ ၵမ်ႈၽွင်ႈၵေႃႈ တေသိုပ်ႇပၢႆႈၵႂႃႇ ၼႂ်းၸေႈဝဵင်းလႃႈသဵဝ်ႈၼႆယူႇယဝ်ႉ။
