တပ်ႉသိုၵ်း ၶွင်ႇသီႇသိုၵ်းမၢၼ်ႈ ဢၼ်ပၵ်းသဝ်းတူင်ႉၼိုင် ဢဝ်ႁူမ်ႇလူမ်ႈတပ်ႉ ၶမယ(324) ၼၼ်ႉ ယိုဝ်းၵွင်ႈလူင် ၵွင်ႈဢွၼ်ႇၾၢႆႇလဵဝ် လႄႈ တပ်ႉသိုၵ်း တဢၢင်း TNLA တိူဝ်းၽိူမ်ႉထႅမ်ႁႅင်းသိုၵ်းၼႂ်းၸေႈဝဵင်းၼမ်ႉတူႈ ၵူၼ်းမိူင်းမႆႈၸႂ် ၵူဝ်ပဵၼ်ပၢင်တိုၵ်းႁၢဝ်ႈႁႅင်း ဢွၼ်ၵၼ်ငိူင်ႉပၢႆႈဝႆႉထႃႈ ၼႆယူႇယဝ်ႉ။

မိူဝ်ႈဝၼ်းထီႉ 19/12/2023 ၶၢဝ်းယၢမ်း 22:32 မူင်း ၼၼ်ႉ ၶွင်ႇသီႇသိုၵ်းမၢၼ်ႈ လုၵ်ႉတီႈတပ်ႉ ၶမယ 324 ဝဵင်းၼမ်ႉတူႈသေ ယိုဝ်းၵွင်ႈလူင် မွၵ်ႈ 15 ၵမ်း ၊ ၵွင်ႈ ၸၢၵ်ႈ မွၵ်ႈ 30 ၵမ်း ယိုဝ်းၵႂႃႇ ၾၢႆႇတူၵ်းတပ်ႉၶမယ 324 လႄႈ ၵူၼ်းမိူင်းၼႂ်းပိုၼ်ႉတီႈ ၸေႈဝဵင်းၼမ်ႉတူႈ ဢွၼ်ၵၼ်တူၵ်း ၸႂ် ထၢင်ႇပဵၼ်ပၢင်တိုၵ်း ၼႆယူႇယဝ်ႉ။

မိူဝ်ႈဝၼ်းထီႉ 20/12/2023 ၼၼ်ႉ ၾၢႆႇတပ်ႉသိုၵ်း TNLA သိုပ်ႇၽိူမ်ႉထႅမ်ႁႅင်းသိုၵ်း ၽိုတ်ႉဢိူမ်ႈၸမ် တပ်ႉၶမယ 324 မႃးထႅင်ႈလႄႈ ၵူၼ်းမိူင်းပိုၼ်ႉတီႈ ဝၢၼ်ႈသႅင်ႇၸႃႇ ၊ ဝၢၼ်ႈၽုၺ်း ၊ ဝၢၼ်ႈၵွင်းသႃႇ ၊ ဝၢၼ်ႈႁၢတ်ႇလႅင် ၊ ဝၢၼ်ႈပဵင်းလွင်း ၊ ဝၢၼ်ႈပၢင်မၢၼ်ႈ ၊ ဝၢၼ်ႈ ၼမ်ႉၵၢၼ်ႇ ၊ ဝၢၼ်ႈသၢႆးၶၢဝ် ၊ ဝၢၼ်ႈၼမ်ႉမႅင်းသေႃႉ ၊ ဝၢၼ်ႈပၢင်ဝူဝ်း ဢိူင်ႇသၢႆးၶၢဝ် ၸေႈဝဵင်းၼမ်ႉတူႈ ၼပ်ႉႁူဝ်ပၢၵ်ႇ လႆႈဢွၼ် ၵၼ် ငိူင်ႉပၢႆႈ ၵႂႃႇသွၼ်ႈသဝ်း ဝႆႉ ၸွမ်းႁိူၼ်းပီႈၼွင်ႉၽႂ်မၼ်း ၊ ၵမ်ႈၽွင်ႈပၢႆႈၵႂႃႇ မူၵ်းဝႆႉ ၸွမ်းၼႂ်းႁႆႈ ၼႂ်းသူၼ် ၼႆယူႇယဝ်ႉ။

ၵူၼ်းမိူင်းပိုၼ်ႉတီႈ ၵေႃႉၼိုင်ႈ လၢတ်ႈၼႄဝႃႈ “ၸႂ်ႈၶ ဢေႃႈ မိူဝ်ႈလဵဝ် ၼႂ်းဝဵင်းၼမ်ႉတူႈ ၊ ၸွမ်းၵျွင်းမုၼ်ၸဝ်ႈ ၼႂ်းဢိူင်ႇသၢႆးၶၢဝ် ၸိူဝ်းၼၼ်ႉ သိုၵ်းလွႆၶဝ်ယူႇဝႆႉလႄႈ ပေႃးပဵၼ်ပၢင်တိုၵ်းမႃး ၵူဝ်မၢၵ်ႇလူင်တူၵ်းၺႃး ၊ ၵူဝ်သိုၵ်းမၢၼ်ႈဢဝ်ႁိူဝ်းမိၼ်မႃးပွႆႇမၢၵ်ႇသႂ်ႇ ၸိူဝ်းဢၼ်သိုၵ်းလွႆယူႇ ၼႆႉဢေႃႈ” ဝႃႈၼႆ။

ၶွင်ႇသီႇသိုၵ်းမၢၼ်ႈ တင်း တပ်ႉသိုၵ်းတဢၢင်း TNLA ၶဵင်ႈၶႅင်ၼႃႈသိုၵ်းတေႃႇၵၼ်ဝႆႉ ၼႂ်းၸေႈဝဵင်းၼမ်ႉတူႈ ၼႆႉ မီးၶၢဝ်းတၢင်းၸမ်ၼိုင်ႈလိူၼ် ၊ တေႇဝၼ်းထီႉ 18/12/2023 မႃးတေႃႇမိူဝ်ႈၼႆႉ တပ်ႉသိုၵ်း တဢၢင်း TNLA တိုၵ်ႉၶိုၼ်ႈလေႃႇတိုၵ်း တပ်ႉသိုၵ်းမၢၼ်ႈ ၶလယ 130 ၼႂ်းၸေႈဝဵင်း ဝၢၼ်ႈတူင်ႈယူႇၼႆယဝ်ႉ။

Photo-Credit

#shanstateprogressparty

#shanstatearmy

#SSPPInfo

#TNLA

#ၶွင်ႇသီႇသိုၵ်းမၢၼ်ႈ

#ၶဵင်ႈၶႅင်ၼႃႈသိုၵ်း