(ၸုမ်းမႅတ်ႉတႃႇ) ဢၼ်ပဵၼ် ပီႈၼွင်ႉၸၢဝ်းၶိူဝ်းၶႄႇ ဢၼ်ယူႇသဝ်း ၼႂ်းမိူင်းၸိုင်ႈတႆးၼၼ်ႉ ၸွႆႈထႅမ်ၶဝ်ႈသၢၼ် တႃႇၵူၼ်းမိူင်း ၸိူဝ်းပၢႆႈၽေးပၢင်တိုၵ်း ၼႂ်းၸေႈဝဵင်းၼမ်ႉၶမ်း ၸိုင်ႈတႆးပွတ်းႁွင်ႇ ၼႆယူႇယဝ်ႉ။

မိူဝ်ႈဝၼ်းထီႉ 02/12/2023 မီးၸုမ်းပီႈၼွင်ႉၸၢဝ်း ၶိူဝ်း ၶႄႇ ဢၼ်ယူႇသဝ်းၼႂ်းမိူင်းၸိုင်ႈတႆး ဢၼ်မီးၸိုဝ်ႈ ၸုမ်းဝႃႈ (ၸုမ်းမႅတ်ႉတႃႇ) ၼၼ်ႉ မႃးၵပ်းသိုပ်ႇၸူး ၽူႈမီးပုၼ်ႈၽွၼ်း ၾၢႆႇဢုပ်ႉပိူင်ႇ ပႃႇတီႇမႂ်ႇသုင်ၸိုင်ႈတႆးတပ်ႉသိုၵ်းၸိုင်ႈတႆး SSPP/SSA ၼႂ်းၸေႈဝဵင်းၼမ်ႉၶမ်းသေ မီးၼမ်ႉၸႂ် ၸေႇတၼႃႇ မႃးၸွႆႈထႅမ် ၶဝ်ႈသၢၼ် (150) ထူင် တႃႇ ၵူၼ်းပၢႆႈၽေးပၢင်တိုၵ်း ၼႂ်းၸေႈဝဵင်း ၼမ်ႉၶမ်းၼႆလႄႈ မိူဝ်ႈၶၢဝ်းယၢမ်းဝၢႆးဝၼ်း 14:00 မူင်း ၼၼ်ႉ ယူႇတီႈၽူႈမီးပုၼ်ႈၽွၼ်းၾၢႆႇဢုပ်ႉပိူင်ႇ SSPP/SSA လႆႈ ဢွၼ်ဢဝ် ၸဝ်ႈၸေႇတၼႃႇ (ၸုမ်းမႅတ်ႉတႃႇ) သေ ၵႂႃႇ ၸွႆႈထႅမ်ပၼ် ထိုင်တီႈ ၵူၼ်းပၢႆႈၽေးပၢင်တိုၵ်း ဢၼ်မႃးသွၼ်ႈသဝ်းဝႆႉတီႈဝတ်ႉၵျွင်း ဝၢၼ်ႈ ၵုၼ်ႁႆး ၊ ဝတ်ႉၵျွင်း ဝၢၼ်ႈၼွင်ၶမ်း ၊ ဝတ်ႉၵျွင်း ဝၢၼ်ႈၵုၼ် ၊ ဝတ်ႉ ၵျွင်း ဝၢၼ်ႈသွၼ်း ၊ ဝတ်ႉၵျွင်းဝၢၼ်ႈဢၢႆႇတႂ်ႈ ၼႂ်းဢိူင်ႇ ၵုၼ်ႁႆး ၸေႈဝဵင်းၼမ်ႉၶမ်းၼၼ်ႉ ယူႇယဝ်ႉ။

ယွၼ်ႉပၢင်တိုၵ်း ၸုမ်းဢူၺ်းလီ(3) ၸုမ်း တင်း ၶွင်ႇသီႇသိုၵ်းမၢၼ်ႈပဵၼ်ပၢင်တိုၵ်းၵၼ်မႃး ၶၢဝ်းတၢင်း ၼိုင်ႈလိူၼ်ပၢႆၼႆႉသေ ၵူၼ်းမိူင်းပိုၼ်ႉတီႈၼႂ်းၸေႈဝဵင်းၼမ်ႉ ၶမ်း လႆႈဢွၼ်ၵၼ် ပၢႆႈၽေးပၢင်တိုၵ်း မီးထိုင် (4,000) ၵေႃႉပၢႆ ၊ မိူဝ်ႈလဵဝ် မီးလွင်ႈယၢပ်ႇၽိုတ်ႇ လွင်ႈၵိၼ် ယမ်ႉ ၊ လွင်ႈ ၸွႆႈတူၺ်းထိုင်ပၼ် ပၢႆးယူႇလီ ၸဵမ်ၸိူဝ်း ၼႆႉ လႄႈ ယူႇတီႈ ၾၢႆႇဢုပ်ႉပိူင်ႇ ပႃႇတီႇမႂ်ႇသုင်ၸိုင်ႈတႆး တပ်ႉသိုၵ်းၸိုင်ႈတႆး SSPP/SSA ၵေႃႈ ၵႃႈၼင်ႇပွင်ပဵၼ်လႆႈၼၼ်ႉ လႆႈ ၶတ်းၸႂ် ၸွႆႈထႅမ်ပၼ်မႃး လွင်ႈၶဝ်ႈၼမ်ႉတၢင်းၵိၼ် ၊ လႆႈ ၸွႆႈ ယူတ်းယႃ တူၺ်းထိုင်ပၼ်ပႃး လွင်ႈပၢႆးယူႇလီၸဵမ်ၸိူဝ်းၼႆႉ ယူႇယဝ်ႉ။

#shanstateprogressparty

#shanstatearmy

#SSPP

#SSA#ပႃႇတီႇမႂ်ႇသုင်ၸိုင်ႈတႆး #တပ်ႉသိုၵ်းၸိုင်ႈတႆး #ၸွႆႈထႅမ်ၵူၼ်းပၢႆႈၽေး#ၸုမ်းမႅတ်ႉတႃႇ